Read tsonga I Samuwele 7 Bible Online

I Samuwele 7 - tsonga bible

I Samuwele 7

¹Va Kiriyata-Yeyarimi va ta, va tlhandlukisa areka ya Yehovha, va yi nghenisa endlwini ya Abinadaba exitsungeni, kutani va hlawula Eliyazara, n'wana wa yena, a ta hlayisa areka ya Yehovha.

²Mpfhuka areka yi vekiwa Kiriyata-Yeyarimi, ku hundza masiku layo tala kuteloko ku hundzile malembe ya 20, yindlu hinkwayo ya Israele yi navela Yehovha.

³Kavaloko Samiele a byela yindlu ya Israele hinkwayo, a ku: “Ku nga ku loko mi tlhelela eka Yehovha hi timbilu hinkwato ta n'wina, susani xikarhi ka n'wina swikwembu swimbe ni va Astarte, mi tiyisa timbilu ta n'wina eka Yehovha, mi tirhela yena ntsena; hi kona a nga ta mi ponisa emavokweni ya Vafilista.”

⁴Kutani vana va Israele va susa va Baali ni va Astarte va tirhela Yehovha ntsena.

⁵Samiele a ku: “Hlengeletani Vaisraele hinkwavo eMispa, kutani ndzi ta mi khongelela eka Yehovha.”

⁶Kavaloko va hlengeletana eMispa, kutani va ka mati, va ma halatela emahlweni ka Yehovha. Va titsona swakudya hi siku lero, va ku: “Hi dyohele Yehovha!” Kutani Samiele a avanyisa vana va Israele eMispa.

⁷Vafilista, kuteloko va twile leswaku vana va Israele a va hlengeletanile eMispa, tindhuna ta Vafilista ti tlhandluka ku ya lwa na Israele; vana va Israele va swi twa kutani va chava emahlweni ka Vafilista.

⁸Kavaloko vana va Israele va byela Samiele, va ku: “U nga tshiki ku hi khongelela ka Yehovha, Xikwembu xa hina, leswaku a hi ponisa emavokweni ya Vafilista.”

⁹Kutani Samiele a teka xinyimpfana lexi an'waka, a xi humesela Yehovha hinkwaxo, yi va holokosta eka yena; kavaloko Samiele a khongelela Israele eka Yehovha, kutani Yehovha a n'wi hlamula.

¹⁰Kakuloko Samiele a ha humesa holokosta, Vafilista va tshinela ku ta lwa na Israele. Kambe Yehovha a pfumisa tilo hi matimba ehenhla ka Vafilista, a va pfilunganya, kutani va hluriwa emahlweni ka Israele.

¹¹Va ka Israele va huma eMispa, va hlongorisa Vafilista, kutani va va hlasela ku ya fika ehansi ka Beta-Kara.

¹²Kutani Samiele a teka ribye, a ri yimisa exikarhi ka Mispa na Yexana, a ri thya vito ra Ebenezere (ribye ra ku pfuna), kutani a ku: “Yehovha u hi pfunile ku fika kwala.”

¹³Sweswo Vafilista va tsongahatiwa, kutani a va ha nghenanga etikweni ra Israele kambe voko ra Yehovha ri va henhla ka Vafilista hi masiku hinkwawo ya Samiele.

¹⁴Loko yi ri miti leyi Vafilista va yi tekeke ka Israele, yi tlhelele ka Israele, ku suka eEkroni, ku fika eGati, kutani Israele a tshunxa matikwana ya kona emavokweni ya Vafilista. Kambe ku rhula ku va kona exikarhi ka Vaisraele ni Vaamori.

¹⁵Samiele a avanyisela Israele masiku hinkwawo ya ku hanyaka yena.

¹⁶Lembe rin'wana ni rin'wana a a suka, a ya rhendzeleka hi Betele, na Giligala, na Mispa, a avanyisela Israele emitini hinkwayo leyi.

¹⁷Kutani a vuyela Rhama, hikuva yindlu ya yena a yi ri kona; hi kona kambe a tshamaka a avanyisela Israele; kutani a akela Yehovha alitari kona.