Read tsotso LIRAANGA 11 Bible Online

LIRAANGA 11 - tsotso bible

LIRAANGA 11

¹Lukhuraanga lwene, vandu vu mu shivala shiosi valomolomanga lulomolomo lulala lwonyene, khandi varumishilanga makhuva malala mele.

²Lwa vali nivahamilanga ivukwi, vatukha mu lwomera luli mu shivala shia Babilonia; nivamenyayo.

³Vavoolelana vene, “Hambi hanu! Chendi khuloonje matofari khandi khukasambe.” Vali na matofari ku khumbashila nende ilaamu yu khukalomba kahambane halala.

⁴Vavoola, “Chendi khumbashe litaala likali nunundi nu munaara kutukhanga khu malesi, khu khwilombele lira lilahi khandi khuvuli khusalanyinywa shia havundu hosi khulilova.”

⁵Navutswa Mwami Nyasaye yikha hasi khulola litaala lienelo nende munaara kwa vandu vali nivumbakhanga.

⁶Mwami Nyasaye yavoola, “Loli, nu luhia lulala, khandi valomolomanga shilala; yili nalio liraanga lia vindu via vatsitsanga khukhola. Shindu shiosi shia valiitsa khuvoola venyanga khukhola, nashio shia valiitsa khukhola.

⁷Hambi khutsi hasi, khuvakoyanyinya mulilomoloma khu vavuli khuhulishitsana vene khuvene.”

⁸Nalwo lwa Mwami Nyasaye yavasalanyinya shia havundu hosi khulilova, nivalekha khumbakha litaala lienelo.

⁹Litaala lienelo liakulikhwa lira Babilonia, shichila naho havundu wu Mwami Nyasaye yakoyanyinya lulomolomo lwa vandu voosi khulilova; khandi naho ha havundu wu Mwami Nyasaye yavasalanyila shia havundu hosi khulilova.

¹⁰Yava navo vitsukhulu va Shemu. Lwa Shemu yali nali ni mihika imia indala, yivula mwana wi shiyayi walaangwangwa Arupakashadi, mihika nichiakhavira chivili matsi ki michelelo nikamali khuvwa.

¹¹Lwinyuma, Arupakashadi yamenya mihika chindi tsimia tsiranu; niyivula vaana vandi.

¹²Lwa Arupakashadi yali namali mihika makhomi kavaka na chiranu, yivula mwana wi shiyayi wakulikhwa Shela;

¹³niyakhivula lila Shela, yamenya mihika chindi tsimia tsine na chivaka; niyivula vaana vandi.

¹⁴Lwa Shela yali nali ni mihika makhomi kavaka, yivula mwana wi shiyayi, wa yakulikha lila Eberi;

¹⁵Shela niyakhivula Eberi, yamenya mihika chindi tsimia tsine na chivaka; niyivula vaana vandi.

¹⁶Lwa Eberi yali nali ni mihika makhomi kavaka na chine, yivula mwana wi shiyayi, wa yakulikha lila Pelegi;

¹⁷Eberi yamenya mihika chindi tsimia tsine na makhomi kavaka; niyivula vaana vandi.

¹⁸Lwa Pelegi yali namali mihika makhomi kavaka, yivula mwana wi shiyayi, wa yakulikha lira Rehu;

¹⁹Pelegi niyakhivula Rehu, yamenya mihika chindi tsimia tsivili na tisa; niyivula vaana vandi.

²⁰Lwa Rehu yali nali ni mihika makhomi kavaka na chivili, yivula mwana wi shiyayi, wa yakulikha lira Serugi;

²¹lwinyuma, Rehu yamenya mihika chindi tsimia tsivili na saba; niyivula vaana vandi.

²²Lwa Serugi yali nali ni mihika makhomi kavaka, yivula mwana wi shiyayi, wa yakulikha lira Nahori;

²³lwinyuma, Serugi yamenya mihika chindi tsimia tsivili; niyivula vaana vandi.

²⁴Lwa Nahori yali nali ni mihika makhomi kavili na tisa; niyivula mwana wi shiyayi, wa yakulikha lira Tera;

²⁵lwinyuma, Nahori yamenya mihika chindi imia indala likhomi na tisa; niyivula vaana vandi.

²⁶Lwa Tera yali nali ni mihika makhomi saba, yivula Aburahamu, Nahori nende Harani.

²⁷Yava navo vitsukhulu va Tera, wivula Abramu, Nahori nende Harani. Harani yivula Loti.

²⁸Harani yakhutsila mu litaala lingo wavo, lialaangwangwa Uri lili Babilonia, tata wewe nashili mwoyo.

²⁹Abramu yahila Sarai, khandi Nahori nahila Milika, mwana wi shikhana wa Harani, nali khandi tata wa Isaka.

³⁰Sarai yali mukhali mukuumba vuchila khwivulakhu mwana wosi.

³¹Tera yavukula mwana wewe wi shiyayi Abramu, mwana wa amwavo Abramu walaangwangwa Loti, mwana wa Harani, khandi Sarai, wali mukhali wa Abramu, nivatsia navo mu litaala lia Uri lili Babilonia, khutsia mu shivala shia Kanaani. Vasimukha nivatukha mu litaala lia Harani khandi nivamenyaho.

³²Tera yakhutsilayo nali ni mihika tsimia tsivili na chiranu.