Read tsonga I Samuwele 8 Bible Online

I Samuwele 8 - tsonga bible

I Samuwele 8

¹Samiele, kuteloko a dyuharile, a veka vana va yena va va vaavanyisi va Israele.

²Vito ra n'wana wa wanuna wa yena wa mativula a a ri Yuwele, ni vito ra lowa vumbirhi a a ri Abiya: a va ri vaavanyisi eBerexeba.

³Kambe vana va yena a va fambanga etindleleni ta yena, va hambuka hi ku navela mali, a va amukela ni tinyiko, va voyamisa ku lulama.

⁴Kutani vakulukumba va Israele hinkwavo va hlengeletana, va ya ka Samiele eRhama, va ku eka yena:

⁵“Waswivo, u dyuharile, kutani vana va wena a va fambi etindleleni ta wena. Sweswi hi vekele hosi ku hi avanyisa, kukotisa ematikweni hinkwawo.”

⁶Mhaka leyi yi biha emahlweni ka Samiele, leswi va nga te: “Hi nyike hosi ku hi avanyisa.”

⁷Kavaloko Samiele a khongela Yehovha; kutani Yehovha a ku eka Samiele: “Yingisa rito ra tiko etimhakeni hinkwato leti va ku byelaka tona, hikuva a hi wena va ku tshikaka, kambe va tshika mina, leswaku ndzi nga tshuki ndzi va fuma.

⁸Va endla hilaha va endleke hakona ku suka siku leri ndzi va humeseke eEgipta, ku fika siku leri hilaha va ndzi tshikeke ku ya tirhela swikwembu swin'wana; va endlisa sweswo ni ka wena.

⁹Sweswi yingisa rito ra vona; ntsena u va laya swinene, u va tivisa milawu ya hosi leyi nga ta va fuma.”

¹⁰Samiele a byela marito walawo hinkwawo ya Yehovha eka tiko loko ri kombele hosi. A ku:

¹¹“Hi wona nawu wa hosi leyi nga ta mi fuma: U ta teka vana va n'wina, a va khandziyisa etigolonyini ta yena ni le tihancini ta yena, va ta tsutsuma emahlweni ka golonyi ya yena.

¹²U ta va veka tindhuna ta makume ya madzana, ni tindhuna ta ntlhanu wa makume va ta n'wi rimela, ni ku n'wi tshovelela, va ta n'wi fulela matlhari ya nyimpi ni mitirho ya tigolonyi ta yena.

¹³U ta teka vana va n'wina va vanhwana va va vahlanganisi va mirhi ya risuna ni vasweki, ni vapfuvi va swinkwa.

¹⁴U ta teka masimu ya n'wina, ni tivhinya ta n'wina ni mitlhwari leyinene ya n'wina, a swi nyika malandza ya yena.

¹⁵U ta teka ku avanyisa ka khume ka timbewu ta n'wina ni ka vhinyo ya n'wina a swi nyika malandza ya yena swa vatsheniwa, ni makhumbi ya yena.

¹⁶U ta teka malandza ya n'wina ya vavanuna ni ya vavasati, ni majaha ya n'wina ya timburi, ni timbhongolo ta n'wina, a swi tirhisa emitirhweni ya yena.

¹⁷U ta teka ku avanyisa ka khume ka mitlhambi ya n'wina kambe, na n'wina, mi ta va makhumbi ya yena.

¹⁸Mi ta huwelela hi siku lero hikwalaho ka hosi ya n'wina leyi mi nga ta tihlawulela yona, kambe hi siku lero, Yehovha a nga ka a nga mi hlamuli.”

¹⁹Tiko ri ala ku yingisa rito ra Samiele, kutani va ku:

²⁰“A hi swona kambe hosi yi ta va henhla ka hina na hina hi ta fana ni matiko hinkwawo: hosi ya hina yi ta hi avanyisa, yi ta huma emahlweni ka hina, yi ta tiyisa tinyimpi ta hina.”

²¹Kuteloko Samiele a yingisile marito walawo hinkwawo ya tiko, a ma vula etindleveni ta Yehovha.

²²Kutani Yehovha a ku eka Samiele: “Yingisa rito ra vona, u va vekela hosi.”

²³Kavaloko Samiele a byela Vaisraele, a ku: “Tlhelani un'wana ni un'wana emutini wa yena.”