Read tsotso 1 VAMI 18 Bible Online

1 VAMI 18 - tsotso bible

1 VAMI 18

¹Lwa matukhu manyishi kali nikakhavira, khumuhika kwa khavaka kwi inzala, Mwami Nyasaye yavoolela Eliya, “Rula utsi khulola Mwami Ahabu; niitsa khulera imbula khulilova.”

²Eliya yasimukha natsia khulola Ahabu. Inzala yali indulu muno mu litaala lia Samaria.

³Ahabu yalaanga Obadia, wali mundu wasinjililanga inzu yu vwami. (Obadia yali ayihaana nu mwoyo kwosi khu Mwami Nyasaye.

⁴Lwa Yezebeli yali niyiiranga vaprofeti vu Mwami Nyasaye, Obadia yavukula vaprofeti imia indala khuvo, natsia khuvavisa mu tsimbangaywa tsivili. Yavisa vaprofeti makhomi karanu mu shia luhangaywa. Yavaha shiukhulia nende matsi.)

⁵Nalwo lwa Ahabu yavoolela Obadia, “Hamba khutsi khuchenda shia havundu hosi wi tsisieveye nende luhoongo luli khulole, niiva khunyala khunyola vunyasi vwi tsifarasi nende tsisushili tsieru tsinyala khulia tsitsililile khuva mwoyo. Haundi, khali mulala khu miruku chieru kulatsililila khuva mwoyo.”

⁶Vahuchilitsana nu luveka shina lwi shivala, lwa shia mulala khuvo anyala khutsiayo khurunishitsa. Ahabu yasimukha natsia khuluveka lulala, na Obadia natsia khuluveka lundi.

⁷Lwa Obadia yali nali khu luchendo lwelwe, nonoho lwa yakana na Eliya. Obadia yamumanyishitsa vulahi, khandi namwinamila namureeva, “Yivi mwami wanje Eliya, unyala khuva toto nivi?”

⁸Eliya yamuchipa, “Ninzi ye. Simukha utsi khuvoolela muruchi wowo Mwami Ahabu ndi inzi Eliya ndi hanu.”

⁹Obadia yamuvoolela, “Ni shina shiakholi shitamanu, shichilanga numbila inzi murumishi wowo khu Mwami Ahabu khunziira?

¹⁰Nzisuuhanga khuvirila mu lira liu Mwami Nyasaye, uli Nyasaye wowo ndi Mwami Ahabu wamala khukhava yivi shia havundu hosi mu shivala. Lwa mwamihi wosi wi shivala yavoolanga uvula mu shivala shieshie, Ahabu yisuuhitsanga mwamihi mwenoyo, navoola ndi uvula mu shivala shieshie.

¹¹Navutswa umbolelanga nunundi nzi khu muruchi wanje Ahabu, muvoolele, ‘Eliya ali hanu.’

¹²Nikave karina, niiva Roho wu Mwami Nyasaye aliitsa khukhuchinga akhuhili havundu hambula khumanya, lwa mba ninakharula havundu uli hanu? Lwa nzia khuvoolela Mwami Ahabu ndi uli hanu, navutswa avuli khukhunyola, anyala khunziira. Khutukha umanye ndi inzi navetsanga murumishi wali niyihaana nu mwoyo kwosi khusaala khu Mwami Nyasaye, khurula nishili muvukha.

¹³Ushili khuvoolelwakhu ka nakhola, lwa Yezebeli yiiranga vaprofeti vu Mwami Nyasaye, khuli navisa vaprofeti imia indala, valala khuvo mu tsimbangaywa tsivili; vaprofeti makhomi karanu mu shia luhangaywa khandi nivaha shiukhulia nende matsi?

¹⁴Unyala khumbolela munjila shina nzi khu muruchi wanje Ahabu, muvoolele, ‘Eliya ali hanu?’ Ahabu alanziira!”

¹⁵Eliya yavoola, “Nzisuuhanga khuvirila mu lira liu Mwami Nyasaye wi Mikaanda Chiliihe, wandumishilanga ndi inzi mwene, natsia nunundi khulola Mwami Ahabu.”

¹⁶Nalwo lwa Obadia yasimukha natsia khwakanila Ahabu, namuvoolela makhuva kenako. Ahabu yasimukha natsia khwakanila Eliya.

¹⁷Lwa Ahabu yalola Eliya, yamuvoolela, “Yivi mundu ulerelanga Israeli vutiinyu, unyala khuva nivi?”

¹⁸Eliya yamuchipa, “Shili khulerelakhu Israeli vutiinyu vwosi. Navutswa yivi nende vandu vi inzu ya tata wowo, mukholi kenako, lwa mwambakhana khulonda malako ku Mwami Nyasaye, numusaala khu misambwa chia Baali.

¹⁹Khulwa yako, laanga halala nunundi Vaisraeli voosi, khunzakanila ha Shikulu shia Karameli. Hambaho halala na vaprofeti tsimia tsine na makhomi karanu va Baali nende vaprofeti tsimia tsine va nyasaye wi shikhali Ashera, va Yezebeli akhonyanga.”

²⁰Ahabu yalaanga halala Vaisraeli voosi nende vaprofeti va Baali, khwakanila ha Shikulu shia Karameli.

