Read tsotso 1 VAMI 11 Bible Online

1 VAMI 11 - tsotso bible

1 VAMI 11

¹Solomoni yali wayaanza vakhali vanyishi vi tsimbia tsinjeni, halala nu mwana wi shikhana wu Mwami wa Misri, Vamoabu, Vamoni, Vaedomu, Vasidoni, nende Vahiti.

²Solomoni yavahila khuva vakhali veve, khali niiva Mwami Nyasaye yali wakaya Vaisraeli vavuli khuhilana na vandu venavo, shichila valiitsa khuchila Vaisraeli vasaale khu vanyasaye vandi.

³Solomoni yahila vakhali tsimia saba varulanga mu tsinzu tsia vami, khandi nava na vakhali vamenyinywa tsimia tsivaka. Vakhali venavo vamwikalila khusaala khu Nyasaye.

⁴Mumatukhu ka Solomoni yali niyasakhula, vakhali veve vachila nasaala khu vanyasaye vandi. Shiyali musuuvilwa khu Mwami Nyasaye, uli Nyasaye wewe, khuli tata wewe yavetsanga tawe.

⁵Solomoni yasaala khu nyasaye wi shikhali Ashitarotsi wa Sidoni, nende Moleki nyasaye wi tsisoni wa Vaamoni.

⁶Solomoni yakhola vwoni imbeli wu Mwami Nyasaye, niyambakhana khulonda nu mwoyo kwosi malako keke, khuli tata wewe Daudi yakholanga.

⁷Yumbakha havundu hanyala khusaala khu Chemoshi, nyasaye wi tsisoni wa Moabu, khandi havundu hanyala khusaala khu Moleki, nyasaye wi tsisoni wa Vaamoni, khu shikulu khuluveka luli ivukwi wa Yerusalemu.

⁸Yakholela vakhali veve vi tsimbia tsindi voosi malala mele, vasambanga vubani khandi nivakholela vanyasaye vavo misango.

⁹Nalwo lwa Mwami Nyasaye yalolela vurima Solomoni, shichila yambakhana khulonda malako ku Mwami Nyasaye, uli Nyasaye wa Israeli, wali niyalolekhakhu khuye hali khavili.

¹⁰Khali niiva yali wakaya Solomoni avuli khusaala khu vanyasaye vandi, Solomoni yambakhana khulonda malako ku Mwami Nyasaye.

¹¹Mwami Nyasaye yavoolela Solomoni, “Khusuuvilitsanga toto ndi nzitsanga khurulitsa vwami khu yivi, niliha mulala khu varumishi vovo, shichila umeneche lilakano lianje lia nakhola nivi, khandi wambakhane khulonda malako kaanje.

¹²Navutswa khali ndio, shichila tata wowo Daudi, shinzitsanga khukhola kenako nushili mwoyo tawe, navutswa lwa mwana wowo aliitsa khuva niyamihanga.

¹³Nikhali, shinzitsanga khurulitsa khuye vwami vwosi tawe; navutswa niitsa khumurichila luhia lulala, shichila murumishi wanje Daudi, khandi shichila Yerusalemu, nilili litaala likali lia narovola khuva lianje mwene.”

¹⁴Nalwo lwa Mwami Nyasaye yachila Hadadi wali Muedomu, warulanga mu inzu yu vwami khuva mutsiku wu Mwami Solomoni.

¹⁵Lwa Daudi yali nali mu shivala shia Edomu, mwimilili wa vasikali Yohabu yatikulukha, natsia khuyeveela mu shilindwa mivili chia vandu vali niviirwa; niyiira shia mundu musatsa wosi mu shivala shia Edomu.

¹⁶Yohabu nende Vaisraeli voosi, vatsililila khumenyayo khumieli sita, khutukha lwa yamulula shia mundu musatsa wosi mu shivala shia Edomu.

