Read tsotso LIRAANGA 40 Bible Online

LIRAANGA 40 - tsotso bible

LIRAANGA 40

¹Matukhu mati nikakhavira, murumishi wahaananga idivai khu Mwami wa Misri nende mwimilili wa vandu vakandanga mikati vakholela Mwami wa Misri vindu vitamanu.

²Mwami wa Misri yali nu vurima khu vandu vavili venavo,

³navavoha mucheela mu inzu yu mwimilili wimililanga valindi vi inzu yu vwami, mucheela indala yene ya Yosefu yali niyavohwamu.

⁴Vamala matukhu manyishi mucheela, ma mwimilili wimililanga valindi vi inzu yu vwami naha Yosefu vunyali vu khusinjilila vavohe.

⁵Vutukhu vundi, murumishi wahaananga idivai nende mwimilili wa vandu vakandanga mikati vali nivali mucheela valoora malooro, shia mulala malooro keke. Malooro kenako kali ni livoola lukanu.

⁶Lwa Yosefu yitsa khuvalola mu mavwevwe, yavalola khuli vanyakhane.

⁷Yosefu yavareeva, “Shichila shina muvelele mu mwoyo nunundi?”

⁸Vamuchipa, “Shia mulala khu khutsi aloori malooro, khandi mundu avulakhuho unyala khukhuvoolela shia kavoolanga.” Yosefu yavavoolela, “Nyasaye neye uhaananga vunyali vu khwivaala shia malooro kavoolanga. Khamboleli malooro kenyu kamuloori.”

⁹Murumishi wahaananga idivai khu Mwami wa Misri yavoola “Ndoli mu malooro kaanje musala ku musabibu imbeli wanje

¹⁰nu kuli ni tsisia tsivaka. Lwa masambu kameela, matunda kalolekha ni kaseevukhanga khandi matunda ki misabibu nikenga.

¹¹Nali ningumile mu mukhono kwanje shikombe shiu Mwami wa Misri. Navukula matunda ki misabibu niminila mu shikombe khandi nimuha shikombe shienesho.”

¹²Yosefu yamuvoolela, “Yaka nako ka malooro kenako kavoolanga: Tsisia tsivaka nako matukhu kavaka.

¹³Mwami wa Misri aliitsa khukhuvoholola mumatukhu kavaka, akhusamehe nu khukhukalushitsa khu muhinzilu kwokwo kwa wakholanga. Uliitsa khumuha shikombe shieshie, khuli lwa wamuheetsanga khale lwa wali nuli murumishi wewe wamuheetsanga idivai.

¹⁴Navutswa nuyaanza unzitsushitse, lwa vindu viosi viliitsa khuva vilahi khu yivi, khandi nuyaanza nyanzila uralekhu lira lianje khu Mwami wa Misri, khandi ukhonye khurula mucheela yumu.

¹⁵Khali ndio, nakumilwa ni tsingulu mu shivala shia Vahebrania, khali khandi hanu mu shivala shia Misri mbulakhu shindu shia nali nikholi shinyala khuchila mbohwi mucheela.”

¹⁶Lwa mwimilili wa vandu vakandanga mikati yalola ndi livoola lia malooro ku murumishi wahaananga idivai ni lilahi, yavoolela Yosefu, “Khali inzi khandi naloora malooro. Nali ninjinji khu murwi kwanje mihinda chivaka chi mikati.

¹⁷Khwali ni viukhulia mu muhinda ikulu viakandwa lukanu lundi viu Mwami wa Misri, navutswa manyonyi kavivootselanga mu muhinda kwa nali ninjinji khu murwi kwanje.”

¹⁸Yosefu yamuvoolela, “Yaka nako ka malooro kenako kavoolanga: Mihinda chivaka nako matukhu kavaka.

¹⁹Mwami wa Misri aliitsa khukhuvoholola mumatukhu kavaka nikashili khuvira, khandi ahaane lilako liu khukutula murwi kwokwo! Aliitsa khusunga mmbili kwokwo khu musala, khandi manyonyi nikavootse mmbili kwenoko.”

²⁰Matukhu kavaka nikakhavira, Mwami wa Misri yalombela varumishi veve muhikha kwi lilia khulitukhu liu khwitsushitsa khwivulwa khwekwe mwene. Yavoholola murumishi wewe wamuheetsanga idivai nende mwimilili wewe wa vandu vakandanga mikati navalera imbeli wa varumishi veve.

²¹Mwami wa Misri yakalushitsa murumishi wamuheetsanga idivai khu muhinzilu kwekwe kwa yakholanga,

²²navutswa yiira mwimilili wa vandu vakandanga mikati. Kosi kakholekha vutswa khuli Yosefu yali niyavavoolela.

²³Nikhali, murumishi wahaananga idivai khu Mwami wa Misri, shiyitsushitsakhu shindu shiosi khu Yosefu tawe; yamwivilila.