Read tsotso LIRAANGA 25 Bible Online

LIRAANGA 25 - tsotso bible

LIRAANGA 25

¹Aburahamu yahila mukhali wundi walaangwangwa Ketura.

²Vaana va Ketura yivula khu Aburahamu ni Zimurani, Yokushani, Medani, Midiani Ishubaka, nende Shuha.

³Yokushani yivula Sheba nende Dedani. Vitsukhulu va Dedani varulanga mu vandu vi tsimbia tsia Ashurimu, Letushimu nende Lehumimu.

⁴Vaana va Midiani yivula ni Efa, Eferi, Hanoku, Abida, nende Eluda. Vandu venavo voosi navo vali vitsukhulu va Ketura.

⁵Aburahamu yarichila Isaka miandu chiechie chiosi;

⁶navutswa Aburahamu nashili mwoyo, yatuuchila vihanwa vaana va yali niyivula khu vakhali vamenyinywa. Aburahamu yakhunga vaana venavo, nivatsia mu shivala shili ivukwi, khumenya ihale wene khurula khu mwana wewe Isaka.

⁷Aburahamu yamenya mihika chiosi imia indala makhomi saba na karanu.

⁸Aburahamu yakhutsa niyahindila, mundu wasakhula khandi wali niyamenya khumihika minyishi; mmbili kwekwe kwayeveelwa mu vandu veve.

⁹Vaana veve Isaka nende Ishimaeli, vayeveela mmbili kwekwe muluhangaywa luli Makepela, mu mulimi khuluveka luli ivukwi wa Mamure; nakwo kwali mulimi ku mwana wa Zohari wali Muhitse walaangwangwa Efuroni.

¹⁰Nakwo mulimi kwa Aburahamu, yali niyakuula khurula khu Vaahitse. Namwo mivili chia Aburahamu nende chiayeveelwa mukhali wewe Sara.

¹¹Lwa Aburahamu yali niyakhutsa, Nyasaye yakasitsa mwana wewe Isaka, wamenyanga himbi ha shisima shialaangwangwa Beheri-lahai-roi.

¹²Vitsukhulu va Ishimaeli mwana wa Aburahamu, wa Hagari wali Mumisri, murukwa wa Sara, yivula khu Aburahamu.

¹³Mira ka vaana va Ishimaeli, khulondokhana khuli lwa vivulwa: mwana mukhulundu yali Nebahotsi, wa khavili ni Kedari, wa khavaka ni Adibeli, wa khane ni Mibisamu,

¹⁴wa kharanu ni Mishuma, wa sita ni Duma, wa saba ni Masa,

¹⁵wa munane ni Hadadi, wa tisa ni Tema, wi likhomi ni Yeturu, wi likhomi na mulala ni Nafishi, khandi wu khumalilikha ni Kedema.

¹⁶Yava navo vali vaana va Ishimaeli, khandi yaka nako mira ka vamihi vi tsimbia likhomi na tsivili, khulondokhana khu michitsi chiavo nende havundu ha vamenyanga mu maheemo, ka vali nivasimiikha.

¹⁷Ishimaeli yakhutsa nali ni mihika imia indala na makhomi kavaka na saba.

¹⁸Vitsukhulu va Ishimaeli vamenyanga mu lusomo luli hakari ha mataala ka Havila nende Shuri, khuluveka luli ivukwi wi shivala shia Misri nutsitsanga Ashuria. Vamenya ihale wene khurula khu vitsukhulu vandi va Aburahamu

¹⁹Yaka nako mira ka vitsukhulu va Isaka, mwana wa Aburahamu; Aburahamu neye wivula Isaka.

²⁰Isaka yali nali ni mihika makhomi kane, lwa yahila Rebeka, mwana wa Betsweli, wali Muaramu mu shivala shia Mesopotamia. Rebeka neye wali mbotso Labani.

²¹Isaka yasaala khu Mwami Nyasaye, shichila mukhali wewe, khuvela yali mukuumba. Mwami Nyasaye yahulila lisaala lielie, mukhali wewe navelekha mwana.

²²Rebeka yihulila atsitsanga khwivula vaana makhwane, khandi nivashili khwivulwa, vaana venavo vakwanakana munda mwemwe. Rebeka navoola, “Shichila shina makhuva khuli yaka kikholekhanga khwinzi?” Rebeka yasimukha, natsia khureeva Mwami Nyasaye shivune shia makhuva kenako.

²³Mwami Nyasaye yavoolela Rebeka, “Makhwane ka uliitsa khwivula kaliitsa khuva tsimbia tsivili; vandu vavili venavo valiitsa khwavukhana. Mulala aliitsa khuva ni tsingulu khuvira wundi; Mwana mukhulundu aliitsa khuva murumishi wu mwana mushie.”

²⁴Lwa Rebeka yali niyakhatushitsa matukhu keke ku khwivula, katoto kalolekha ni makhwane.

²⁵Mwana mukhulundu yali mumuuchihilu, khandi yali na maswa khu mmbili kwekwe kwosi; nakulikhwa lira Esau.

²⁶Mwana mushie yivulwa nakumile vutinyu khundecheye ya Esau; nakulikhwa lira Yakobo. Isaka yali nali ni mihika makhomi sita lwa Rebeka yivula vaana venavo.

²⁷Lwa vaana vi shiyayi venavo vavilukha mu mmbili, Esau yalolekha khuva mundu wechela khuhiitsa, mundu wayaanza khuchenda chenda mumbulimu; navutswa Yakobo yali muhonjelu wahonganga hango.

²⁸Isaka yali wayaanza muno Esau, shichila yali wayaanza khulia tsinyama tsia Esau yarulitsanga muluhiitsi; navutswa Rebeka yali wayaanza muno Yakobo.

²⁹Litukhu lindi, lwa Yakobo yali nateekhanga shitieni, Esau yinjilamu narula khuhiitsa, navwele tsingulu.

³⁰Yavoolela Yakobo, “Mbwele tsingulu; mbekhu shitieni yeshio.” (Nashio shivune shiachila nalaangwa Edomu.)

³¹Yakobo yavoolela Esau, “Nakhuha niiva uliitsa khundichila vunyali vu mwana mukhulundu anyolanga.”

³²Esau yavoolela Yakobo, “Nu vulahi muno! Khali ndi himbi khukhutsa. Miandu chianyola khuli mwana mukhulundu nichikhonye shina?”

³³Navutswa Yakobo yavoolela Esau, “Raanga unzisuuhili khwinzi! Khulwa yako, yisuuha khuye, nakuulitsila Yakobo vunyali vwevwe, vwa mwana mukhulundu anyolanga.” Esau yisuuha naha Yakobo vunyali vwevwe, vu mwana mukhulundu.

³⁴Nalwo lwa Yakobo yamuha mukati nende shitieni. Esau yalia khandi nang'wa, narulaho khuli yenyi. Nindi khuli Esau yachaya vunyali vu mwana mukhulundu anyolanga.