Read tsotso 1 VAMI 16 Bible Online

1 VAMI 16 - tsotso bible

1 VAMI 16

¹Mwami Nyasaye yalomoloma khu Muprofeti Yehu mwana wa Hanani, namuvoolela likhuva liu khuvoolela Bahasha yili:

²“Wali mundu mukhaya vuchila shindu shiosi, navutswa ninzi wakhurovola khuva mwimilili wa vandu vaanje Israeli. Ukholi nunundi vwoni khuli Yerobohamu, khandi uchili vandu vaanje vakholi vwoni. Vwoni vwavo vwa vakholi vunombi khuva nu vurima.

³Lola! Niitsa khumulula yivi nende vandu vi inzu yoyo, khuli nakhola Yerobohamu.

⁴Tsisiimbwa tsiliitsa khulia vandu vi inzu ya Bahasha valiitsa khukhusila mu litaala likali; ma manyonyi kalivootsa yavo voosi, valiitsa khukhutsila mumbulimu.”

⁵Shia shindu shindi shiosi, shiu Mwami Bahasha yakhola nende vikholwa vivie viu vucheli, viahandikwa mu Shitabu shi Tsinyinga shia Vami va Israeli.

⁶Mwami Bahasha yakhutsa mmbili kwekwe nu khuyeveelwa mu litaala lia Tiriza; ma mwana wewe Ela, niyamiha havukono hehe khuli mwami.

⁷Lwinyuma, Mwami Nyasaye neye wavoolela Muprofeti Yehu atsi khuvoolela Mwami Bahasha nende vandu vi inzu yeye likhuva lielie, shichila Bahasha yakhola vwoni imbeli wewe. Bahasha yachila Mwami Nyasaye nava nu vurima, shikali shichila yakhola vindu vitamanu vionyene, khuli Mwami Yerobohamu wamihanga imbeli wewe yakhola tawe; navutswa shichila yiira khandi shia mundu wosi mu vandu vi inzu ya Yerobohamu.

⁸Khumuhika kwa makhomi kavili na sita, lwa Mwami Asa wa Yuda yali ni yamihanga, Ela mwana wa Bahasha yaraanga khwamiha Israeli, nali mu litaala lia Tiriza; yamiha khumihika chivili.

⁹Mulala khu vimilili va vasikali veve walaangwangwa Zimuri, wasinjililanga inusu ya makaare keke kiliihe, yakhava khuli anyala khumwiira. Litukhu lindi, lwa Ela yali nali himbi khutanda, niyakhang'wa malwa hango ha Aruza, wasinjililanga inzu yu vwami mu litaala lia Tiriza,

¹⁰Zimuri yinjila munzu mwenomo, nasinza Mwami Ela, niyamiha havukono hehe khuli mwami. Yaka kikholekha khumuhika kwa makhomi kavili na saba lwa Mwami Asa wa Yuda yamihanga.

¹¹Lwa Zimuri yaraanga khwamiha, nonoho lwa yiira shia mundu wosi mu vandu vi inzu ya Bahasha. Yiira shia mundu musatsa wosi, ave nu mwiikho wewe inoho mulina wewe.

¹²Khulwa yako, Zimuri yiira vandu voosi vu mu inzu ya Bahasha, khulondokhana khu likhuva liu Mwami Nyasaye yali niyaprofeta khuvirila khu Muprofeti Yehu atsi khuvoolela Bahasha.

¹³Bahasha nende mwana wewe Ela vachila Mwami Nyasaye, uli Nyasaye wa Israeli nava nu vurima, shichila vasaalanga khu misambwa khandi navo vachila Vaisraeli nivakhola vwoni.

¹⁴Shia shindu shindi shiosi via Ela yakhola viahandikwa mu Shitabu shi Tsinyinga shia Vami va Israeli.

¹⁵Khumuhika kwa makhomi kavili na saba, lwa Mwami Asa wa Yuda yali ni yamihanga, Zimuri yamiha khumatukhu saba mu litaala lia Tiriza. Mikaanda chia vasikali Vaisraeli, vali nivavotokhananga litaala lia Gibetsoni lia Vafilisti;

¹⁶khandi lwa vahulila ndi Zimuri akhavanga khuli anyala khwiira Mwami Bahasha, khandi umali khumwiira, nonoho lwa Vaisraeli voosi varovola mwimilili wa vasikali vavo walaangwangwa Omuri, khuva Mwami wa Israeli.

¹⁷Mwami Omuri nende mikaanda chia vasikali veve voosi, varula mu litaala lia Gibetsoni, nivatsia khuvotokhana litaala lia Tiriza.

