Read tsotso LIRAANGA 43 Bible Online

LIRAANGA 43 - tsotso bible

LIRAANGA 43

¹Mumatukhu kenako, inzala indulu yene yali mu shivala shia Kanaani.

²Lwa vandu vi inzu ya Yakobo vali nivamali khulia shiukhulia shiosi, shia vali nivakuula mu shivala shia Misri, tata wavo Yakobo yavoolela vaana veve vi shiyayi, “Kalushi khandi mu shivala shienesho; khukhukuulila shiukhulia shindi.”

³Navutswa Yuda yamuvoolela, “Mundu woyo yakhuchelihitsa, navoola, ‘Shiumutsitsanga khuhuchililwa khundolakhu, amwavo wenyu nashili khwitsa khwinzi tawe.’

⁴Niiva utsitsanga khukhuruma na amwavo weru, khulatsia khukhukuulila shiukhulia.

⁵Navutswa niiva unyala khwambakhana khumuruma na khutsi, khunyala khulekha khutsia, shichila mundu mwenoyo yakhuvoolela ndi shiukhutsitsanga khuhuchililwa khumulola, amwavo weru nakhatsiliyo na khutsi tawe.”

⁶Yakobo yareeva, “Shichila shina mundele mu matiinyu, lwa mumali khuvoolela mundu mwenoyo ndi muli na amwavo wundi?”

⁷Vamuvoolela, “Mundu mwenoyo yakhureevishitsa mareevo khulondokhana khu khutsi vene, halala na vandu vi inzu yeru. Yakhureeva, ‘Tata wenyu anyala khuva ashili mwoyo? Mulikhu na amwavo wundi?’ Khwamuchipa mareevo ka yali nakhureevi. Shiukhwali nu khumanyi anyala khuvoola, ‘Tsi munderele amwavo wenyu,’ tawe.”

⁸Yuda yavoolela tata wewe, “Nduma nu mwana wi shiyayi uyu, khulu khutsia vwangu; na khutsi khutsililile khuva mwoyo -- yivi, khutsi nende vaana veru vatititi.

⁹Inzi mwene mali khwirulitsa khusinjilila vulamu vwevwe. Ulambukula vutamanu, niiva shindu shitamanu shinyala khwikholekha khuye. Niiva nyala khuvula khumukalushitsa khu yivi nashili mulamu, ninzi wamutsitsanga khuvukula mutamanu khumatukhu koosi.

¹⁰Niiva khwakhavuli khumala vwiyangu yuvu, khwakhakalushiyo nunundi khandi hali khavili.”

¹¹Nalwo lwa Tata wavo yavavoolela, “Niiva kalikholekha kario, khutukha uvukule mu misiko chienyu viraakwa vilahi via mwachesa mu milimi chienyu, khuli vihanwa viamuha gavana. Muliitsa khumuha makura malahi, vushi, vindu vihuunyanga mwayu mulahi khandi myri, munasi kulaangwangwa Pistachio nende alumondi.

¹²Vukuli hali khavili tsisenti, shichila mutsitsanga khukalushitsa tsisenti tsia mwali nu mwanyola mu misiko chienyu. Haundi, vitsukhana nivarelemu.

¹³Vukuli khandi amwavo wenyu, mukalushi khulola gavana vwangu.

¹⁴Nyasaye Uli Ikulu khu Viosi akhole mundu mwenoyo khumulola tsimbavasi, khulu khumuha khandi Benyamini, halala na amwavo wenyu wundi woyo. Navutswa khulwanje, khali niiva nakhutsilwa vaana vaanje, nu vulahi khukhutsilwa.”

¹⁵Vamwavo venavo vavukula vihanwa nende tsisenti hali khavili mu vunyishi, nivatsia mu shivala shia Misri, nivali halala na Benyamini. Vimanyinya vene khu Yosefu mu shivala shienesho.

¹⁶Lwa Yosefu yalola Benyamini nali navo, yavoolela murumishi wasinjililanga inzu yeye, “Hila vandu yava mu inzu yanje. Sinza muruku, khandi ulombe shiukhulia shia halukolovo; shichila vatsitsanga khulia ninzi shiukhulia shiu mbasu.”

¹⁷Murumishi mwenoyo yakhola khuli yavoolelwa; nahila vamwavo venavo mu inzu ya Yosefu.

