Read tsotso 1 VAMI 14 Bible Online

1 VAMI 14 - tsotso bible

1 VAMI 14

¹Mumatukhu kenako, mwana wu Mwami Yerobohamu walaangwangwa Ahiya yali mulwale.

²Yerobohamu yavoolela mukhali wewe, “Yimwaminyi khulolekha khuli mundu wa vandu vakorwa, nikanyalikha vandu vavuli khukhumanya nivi mukhali wa Yerobohamu, ma utsi mu litaala lia Shilo. Khali ndio, Muprofeti Ahiya amenyayo, neye wali niyambolela ndi niitsa khuva Mwami wa Israeli.

³Hili khuye mikati likhomi, tsikeki, nende vushi mu ijaka. Aliitsa khukhuvoolela katsitsanga khwikholekha khu mwana weru.”

⁴Nalwo lwa mukhali wa Yerobohamu, yakhola ka yavoolelwa. Yarulaho natsia khwinjila mu inzu yu Muprofeti Ahiya, wali namenyanga mu litaala lia Shilo. Muprofeti Ahiya yakhaywa khulola vulahi; shichila yali wasakhula.

⁵Navutswa Mwami Nyasaye yali wavoolela Ahiya ndi mukhali wa Yerobohamu yitsanga khumureeva makhuva khulondokhana khu mwana wewe, wali nalwalanga. Mwami Nyasaye yavoolela Ahiya ka yenyekhanga avoole. Lwa mukhali wa Yerobohamu yatukhaho, yikhola kholitsa khuli nu mundu wundi vutswa.

⁶Navutswa lwa Ahiya yahulila khuli lwa yali nachendanga mu muliango, yavoola, “Yinjila munu. Manyi ndi uli mukhali wa Yerobohamu. Shichila shina wikhola kholitsanga khuli uli mundu wundi vutswa? Ndi na makhuva matamanu ka nyenyanga khukhuvoolela yivi.

⁷Simukha utsi khuvoolela Yerobohamu ndi Mwami Nyasaye, uli Nyasaye wa Israeli avoolanga, ‘Ninzi wakhurovola khurula mu vandu, nikhukhola khuva mwimilili wa vandu vaanje Israeli.

⁸Narulitsa vwami khu vitsukhulu va Daudi, nikhuha yivi. Navutswa khali ndio, ushili khuva khuli murumishi wanje Daudi, wali musuuvilwa khwinzi, walondanga malako kaanje, khandi nakhola kali malahi imbeli wanje.

⁹Ukholi vindu vitamanu muno, khuvira yavo varaanga khwamiha imbeli wowo nushili khwamiha. Wilombela mwene vanyasaye vandi, misambwa chialombwa khu vivia; ukholi inzi khuva nu vurima khandi unzambakhane.

¹⁰Nzitsanga khulerela vandu vi inzu yoyo matiinyu, shichila kenako. Nzitsanga khwiira vitsukhulu vovo voosi, vave vayayi vavukha nende vasakhula. Niitsa khumulula vandu vi inzu yoyo; valiitsa khweywa khurulaho khuli isiingo.

¹¹Tsisimba tsiliitsa khulia shia mundu wosi mu vandu vi inzu yoyo, uliitsa khukhutsila mu litaala likali. Manyonyi kaliitsa khuvootsa shia mundu wosi, uliitsa khukhutsila mumbulimu. Inzi Mwami Nyasaye mali khuvoola.’ ”

¹²Nalwo lwa Ahiya yatsililila khuvoolela mukhali wa Yerobohamu, “Kalukha ingo wowo nunundi. Luva nu wakhinjila mu litaala liolio, mwana wi shiyayi wowo aliitsa khukhutsa.

¹³Vaisraeli voosi valiitsa khwikhula mwana wi shiyayi mwenoyo, nu khuyeveela mu shilindwa mmbili kwekwe. Neye wonyene mu vandu vi inzu ya Yerobohamu, uliitsa khuyeveelwa vulahi vwene, shichila neye wonyene, wu Mwami Nyasaye, uli Nyasaye wa Israeli ayaanzitswi naye.

¹⁴Mwami Nyasaye atsitsanga khwamihitsa mwami, wenyekhanga khwamiha Israeli, uliitsa khwiira vandu vi inzu ya Yerobohamu.