¹⁷Navutswa Hadadi, wali nashili vutswa mwana wi shiyayi, yilukha natsia Misri nende valala khu varumishi Vaedomu vali va tata wewe.

¹⁸Varanga luchendo lwavo lu khurula Midiani, nivatsia mu litaala lia Parani. Vavukula vandu valala mu litaala lia Parani nivatsia mu shivala shia Misri, khulola Mwami wa Misri. Mwami wa Misri yaha Hadadi, inzu shiukhulia nende mulimi.

¹⁹Hadadi yayaanzitswa nu Mwami wa Misri, ma Mwami wa Misri namuveshela mukhwasi wewe, nali amwavo wu Muruchi wi shikhali Tahupenesi, khuva mukhali wa Hadadi.

²⁰Amwavo Tahupenesi yivula khuye mwana wi shiyayi walaangwangwa Genubatsi. Tahupenesi yamutushitsila mu inzu yu vwami. Genubatsi yamenyaho nende vaana vu Mwami wa Misri.

²¹Lwa Hadadi yahulila nali mu shivala shia Misri ndi Daudi umali khukhutsa, khandi mwimilili wa vasikali Yohabu wakhutsa, Hadadi yavoolela Mwami wa Misri, “Lekha nduli hanu, ngalushi mu shivala shianje shia nivulwamu.”

²²Navutswa Mwami wa Misri yamuvoolela, “Ni shina shia nambakhana khukhuha, shichilanga nu wenya khukalukha mu shivala shia wivulwamu?” Hadadi yachipa Mwami wa Misri, “Nuyaanza lekha nzi.”

²³Nyasaye yachila khandi mwana wa Eliada walaangwangwa Rezoni, khuva mutsiku wu Mwami Solomoni. Rezoni yali wayilukha khurula khu muruchi wewe, wali nali Mwami Hadadezeri wa Zoba;

²⁴yali wakwa mwimilili wi shituma shia vandu vahingani. (Yaka kikholekha lwa Daudi yali namali khukuura Mwami Hadadezeri, khandi namali khwiira vasikali va Vasiria vakhonyanga Mwami Hadadezeri.) Rezoni nende vandu veve vasimukha, nivatsia khumenya mu litaala lia Damasika, wa vandu veve vamwamihitsa khuva Mwami wa Siria.

²⁵Rezoni yali mutsiku wa Israeli, khumatukhu koosi ka Solomoni yali nashili mwoyo, khumeeta khu vutiinyu vwa Hadadi yachila nu vuvaho. Khu, Rezoni yamiha nali Siria, khandi yalolela vurima Israeli.

²⁶Yerobohamu mwana wa Nebati, yahinganyinya khandi Mwami Solomoni. Yerobohamu yali Muefurahimu, mulala khu varumishi va Solomoni wi litaala lia Zereda. Mama wewe yali mukhutsakhali walaangwangwa Zeruha.

²⁷Yaka nako makhuva kahandikwa, khulondokhana khuli yahinganyinya Mwami Solomoni. Solomoni yali niyililitsanga malova mu milimi khuluveka luli ivukwi wa Yerusalemu, khandi nakalushilanga khulomba masisi ki litaala likali.

²⁸Yerobohamu yali musatsa muvukha wi tsingulu; khandi lwa Mwami Solomoni yalola khuli yakholanga mihinzili ni tsingulu tsinyishi, yamurovola khusinjilila mihinzilu chiosi chiu khunikwa khukhola mu lusomo lwa vandu vi tsimbia tsia Manaase nende Efurahimu.

²⁹Litukhu lindi, lwa Yerobohamu yali narulanga mu Yerusalemu, Muprofeti Ahiya wi litaala lia Shilo, yakana naye wonyene nali khu muhaanda. Muprofeti Ahiya yali wifwali tsinguvu tsimpia. Vo vavili vali vonyene mu shivala mu milimi.