¹⁸Vamwavo venavo varia, lwa vali nivahilwangwa mu inzu ya Yosefu. Vamanya nivavoola, “Khumali khwinjilitswa munu, shichila tsisenti tsiali ni tsiavikhwa mu makunia keru mumatukhu ku khuraanga. Yenyanga khukhukwana vwangu, avukule tsipunda tsieru khandi akhukhole khuva varukwa veve.”

¹⁹Khulwa yako, vasimukha nivatsia khu murumishi wa Yosefu, nivalomoloma naye ha muliango kwi inzu.

²⁰Vamuvoolela, “Yivi mwami, khwitsa hanu lukhuraanga khukuula shiukhulia.

²¹Navutswa lwa khwatukha havundu ha khwenyanga khukona tsindolo, khwikula mu makunia keru, khandi shia mulala khu khutsi nanyola mu likunia lielie ikulu tsisenti tsindala tsiele tsia yali niyarunga. Khumali khukalukha ni tsisenti tsienetso,

²²khandi khwitsi ni tsisenti tsindi, tsia khunyala khurumishila khukuula shiukhulia shindi shinyishi. Khushili khumanyakhu mundu wavikha tsisenti tsienetso mu makunia keru.”

²³Murumishi mwenoyo yavoola “Muvuli khuheendakhu mwoyo. Leshi khuria. Nyasaye wenyu, uli Nyasaye wa tata wenyu, anyala khuva neye wavikha tsisenti tsienetso mu makunia kenyu shichila munyi. Inzi mwene neye wanyola tsisenti tsia mwarunga.” Nalwo lwa yavalerela Simioni.

²⁴Murumishi mwenoyo yavukula vamwavo venavo, navahila munzu. Yavaha matsi ku khusava vilenje viavo, niyayitsa tsipunda tsiavo.

²⁵Varecheshitsa vihanwa viavo viu khuhaana khu Yosefu lwachelela halukolovo, shichila vali nivamali khuvoolelwa vatsitsanga khulia shiukhulia naye.

²⁶Lwa Yosefu yali niyakhatukha hango, vinjilitsa munzu vihanwa via vali nivaleri, nivamwinamila.

²⁷Yosefu yavareeva khuli lwa vatsilililanga mu limenya, navoola, “Mwambolela makhuva khulondokhana khu tata wenyu wasakhula -- anyala khuva nu mulamu? Anyala khuva ashili mwoyo?”

²⁸Vamuvoolela, “Tata weru, uli murumishi wowo mwichehitsi, ashili mwoyo khandi nu mulamu.” Vasikama, nivamwinamila.

²⁹Lwa Yosefu yalola amwavo wewe Benyamini, yavareeva, “Uyu neye amwavo wenyu mushie, wa mwambolela makhuva khulondokhana khuye? Yivi mwana wanje, Nyasaye akhulolele tsimbavasi.”

³⁰Yosefu yakhola vwangu narulaho, shichila yihulila vulahi mu mwoyo khulondokhana khu amwavo wewe, nakhava havundu hanyala khulilila. Yinjila munzu mwemwe, naraanga khulilamu.

³¹Lwa Yosefu yali niyakhasava mumoni mwemwe na matsi, yarula havundu henaho; khandi mukhwitinyinya mwene, yahaana lilako ndi shiukhulia shihaanwi.

³²Yosefu yaheelwa shiukhulia khu imesa yeye mwene, vamwavo veve khu imesa yindi vutswa. Vamisri valiho nivaliitsanga shiukhulia, vaheelwa imesa yavo vene, shichila Vamisri valolanga nu muchilo khulia na Vahebrania.

³³Vamwavo venavo vikhalitswa khuluveka lundi, nivaheenzanga Yosefu, khulondokhana khumihika chiavo khuraanjila khu mukhulundu khutukha khu mushie. Lwa valola khuli lwa vali nivamali khwikhalitswa, vaheenzana vene khuvene nivali nilichenya.

³⁴Vaheelwa shiukhulia shiarulanga khu imesa ya Yosefu, na Benyamini naheelwa hali kharanu shiukhulia shinyishi khuvira vandi voosi. Valia nivang'wa na Yosefu khutukha nivikura.