Read tsonga I Samuwele 6 Bible Online

I Samuwele 6 - tsonga bible

I Samuwele 6

¹Areka ya Yehovha yi tshamile tin'hweti ta ntlhanu na timbirhi etikweni ra Vafilista.

²Kutani Vafilista va vitana vaprista ni vangoma, va ku: “Hi ta endla yini hi areka ya Yehovha xana? Hi tiviseni mukhuva lowu hi nga ta yi tlherisela ekaya ka yona ha wona.”

³Va ku: “Kungakuloko mi tlherisa areka ya Xikwembu xa Israele, mi nga tshuki mi yi mukisa ntsena, kambe mi ta yi humesela nhlengo wa nandzu; kutani mi ta horisiwa, kumbe mi ta tiva xana voko ra Xikwembu a ri mi sukelanga ha yini?”

⁴Kutani va ku: “Hi ta yi humeselela nhlengo lowo yini xana?” Va ku: “Mi ta humesa matshumba ya nsuku ya ntlhanu, ni timbeva ta nsuku ta ntlhanu, hi ntsengo wa tindhuna ta Vafilista; hikuva khombo rin'we a ri ri ehenhla ka vona hinkwavo ni le henhla ka tindhuna ta n'wina.

⁵Mi ta endla swifaniso swa matshumba ya n'wina, ni swifaniso swa timbeva leti onhaka tiko ra n'wina, kutani mi ta dzunisa Xikwembu xa Israele: kumbe xana xi ta vevukisa voko ra xona ehenhla ka n'wina, ni le henhla ka swikwembu swa n'wina, ni le henhla ka tiko ra n'wina.

⁶Xana mi ta nonon'hwisela yini timbilu ta n'wina, kukotisa leswi Vaegipta na Faro va nonon'hwiseke timbilu ta vona xana? Xana a swi nga vi kukotisa loko xi va endleke hi matimba, kutani va va tshika va famba?

⁷Sweswi endlani golonyi leyintshwa, mi teka ni tihomu timbirhi letintshwa ta matswele leti an'wisaka, leti nga siki rhwala joko, Mi ta pana tihomu leti egolonyini kutani mi ta tlherisela ekaya marhole ya tona.

⁸Kavaloko mi ta teka areka ya Yehovha, mi yi veka ehenhla ka golonyi; loko swi ri swilo swa nsuku leswi mi nga ta yi humesela swona, wu nga nhlengo wa nandzu, mi ta swi nghenisa ebokisini, kusuhi ni areka, kutani mi ta tshika tihomu ti famba, hi kona yi nga ta timukela.

⁹Mi ta yi languta; kutani kungakuloko yi tlhandluka endleleni ya ndzilakana wa yona, tlhelo ra Beta-Xemexe, i Yehovha la hi tiseleke khombo lerikulu leri; loko swi nga ri tano, hi ta tiva leswaku voko ra yena a ri hi khumbanga, kambe swi hi humelele ntsena.”

¹⁰Vanhu lava va endlisa sweswo. Va teka tihomu timbirhi; letintshwa ta matswele lama an'wisaka, va ti pana egolonyini, kutani va pfalela marhole ya tona endlwini;

¹¹kutani va veka areka ya Yehovha egolonyini, swin'we ni bokisi, leri nga ni timbeva ta nsuku, ni swifaniso swa matshumba ya vona.

¹²Tihomu ti famba ti lulama hi ndlela ya Beta-Xemexe; ti rila ti ri karhi ti famba hi ndlela yin'we, ti nga hambuki tlhelo ra xinene kumbe ra ximatsi. Tindhuna ta Vafilista ti ti landza ku fika endzilakaneni wa Beta-Xemexe.

¹³Va Beta-Xemexe a va ri karhi va tshovela koro enkoveni; kuteloko va tlakusa mahlo, va vona areka, kutani va tsakela ku yi vona.

¹⁴Golonyi yi va fika ensin'wini ya Yoxuwa wa Beta-Xemexe, yi yima kona; kambe ribye lerikulu a ri ri kona. Kavaloko va pandzela golonyi va endla tihunyi, kutani va humesela Yehovha tihomu letimbirhi, yi va holokosta.

¹⁵Valevhi a va xikisile areka ya Yehovha ni bokisi leri ngi ri ri na yona leri nga ni swilo swa nsuku; kutani a va swi vekile eribyeni lerikulu. Siku lero vanhu va Beta-Xemexe va humesela Yehovha tiholokosta ni magandzelo.

¹⁶Tindhuna ta ntlhanu ta Vafilista, kuteloko ti swi vonile, ti tlhelela eEkroni hi siku rolero.

¹⁷Hi wona matshumba ya nsuku lama humeseriweke Yehovha hi Vafilista wu va nhlengo wa nandzu: tshumba rin'we ra Axidodo, rin'we ra Gaza, rin'we ra Axikeloni, rin'we ra Gati, rin'we ra Ekroni.

¹⁸Ni timbeva ta nsuku a ti ri kona, hi ntsengo wa miti hinkwayo ya Vafilista leyi fumiwaka hi tindhuna ta ntlhanu, ku suka miti ya makhokholo ku fika mitinyana ya le masin'wini, swi ya fika eribyeni lerikulu leri va vekeke areka ya Yehovha ehenhla ka rona; na rona ra ha ri kona ni namuntlha ensin'wini ya Yoxuwa wa Beta-Xemexe.

¹⁹Yehovha a ba ngopfu vanhu va Beta-Xemexe, hikuva a va langutile areka ya Yehovha; a dlaya vanhu va 70 exikarhi ka tiko leri ngi ri ri ni vanhu va 50 000. Kutani vanhu va va ni mikosi hikuva Yehovha a a bile tiko hi khombo lerikulu.

²⁰Va Beta-Xemexe va ku: “I mani la tivaka ku yima emahlweni ka Yehovha, Xikwembu lexo kwetsima xana? Areka yi ta tlhandlukela eka mani loko yi suka ka hina-ke?”

²¹Kavaloko va rhuma tintsumi eka va Kiriyata-Yeyarimi, va ku: “Vafilista va tlherisile areka ya Yehovha, tanani mi ta yi tlhandlukisa eka rikwenu.”