Read tsotso 1 VAMI 13 Bible Online

1 VAMI 13 - tsotso bible

1 VAMI 13

¹Litukhu lindi, muprofeti yarula Yuda natukha mu litaala lia Betseli, khulondokhana khu lilako liu Mwami Nyasaye, lwa Yerobohamu yali nasinjile himbi ha vwaali khusamba vubani.

²Muprofeti mwenoyo yalomoloma vutamanu, shichila vwaali khulondokhana khu lilako liu Mwami Nyasaye, yali namuvoolele. Yavoola, “Yivi vwaali, vwaali! Mwami Nyasaye avoolanga, ‘Mwana uliitsa khulaangwa Yosia, aliitsa khwivulwa mu vandu vi inzu ya Daudi. Aliitsa khusinzila khu yivi vasalisi varumikhanga khu vwaali vwa vandu vatamanu vakorwa Nyasaye, vakholanga misango khu yivi, khandi aliitsa khusambila vikuumba via vandu khu yivi.’ ”

³Muprofeti mwenoyo yatsilila khuvoola, “Vwaali yuvu vuliitsa khwatikhamu hali khavili, likooshe lili khuvwo lisalane. Nalwo lwa muliitsa khumanya ndi Mwami Nyasaye, yalomoloma khuvirila khwinzi.”

⁴Lwa Mwami Yerobohamu yahulila ndio, yamusona mukhono nahaana lilako, “Kumili mundu woyo!” Nonoho lwa mukhono ku Mwami Yerobohamu kwafwokoya, khali navula khandi khukukoloshitsa.

⁵Vwaali vwatikhanamu nuvukwa hasi vwangu, likooshe nilisalana hasi, khuli muprofeti yali niyavoola khuvirila mu lira liu Mwami Nyasaye.

⁶Mwami Yerobohamu yavoolela muprofeti mwenoyo, “Nuyaanza saalila khu Mwami Nyasaye, uli Nyasaye wowo, umureeve ambonyinyi mukhono kwanje!” Muprofeti mwenoyo yasaala khu Mwami Nyasaye, ma mukhono ku Mwami Yerobohamu nu kuhona.

⁷Nalwo lwa Mwami Yerobohamu yavoolela muprofeti mwenoyo, “Hamba khutsi nivi ingo wanje khulia shiukhulia. Nzitsanga khukhuha shihanwa shichila kukholi.”

⁸Navutswa muprofeti mwenoyo yachipa navoola, “Khali niiva unyala khumba inusu yi miandu chiochio, shinyala khutsia nivi inoho khulia shiukhulia inoho khung'wa shindu shiosi tawe.

⁹Mwami Nyasaye umbeele lilako ndi mbuli khulia inoho khung'wakhu shindu shiosi, khandi mbuli khukalukha ingo, khuvirila khu muhaanda mulala kwene kwa nitsilakhu.”

¹⁰Muprofeti mwenoyo yavirila khu muhaanda kundi; khandi niyambakhana khukalushila khu muhaanda kwa yavirilakhu, natukha mu litaala lia Betseli.

¹¹Mumatukhu kenako, khwali nu muprofeti wasakhula, wali namenyanga mu litaala lia Betseli. Mulala khu vaana veve vi shiyayi, yitsa namuvoolela ku muprofeti wali naruli Yuda, yali nakholi mu litaala lia Betseli khulitukhu lienelo, khandi ka yali navoolele Mwami Yerobohamu.

¹²Tata wavo yavareeva, “Nu muhaanda shina kwa yavirilakhu lwa yarula hanu?” Vaana veve vamumanyinya muhaanda kwenoko

¹³navavoolela vamuninyinyi khu ipunda yeye. Vakhola ndio, nachihila

¹⁴khutsia khukholomokha khu muhaanda khulonda muprofeti wali naruli Yuda, namunyola niyikhale himbi ha musala ku museno. Yamureeva, “Nivi muprofeti uruli Yuda?” Mundu mwenoyo yamuchipa, “Ninzi ye.”

¹⁵Nalwo lwa muprofeti mwenoyo yamuvoolela, “Hambi khutsi ingo khulia shiukhulia.”

¹⁶Navutswa muprofeti wali naruli Yuda yamuvoolela, “Shinyala khutsia nivi ingo inoho khuhuchilila khwinjilitswa munzu mwomwo tawe. Shinyala khulia shiukhulia inoho khung'wa shindu shiosi havundu hanu tawe,

¹⁷shichila Mwami Nyasaye umbeele lilako ndi mbuli khulia shiukhulia inoho khung'wa shindu shiosi havundu hanu, khandi mbuli khukalukha ingo khuvirila khu muhaanda kwa nalondelakhu.”

