Read tsotso LIRAANGA 7 Bible Online

LIRAANGA 7 - tsotso bible

LIRAANGA 7

¹Mwami Nyasaye yavoolela Nuhu, “Tsia winjile mu liaro, yivi nende vandu vi inzu yoyo yosi; shichila mali khunyola, nivi vutswa wonyene wi likhola liu vulunji imbeli wanje mulikhula linu.

²Vukula tsinyama saba hali saba shia ikavila tsivulakhu imbala yosi, tsinyama tsisatsa nende tsikhali, khandi vukula tsinyama tsivili hali khavili tsindamanu shia tsinyama tsindamanu, isatsa nende ikhali yayo.

³Vakula khandi manyonyi saba mu shia manyonyi lukanu na lukanu, lisatsa nende likhali, khulomba manyonyi manyishi lukanu, katsililile khumenya mu shivala.

⁴Matukhu saba khurula nunundi, nzitsanga khulera imbula iliitsa khukhuva khumatukhu makhomi kane, mbasu nu vutukhu, khwononyinya vilombe viosi vili mwoyo via nalomba.”

⁵Nuhu yakhola shia shindu shiosi shiu Mwami Nyasaye, yali navooli akhole.

⁶Nuhu yali nali ni mihika tsimia sita, lwa michelelo chia matsi chitsa khulilova.

⁷Nuhu nu mukhali wewe, vaana vi shiyayi veve nende vakhali vavo, vinjila mu liaro khu michelelo chia matsi chivuli khuvamala.

⁸Shia inyama isatsa nende ikhali khurula khu tsinyama lukanu na lukanu halala ni linyonyi, ive indahi khulondokhana khu mulukha inoho indamanu,

⁹tsinjila mu liaro nende Nuhu, khuli Nyasaye yali namuvoolele.

¹⁰Matukhu saba nikakhavira, michelelo chia matsi chitsa.

¹¹Lwa Nuhu yali nali ni mihika tsimia sita, khulitukhu li likhomi na saba liu mweli wa khavili, virula viosi via matsi mwilova vikukha, vilivwa viosi vi michelelo via matsi vikukha mu malesi;

¹²khandi imbula nikhuva mu shivala khu matukhu makhomi kane, mbasu nu vutukhu.

¹³Khulitukhu lilala lienelo, Nuhu nende mukhali wewe, na vaana vavo vavaka vi shiyayi nende vakhali vavo, vinjila mu liaro.

¹⁴Vinjilamu na shia inyama yumbulimu lukanu na lukanu khulondokhana khukavila yayo, miruku chiosi chiu khuvaaya khulondokhana khu tsikavila chiatsio, shia shilombe shimolanga hasi khulondokhana khukavila yashio, khandi shia linyonyi khulondokhana khukavila yalio, shia shilombe shiosi shili ni tsimbaha.

¹⁵Shia shilombe shili mwoyo, shisatsa nende shikhali lukanu na lukanu vinjila mu liaro nende Nuhu,

¹⁶khuli Nyasaye yali namuvoolele; khandi Mwami Nyasaye namwikalila mukari.

¹⁷Michelelo chia matsi chiatsililila khuvaho khumatukhu makhomi kane, khandi matsi nikava manyishi muno, khulomba liaro khwelema ikulu wa matsi.

¹⁸Matsi kitsula muno, ma liaro nilielema khwikulu khwa matsi.

¹⁹Matsi kitsula muno, khali nikakhunikha vikulu vikali viene;

²⁰matsi katsililila khwitsula muno khutukha lwa kakhunikha vikulu nikavivira tsimita saba.

²¹Vilombe viosi vili mwoyo khulilova viakhutsa -- shia linyonyi, shia inyama, khandi shia mundu wosi.

²²Shia shindu shiosi shili nu vulamu shiakhutsa.

²³Mwami yiira vilombe vili mwoyo viosi mu shivala -- vandu, tsinyama, na manyonyi. Vandu vayarika vonyene vali Nuhu nende yavo vali nivali naye mu liaro.

²⁴Matsi karemeela khulilova khumatukhu imia indala na makhomi karanu.