Read tsonga I Samuwele 30 Bible Online

I Samuwele 30 - tsonga bible

I Samuwele 30

¹Kute siku ra vunharhu, loko Davhida a fika eSikilaga ni vanhu va yena, maswivo, Vaamaleke a va hlaserile edzongeni na Sikilaga; a va nghenile eSikilaga, va wu hisa hi ndzilo.

²A va khomile vavasati, ni lava va va kumeke lavatsongo ni lavakulu, va nga dlayanga munhu, va fambile na vona.

³Davhida a nghena ni vanhu va yena emutini; kutani va wu kuma wu hisiwile hi ndzilo, vasati va vona ni vana va vona va varisanyana ni vanhwanyana va khomiwile.

⁴Kavaloko Davhida ni tiko leri ngi ri ri na yena va tlakusa rito va rila, va kondza va nga ha ri na matimba ya ku rila.

⁵Vasati vambirhi va Davhida, a va khomiwile na vona, a a ri Ahinowama wa Yizriele, na Abigayele nsati wa Nabala, wa Karmele.

⁶Davhida a a ri enhlomulweni lowukulu, hikuva vunyingi a byi ehleketa ku n'wi khandla hi maribye, hikuva mimoya ya vona hinkwavo a yi tele mbitsi, un'wana ni un'wana hikwalaho ka vana va yena. Kambe Davhida a lava matimba eka Yehovha, Xikwembu xa yena.

⁷Davhida a ku eka Abiyatara, muprista, n'wana Ahimeleke: “Wa nga ndzi tisela efodi.” Kavaloko Abiyatara a tisa efodi eka Davhida.

⁸Kutani Davhida a vutisa Yehovha, a ku: “Loko ndzi landzela nyimpi leyi, ndzi ta yi kuma xana?” A ku eka yena: “Yi landze, hikuva kunene u ta yi kuma, u ta kutsula.”

⁹Kutani Davhida a suka a ri ni vanhu va yena va 600, va ya fika exinambyaneni xa Besori, kutani lava seleke endzhaku va yima kona.

¹⁰Kambe Davhida a ya emahlweni a ri ni vanhu va 400, kutani vanhu va 200 va yima hikuva va karhele ngopfu, va tsandzeka ku wela xinambyana xa Besori.

¹¹Kutani va ya kuma Muegipta emananga, va n'wi tisa eka Davhida, va n'wi nyika vuswa a dya, va n'wi nwisa ni mati.

¹²Va n'wi nyika ni xipandzwa xa buwu ra makuwa, ni swidzumba swimbirhi swa vhinya leyi omeke; a dya swona kutani a kuma matimba, hikuva a a nga dyanga swakudya, a nga nwangi mati hi masiku manharhu, vusiku ni nhlekanhi.

¹³Kutani Davhida a ku eka yena: “U wa ka mani u huma kwihi xana?” A ku: “Ndzi ntsongwana wa Muegipta, a ndzi ri khumbi ra munhu wa Amaleke, kutani n'wini wanga u ndzi tshikile hikuva a ndzi vabya, sweswi ku hundze masiku manharhu.

¹⁴A hi yile hi ya hlasela edzongeni ra Vakereti ni le tikweni ra Yuda edzongeni ra ka Kalebe, kutani hi hisile Sikilaga.”

¹⁵Davhida a ku eka yena: “U nga ndzi fambisa eka nyimpi leyi xana?” Kutani a ku: “Ndzi hlambanyele hi Xikwembu leswaku u nga ka u nga ndzi dlayi, hambi ku ndzi nyiketa emavokweni ya n'wini wa mina, kutani ndzi ta ku fambisa eka nyimpi leyi.”

¹⁶Kavaloko a n'wi yisa kona. Kutani maswivo, a va hangalakile ematlhelweni hinkwawo ya tiko, va ri karhi va dya, va nwa va titsakela hi xuma hinkwaxo lexikulu lexi va xi phangeke etikweni ra Vafilista, ni le tikweni ra Yuda.

¹⁷Kutani Davhida a va hlasela, a sungula nimixo ku fika nimadyambu ya siku leri tlhandlamaka; a ku balekanga na un'we loko ma nga ri majaha ya 400 lama khandziyeke tikamela, ma tsutsuma ha tona.

¹⁸Davhida a kutsula hinkwaswo leswi tekiweke hi Vaamaleke; Davhida a kutsula ni vasati vambirhi va ka yena.

¹⁹A va pfumalanga munhu hambi lontsongo, hambi lonkulu, hambi va ri vana va varisanyana, hambi vanhwanyana, hambi xi ri xilo xin'wana xa xuma lexi phangiweke eka vona; Davhida a vuyisa hinkwaswo.

²⁰Davhida a teka swifuwo hinkwaswo leswitsongo ni leswikulu; kutani vanhu va famba, va rhangela ntlhambi, va ku: “I xuma xa Davhida.”

²¹Davhida a fika eka vavanuna va 200 lava ingi va karhele ku tlurisa, va tsandzeka ku n'wi landza, va siyiwile exinambyaneni xa Besori. Vona va huma ku ya hlangana na Davhida ni vanhu lava ngi va ri na yena. Kutani Davhida a va tshinelela a va vutisa ku tsaka ka vona.

²²Kambe vanhu hinkwavo lavo biha ni va Beliyali exikarhi ka lava fambeke na Davhida, va vulavula, va ku: “Leswi a va nga fambanga na hina, hi nga ka hi nga va nyiki nchumu wa xuma lexi hi xi kutsuleke, loko ku nga ri eka un'wana ni un'wana nsati wa yena ni vana va yena va vavanuna; a va va teke va famba.”

²³Kavaloko Davhida a ku: “Mi nga ka mi nga endlisi sweswo, vamakwerhu, hi leswi Yehovha a hi nyikeke swona; u hi hlayisile, kutani u nyiketile emavokweni ya hina nyimpi leyi teke ku ta lwa na hina.

²⁴Kutani i mani la nga ta mi yingisa emhakeni leyi? Hikuva ku averiwa ka loyi a fambeke eku lweni u ta fana ni ku averiwa ka loyi a tshameke enhundzwini, va ta avelana swin'we.”

²⁵Ku sungula siku leri, ni ku ya emahlweni, swi va tano, va swi endla xitoloveto ni nawu eIsraeleni ku fika namuntlha.

²⁶Davhida a fika eSikilaga, kutani a rhumela vakulukumba va Yuda ni vanakulobye xuma, a ku: “Nyiko ya n'wina hi leyi, i xuma xa valala va Yehovha.”

²⁷A yi rhuma eka lava ngi va ri eBetele, ni ka va Ramoto wa le dzongeni, ni ka va Yatiri,

²⁸ni ka va Arowere, ni ka va Sifimoto, ni ka va Exitemoka,

²⁹ni ka va Rakala, ni ka lava ngi va ri emitini ya Yerahamiele ni ka lava ngi va ri emitini ya Vakeni,

³⁰ni ka va Horma, ni ka va Boraxani, ni ka va Ataki,

³¹ni ka va Hebroni, ni le matikweni hinkwawo lawa Davhida ni vanhu va yena va hundzeke eka wona.