³⁰Nalwo lwa Ahiya yavukula inguvu impia ya yali niyifwali, nachirandula mu vitonye likhomi na vivili;

³¹navoolela Yerobohamu, “Vukula mwene vitonye likhomi, shichila Mwami Nyasaye, uli Nyasaye wa Israeli avoolanga, ‘Nzitsanga khurulitsa vwami khu Solomoni, makhuhe yivi tsimbia likhomi.

³²Navutswa Solomoni aliitsa khutsililila khuva nu luhia lulala, shichila murumishi wanje Daudi, khandi shichila Yerusalemu, nilili litaala likali lia narovola khuva lianje wonyene khurula mu vandu vi tsimbia tsiosi tsia Israeli.

³³Nzitsanga khukhola ndio, shichila Solomoni umali khunzambakhana, khandi usaali khu vanyasaye va vandu vi tsimbia tsindi tsinjeni: khu Ashitarotsi, nali nyasaye wi shikhali wa Sidoni; khu Chemoshi, nali nyasaye wa Vamoabu; khandi khu Moleki, nali nyasaye wa Vaamoni. Solomoni umali khwambakhana khulonda malako kaanje, ukholi shindu shitamanu khandi wambakhane khurweshitsa malako kaanje, nende mechitso kaanje khuli tata wewe Daudi yakholanga.

³⁴Navutswa shinzitsanga khurulitsa vwami vwosi khu Solomoni tawe. Niitsa khumukhola atsililile khuva mwamihi, khumatukhu koosi kaliitsa khuva nashili mwoyo. Niitsa khukhola ndio shichila murumishi wanje Daudi, wa narovola khandi ulondanga malako kaanje nende mechitso kaanje.

³⁵Navutswa niitsa khurulitsa vwami khu mwana wa Solomoni, makhuhe tsimbia likhomi;

³⁶navutswa khali ndio, niitsa khulekha mwana wa Solomoni atsililile khuva nu luhia lulala, khu mwitsukhulu wu murumishi wanje Daudi, alitsililila khwamiha shia khase khosi mu Yerusalemu, nilili litaala likali lia narovola khuva havundu ha vasaala khwinzi.

³⁷Yivi Yerobohamu, niitsa khukhwamihitsa khuva Mwami wa Israeli, khandi uliitsa khwamiha shia havundu hosi ha wikombanga nu mwoyo kwosi khwamiha.

³⁸Niiva uliitsa khulonda nu mwoyo kwosi malako kaanje, umenye khulondokhana khu malako kaanje nende mechitso kaanje, khandi ukhole likhola liu vulunji, khuli murumishi wanje Daudi yakholanga, shia khase khosi niitsa khutsililila khuva nivi. Niitsa khukhwamihitsa khuva Mwami wa Israeli, khandi nilichelitsa khuli nyala khulola ndi mwitsukhulu wowo, aliitsa khwamiha havukono hoho, khuli kholele Daudi.

³⁹Niitsa khusalilitsa vitsukhulu va Daudi, shichila vwoni vwa Solomoni akholi, navutswa shikali khumatukhu koosi tawe.’ ”

⁴⁰Khulwa yako, Solomoni yachelitsa khwiira Yerobohamu; navutswa Yerobohamu yilukha natsia mu shivala shia Misri khu Mwami Shishaka wa Misri. Yamenyayo khutukha lwa Solomoni yakhutsa.

⁴¹Shia shindu shindi shiosi, shia Solomoni yakhola, muhinzilu kwekwe nende vusitsa vwevwe, viahandikwa viosi mu shitabu shia Solomoni.

⁴²Solomoni yali Mwami wa Vaisraeli voosi mu Yerusalemu khumihika makhomi kane.

⁴³Solomoni yakhutsa, mmbili kwekwe nu kuyeveelwa nayeveelwa mu litaala likali lia Daudi; ma mwana wewe Rehobohamu, niyamiha havukono hehe khuli mwami.