Read tsotso LIRAANGA 50 Bible Online

LIRAANGA 50 - tsotso bible

LIRAANGA 50

¹Yosefu yisuunda himbi khu tata wewe, nalila khandi namukhumbelela.

²Nalwo lwa Yosefu yahaana lilako khu varumishi veve vashilishi, khushilikha mmbili kwa tata wewe. Vashilishi venavo vashilikha mmbili kwa Yakobo;

³khushilikha mmbili kwenoko khwavukula matukhu makhomi kane, nikali matukhu katoto ka mmbili kushilikhwangwa. Vamisri vikhula Yakobo khumatukhu makhomi saba.

⁴Lwa matukhu ku khumwikhula kali nikakhavira, Yosefu yavoolela vandu vu munzu mu Mwami wa Misri, “Numuyaanza vooleli Mwami wa Misri likhuva yili,

⁵‘Lwa tata wanje yali nali himbi khukhutsa, ya nzisuuhitsa ni liyeveela mmbili kwekwe mu shilindwa shia yali niyayeeva mu shivala shia Kanaani. Nuyaanza mbuchilila nzi khuyeveela mmbili kwa tata wanje. Nimali khukuyeveela, nakalukha.’ ”

⁶Mwami wa Misri yamuvoolela, “Simukha utsi khuyeveela mmbili kwa tata wowo, khuli wali nu walaaka uliitsa khukhola.”

⁷Khulwa yako, Yosefu yasimukha natsia khuyeveela mmbili kwa tata wewe mu shilindwa. Yasimukha natsia na varumishi voosi vu Mwami wa Misri, vimilili vimililanga vandu vi inzu yeye, nende vimilili voosi vu mu shivala shia Misri.

⁸Vandu vi inzu ya Yosefu, vamwavo veve nende valala khu vandu khurula mu inzu ya tata wewe vatsia naye. Vaana vavo vonyene navo varikala mu lusomo lwa Gosheni, khali makondi kavo, tsimbuli tsiavo, nende tsing'ombe tsiavo.

⁹Vandu va makaare ki liihe nende vi tsifarasi vasimukha nivatsia naye. Vali shituma shia vandu vanyishi.

¹⁰Lwa vakhatukha havundu ha vilulilanga inganu halaangwangwa Atadi, khuluveka luli ivukwi wu Muchela kwa Yorodani, vikhula nivalila tsikhwili khu tsisaa tsinyishi. Yosefu yakholayo khumatukhu saba milukha chiu khwikhula tata wewe.

¹¹Lwa Vakanaani vamenyayo valola vandu nivikhulilanga havundu ha vilulilanga inganu halaangwangwa Atadi, vavoola, “Vamisri vikhulanga nu vuveleli vunyishi mu mioyo.” Nako kachila havundu henaho nakulikhwa lira Abeli Mizirahimu. [4] Havundu henaho hali khuluveka luli ivukwi wu Muchela kwa Yorodani.

¹²Khulwa yako, vaana va Yakobo vakhola khuli tata wavo yali ni yavavoolela vakhole.

¹³Vachinga mmbili kwa tata wavo nivakuhila mu shivala shia Kanaani, nivakuyeveela muluhangaywa luli havundu halaangwangwa Makapela, khuluveka luli ivukwi wa Mamure, nu kuli mulimi kwa Aburahamu yali niyakuula khurula khu Afuroni wali Muhitse khuva havundu ha vayeveela mivili chia vandu vakhutsa vavo.

¹⁴Lwa Yosefu yali namali khuyeveela mmbili kwa tata wewe mu shilindwa, yakalukha mu shivala shia Misri, halala na vamwavo veve nende yavo voosi vali nivatsia naye khuyeveela mmbili kwa tata wewe.

¹⁵Lwa vamwavo va Yosefu valola ndi tata wavo umali khukhutsa, vavoola, “Nikave karina nikava Yosefu wakhuvishila liikha liu khuvanzila vutamanu vwa khwamukholela?”

¹⁶Khulwa yako, varumana likhuva khu Yosefu, nivavoola, “Tata wowo yalekha likhuva yili nashili khukhutsa,

¹⁷‘Yakhuvoolela khukhuvoolele yivi Yosefu, Nuyaanza ukhusemehe khutsi vamwavo vovo vutamanu vweru vwa vakhukholela, nu khwenya khukhusalilitsa.’ Nuyaanza ukhusemehe nunundi vutamanu vwa khutsi, varumishi va Nyasaye wa tata wowo khwakhola.” Yosefu yalila lwa vamuvoolela makhuva kenako.

¹⁸Khali vamwavo veve varaanga khulila, nivakwa hasi hehe; nivavoola, “Khuli hanu khuli varukwa vovo.”

¹⁹Navutswa Yosefu yavoolela vamwavo veve, “Muvuli khuria! Mbulakhu vunyali vu khuvukula vwiyangu vwa Nyasaye.

²⁰Mwanganakanila vutamanu, navutswa Nyasaye yakalukhanyinya nikava malahi, khwenya khuhonyinya vandu vanyishi, khuli akholanga nunundi.

²¹Khulwa yako, muvuli khuria. Inzi mwene nzitsanga khumuha munyi nende vaana venyu, shia shindu shiosi shia mwenyanga.” Yosefu yavasuuvilitsa, khandi nalomoloma khuvo nu mwoyo mulahi.

²²Yosefu yatsililila khumenya mu shivala shia Misri, halala na vandu vi inzu ya tata wewe. Yosefu yali watushitsa mihika imia indala ni likhomi.

²³Yosefu yalola vaana va Efurahimu vi likhula lia khavaka. Khali vaana va Makiri mwana wali wa Manaase vavikhwa mumakulu ka Yosefu nivakhivulwa.

²⁴Nalwo lwa Yosefu yavoolela vamwavo veve, “Ndi himbi khukhutsa; navutswa ni kilikali, Nyasaye aliitsa khumukhonya, nu khumurulitsa mu shivala yishi khumuhila mu shivala shia yisuuhitsila Aburahamu, Isaka, nende Yakobo.”

²⁵Khulwa yako, Yosefu yachila Vaisraeli nivisuuha, “Lwa Nyasaye aliitsa khwitsa khumukhonya, muliitsa khurulitsa mmbili kwanje mu shivala shinu.”

²⁶Yosefu yakhutsila mu shivala shia Misri, nali ni mihika imia indala ni likhomi. Vashilikha mmbili kwa Yosefu nivakuvikha mu lisanduku liu mukhutsu.