¹⁸Nalwo lwa muprofeti wasakhula wi litaala lia Betseli yamuvoolela, “Khali inzi ndi muprofeti khuli yivi uli; khandi khulondokhana khu lilako liu Mwami Nyasaye, injelosi imbolele khuhile ingo wanje khandi khwinjilitsi hango hanje.” Navutswa muprofeti wasakhula mwenoyo, yali navehanga.

¹⁹Nalwo lwa muprofeti wali naruli Yuda yasimukha natsia ingo, halala nu muprofeti wasakhula mwenoyo, khandi nalia naye shiukhulia.

²⁰Lwa vali nivaliitsanga shiukhulia khu imesa, Mwami Nyasaye yavoolela muprofeti wasukhula likhuva lielie;

²¹manalilila muprofeti wali naruli Yuda, “Mwami Nyasaye avoolanga ndi lwa wambakhana khulonda malako keke khandi nuvula khukhola ka yenyanga ukhole,

²²navutswa wakalukha nulia shiukhulia havundu ha yali nakhukayi uvuli khuliaho shiukhulia; uliitsa khukhutsa shichila kukholi kenako, khandi mmbili kwokwo, kuliitsa khuvula khuyeveelwa mu shilindwa shia vandu vi inzu yoyo.”

²³Lwa vali nivamali khulia shiukhulia, muprofeti wasakhula yaninyinya muprofeti wali naruli Yuda khu ipunda,

²⁴narulaho. Lwa yali nali khu muhaanda, yakana ni isimba nimwiira. Mmbili kwekwe kwalaakalala khu muhaanda, ipunda nende isimba nitsisinjila himbi khu mmbili kwenoko.

²⁵Vandu valala vaviraho, nivalola mmbili nu kulaakalale khu muhaanda, isimba nisinjile himbi khukwo. Vasimukha nivatsia mu litaala lia Betseli, nivavoolela vandu ka vali nivaloli.

²⁶Lwa muprofeti wasakhula yahulila ndio, yavoola “Woyo neye muprofeti wambakhana khulonda malako ku Mwami Nyasaye! Khulwa yako, Mwami Nyasaye yaruma isimba khwitsa khumukwana nu khumwiira, khuli Mwami Nyasaye yali niyavoola aliitsa khukhola.”

²⁷Muprofeti wasakhula mwenoyo yavoolela vaana veve vi shiyayi, “Ninyinyi khu ipunda yanje.” Vakhola ndio,

²⁸nachihila khandi nanyola mmbili ku muprofeti nu kulaakalale khu muhaanda, ipunda nende isimba nitsisinjileho himbi khu mmbili kwenoko. Isimba yali nishili khulia mmbili kwenoko inoho khuseera ipunda.

²⁹Muprofeti wasakhula yavukula mmbili kwenoko, nakwachikha khu ipunda, nakalushitsa mu litaala lia Betseli, khutsia khwikhula khandi khukuyeveela mu shilindwa.

³⁰Muprofeti wasakhula mwenoyo yakuyeveela mu shilindwa, shia vandu vi inzu yeye mwene. Ye nende vaana veve vi shiyayi vikhula, nivavoola, “Wooyi amwiru weru, amwiru weru!”

³¹Lwa vali nivamali khuyeveela mmbili kwenoko, muprofeti wasakhula mwenoyo yavoolela vaana veve vi shiyayi, “Lwa niitsa khukhutsa, muliitsa khunzeveela mu shilindwa yishi, khandi muliitsa khuyeveela mmbili kwanje himbi khu kwekwe.

³²Makhuva ka yalomoloma khulondokhana khu lilako liu Mwami Nyasaye, shichila vwaali mu litaala lia Betseli, khandi shichila shia havundu hosi ha vasaalilanga mu mataala ka Samaria, kaliitsa khurweshitswa.”

³³Navutswa, khali lwa kenako kali nikamali khwikholekha, Mwami Yerobohamu wa Israeli yatsililila khukhola vindu vitamanu, navutswa yatsilila khurovola vasalisi khurula mu vandu vi tsinzu tsindi, khurumikha ha vwaali vwa yali niyumbakha. Yakhola shia mundu wosi, wiyenyelanga khuva musalisi khuva musalisi.

³⁴Vandu vi inzu ya Yerobohamu vativitswa, khandi nivamululwa voosi, shichila vwoni vwa Yerobohamu vwenovo.