¹⁵Mwami Nyasaye aliitsa khusalilitsa Israeli, khwinuya khuli shitundu shinuyanga mu muchela. Aliitsa khurulitsa Vaisraeli mu shivala shilahi yishi, shia yali niyaha vakuuka vavo. Aliitsa khuvasalanyinya injelekha wu Muchela kwa Efurate, shichila vamukholi khuva nu vurima, lwa valombi misambwa chia nyasaye wi shikhali Ashera.

¹⁶Mwami Nyasaye aliitsa khulekha Vaisraeli, shichila Yerobohamu yakhola vwoni, nachila Vaisraeli nivakhola vwoni.”

¹⁷Nalwo lwa mukhali wa Yerobohamu yarulaho, natsia mu litaala lia Tiriza. Lwa yali niyakhatukha hango hehe, ha vahulachilanga imu, mwana wi shiyayi mwenoyo yakhutsa.

¹⁸Vaisraeli voosi vikhula mwana mwenoyo nivamuyeveela mu shilindwa, khuli Mwami Nyasaye yali niyavoolela murumishi wewe Muprofeti Ahiya.

¹⁹Shia shindu shindi shiosi shiu Mwami Yerobohamu yakhola, mahe keke ka yakwana khandi khuli yamihanga, viosi viahandikwa mu Shitabu shi Tsinyinga shia Vami va Israeli.

²⁰Yerobohamu yamiha khumihika makhomi kavili na chivili. Yakhutsa, mmbil kwewkwe nu khuyeveelwa mu shilindwa, ma mwana wewe Nadabu, niyamiha havukono hehe khuli mwami.

²¹Rehobohamu mwana wa Solomoni yali ni mihika makhomi kane nu mulala, lwa yakwa Mwami wa Yuda. Yamiha khumihika likhomi na saba mu Yerusalemu, nilili litaala likali liu Mwami Nyasaye yali niyarovola khurula mu vandu vi tsimbia tsiosi tsia Israeli khuva havundu ha vasaala khuye. Mama wa Rehobohamu yalaangwanga Nahama wi litaala lia Amoni.

²²Vandu va Yuda vakhola vindu vitamanu imbeli wu Mwami Nyasaye; vachila Mwami Nyasaye navalolela vurima, shichila vwoni vwavo vwa vakhola khuvira vwa vakuuka vavo vali nivakhola.

²³Vumbakha havundu ha vasaala khu vanyasaye vavo vu vuvehi, machina matakatifu nende vimanyilu via Ashera, khu shia shikulu nende mu shia shiniikha shiu musala.

²⁴Khwaliho khali na vandu vasatsa vakholanga vulaaya havundu ha vasaalilanga henaho. Vandu vakhola miima chi tsisoni chia vandu vi tsimbia tsindi, tsiu Mwami Nyasaye yali niyakhunga khurulamu, lwa Vaisraeli visuundanga mu shivala shienesho.

²⁵Khumuhika kkwa kharanu, lwa Rehobohamu yali ni yamihanga, Mwami Shishaka wa Misri yakwana vandu va Yerusalemu.

²⁶Yavukula shia shindu shiosi mu livishilu li Litempeli liu Mwami Nyasaye nende mu inzu yu vwami. Yavukula vindu viosi, khali tsingavo tsia Solomoni yali niyalomba khu itsahabu.

²⁷Mwami Rehobohamu yalomba havukono hatsio tsingavo khu mukasa, narovola vimilili va valindi vi vilivwa vi inzu yu vwami khusinjilila tsingavo tsienetso.

²⁸Shia isaa yosi yu Mwami Rehobohamu yinjilanga mu Litempeli liu Mwami Nyasaye, valindi vachinganga tsingavo tsienetso, khandi vatsikalushitsa mu inzu ya valindi vikhalamu nivalinda.

²⁹Shia shindu shindi shiosi, shiu Mwami Rehobohamu yakhola shiahandikwa mu Shitabu shi Tsinyanga shia Vami va Yuda.

³⁰Rehobohamu nende Yerobohamu vali vamenya nivakwana liihe mumatukhu kenako koosi.

³¹Rehobohamu yakhutsa nayeveelwa mu vilindwa via vandu vi inzu yu vwami vili mu litaala likali lia Daudi. Mama wewe yalaangwanga Nahama, wi litaala lia Amoni. Mwana wewe Abiya yamihitswa havukono hehe khuli mwami.