¹⁸Lwa Zimuri yalola ndi vavukuli litaala lienelo, yinjila natsia khwivisa havundu handi mukari mwi inzu yu vwami, nahaambitsa mulilu mu inzu yu vwami, nakhutsilamu.

¹⁹Yaka kikholekha shichila Zimuri yali wakhola vwoni imbeli wu Mwami Nyasaye. Zimuri yakhola vindu vitamanu, navula khuyaanzitsa Mwami Nyasaye, lwa yakhola vwoni khandi nachila Israeli nivakhola vwoni, khuli Yerobohamu yakholanga.

²⁰Shia shindu shindi shiosi, shia Zimuri yakhola, khali khumeetakhu liihe lielie lia yaraanjitsa, viahandikwa mu Shitabu shi Tsinyinga shia Vami va Israeli.

²¹Vaisraeli vavukhanamu mu vituma vivili; shituma shilala khuvo venyanga khukhola Tibuni mwana wa Ginatsi khuva mwami wavo, na shindi valolanga nu vulahi Omuri khuva mwami wavo.

²²Navutswa valondi va Omuri, valolekha vali ni tsingulu tsinyishi khuvira yavo valondanga Tibuni mwana wa Ginatsi. Tibuni yakhutsa, ma Omuri nakwa mwami.

²³Khumuhika kwa makhomi kavaka nu mulala, lwa Mwami Asa wa Yuda yamihanga, Omuri yaraanga khwamiha khuli Mwami wa Israeli; niyamiha khumihika likhomi na chivili, mihika sita khu chienecho mu litaala lia Tiriza.

²⁴Mwami Omuri yakuula shikulu shia Samaria khurula khu mundu walaangwangwa Shemeri ni ifetsa vitonye tsiheelefu sita. Omuri yumbakha imbinga yeye khu shikulu shienesho, khandi niyumbakha litaala khushio, lia yakulikha lira Samaria, mwene shikulu shienesho walaangwangwa Shemeri, namali khukhutsa.

²⁵Navutswa Omuri yakhola vindu vitamanu imbeli wu Mwami Nyasaye, khuvira vami vandi voosi vamihanga imbeli wewe vali nivakhola.

²⁶Omuri yachila Mwami Nyasaye, uli Nyasaye wa Israeli, namulolela vurima, shichila vwoni vwevwe khandi shichila yachila Vaisraeli nivakhola vwoni, nivasaala khu misambwa.

²⁷Shia shindu shindi shiosi, mu shilindwa shia Omuri yakhola, mihinzilu chiechie chiosi chia yarweshitsa, viahandikwa mu Shitabu shi Tsinyinga shia Vami va Israeli.

²⁸Omuri yakhutsa, mmbili kwekwe nu kuyeveelwa mu litaala lia Samaria. Mwana wewe Ahabu yamiha havukono hehe khuli mwami.

²⁹Khumihika kwa makhomi kavaka na munane, lwa Mwami Asa wa Yuda yamihanga, Ahabu yaraanga khwamiha Israeli; niyamiha mu litaala lia Samaria khumihika makhomi kavili na chivili.

³⁰Ahabu yakhola vindu vitamanu imbeli wu Mwami Nyasaye, khuvira vami vandi voosi vamihanga imbeli wewe vali nivakhola.

³¹Shiyalolakhu khuli nu vutamanu khuye khukhola vwoni, khuli vu Mwami Yerobohamu yali niyakhola tawe; navutswa yatsililila nahila khandi Yezebeli, mwana wi shikhana wu Mwami Etsibaali wa Sidoni, nasaala khu Baali khandi namurumishila.

³²Yumbashila Baali litempeli mu litaala lia Samaria. Yamulombela vwaali, navuvikha mu litempeli lienelo.

³³Yavikhamu khandi shifwanani shia nyasaye wi shikhali Ashera. Yakhola vindu vitamanu vinyishi, khali nachila Mwami Nyasaye, uli Nyasaye wa Israeli khumulolela vurima, khuvira vami vandi voosi va Israeli vamihanga imbeli wewe vali nivakhola.

³⁴Khumihika chia Ahabu yamihanga, Hiheli wi litaala lia Betseli, yakalushila khumbakha litaala lia Yeriko. Hiheli yachila mwana wewe mukhulundu walaangwangwa Abiramu nakhutsa, lwa yaraanjitsa musinji kwi litaala lia Yeriko. Yachila khandi mwana wewe mushie walaangwangwa Segubu nakhutsa, lwa yumbakha vilivwa vi litaala, khuli Mwami Nyasaye yali niyavoola khuvirila khu Yoshwa mwana wa Nuni.