²¹Eliya yasimukha natsia imbeli wa vandu voosi, navoola, “Nuluhono shina lwa muliitsa khuvukula khu mukanakane kamukhola? Niiva Mwami Nyasaye ni Nyasaye, mumulonde; navutswa niiva ni Baali, mumulonde.” Navutswa vandu shivachipakhu shindu shiosi tawe.

²²Nalwo lwa Eliya yavoolela vandu, “Ninzi wonyene muprofeti wu Mwami Nyasaye ushili mwoyo, navutswa Baali ali na vaprofeti tsimia tsine na makhomi karanu.

²³Khulereli vihuunwa vivili. Leshi vaprofeti va Baali vene varovole shihunwa shilala, vashisinzi nu khureema mu vitonye, mavare ikulu khu tsikhuyi; navutswa muvuli khuhaambitsakhu mulilu. Nzitsanga khukhola malala mele khu shihunwa shindi yishi.

²⁴Musaale khu nyasaye wenyu, ninzi saale khu Mwami Nyasaye, uli Nyasaye wanje; nyasaye uchipa nu mulilu, toto ni Nyasaye.” Vandu voosi vavoola, “Makhuva kuvooli ni malahi.”

²⁵Eliya yavoolela vaprofeti va Baali, “Rovoli vene shihunwa shilala khu vihuunwa yivi, khandi muve vu khuraanga khusinza shihunwa shienyu, shichila muli vanyishi. Musaale khu nyasaye wenyu, navutswa muvuli khuhaambitsakhu mulilu.”

²⁶Vavukula shihunwa shia vaheelwa, nivasinza, khandi nivasaala khu Baali, khuraanjila mu mavwevwe khutukha tsisaa sita mbasu. Valaanjilila nivavoola, “Baali, khuchipe!” Vatsililila khusieva, nivavotokhana vwaali vwa vali nivumbashi; navutswa lichipu livulakhuho lia vanyola.

²⁷Eliya yaraanga khuvakholela shihenye henye tsisaa sita mbasu. Yavavoolela, “Laanjilili ikulu wene. Toto ni nyasaye! Haundi, anyala khuva alooranga malooro mbasu inoho yikhonyanga, inoho watsia mu luchendo. Kanyala khuva akonanga tsindolo; khutukha avushitswi.”

²⁸Vaprofeti venavo valaanjilila ikulu wene, nivireema vene ni vivavi nende marimu, khulondokhana khu mulukha ku mwiima kwavo, khutukha lwa masahi kanyinyinda nikarula khuvo.

²⁹Vatsililila khuprofeta, nivalaanjilila khutukha halukolovo; navutswa lichipu livulakhuho lia vanyola, khali shindu shivulakhuho shia vahulilakhu.

³⁰Nalwo lwa Eliya yavoolela vandu voosi, “Hambi himbi khwinzi.” Voosi vitsa himbi khuye, nakalushila khulomba vwaali vu Mwami Nyasaye, vwali nu vwasambulwa.

³¹Eliya yavukula machina likhomi na kavili, khulondokhana khu vandu vi tsimbia likhomi na tsivili, tsiakulikhwa mira ka vaana va Yakobo, mundu wu Mwami Nyasaye yali niyakulikha lira Israeli.

³²Yarumishila machina kenako khukalushila khulomba vwaali vu khusaalilakhu Mwami Nyasaye. Yayeeva mutaalo khundulu khu vwaali vwenovo, vuvambalalu muno vwa matsi tsilita 14 kanyala khutsukhwamu.

³³Yavukula tsikhuyi vulahi khu vwaali, nareema shihunwa mu vitonye, narenjekha khu tsikhuyi. Eliya yavoola, “Yitsulitsi tsijaka tsine na matsi, mukasuunduli khu shihanwa shiu khusambwa nende tsikhuyi.”

³⁴Yavoola, “Kalushili khukhola,” nivakalushila khukhola. Yavavoolela, “Kalushili khukhola lwa khavaka,” khandi nivakhola lwa khavaka khandi.

³⁵Matsi kakholomokha hasi khundulu khu vwaali, khali nikasumeelitsa mu mutaalo kwenoko.

³⁶Lwa isaa yu khukhola musango halukolovo yali niyakhatukha, Muprofeti Eliya yisuunda khu vwaali nasaala, “Mwami Nyasaye, uli Nyasaye wa Aburahamu, Isaka, nende Yakobo, lekha kamanyikhane nunundi ndi nivi Nyasaye wa Israeli, khandi ndi ninzi murumishi wowo; khandi kholi yaka koosi khulondokhana khu malako koko.

³⁷Mwami Nyasaye, njipa, njipa, khu vandu vali hanu yava vamanye ndi yivi, Mwami Nyasaye, ni Nyasaye, khandi ndi uvakalushitsanga mwene khu yivi.”

³⁸Mwami Nyasaye yalera mulilu hawenaho, nu kusamba shihanwa shiu musango, tsikhuyi, machina, nende malova khandi nu kuminya matsi kavetsanga mu mutaalo.

³⁹Lwa shia mundu wosi yalola kenako, yakwa hasi mahunama; navoola, “Toto, Mwami Nyasaye, ni Nyasaye; Mwami Nyasaye, ni Nyasaye!”

⁴⁰Eliya yavavoolela, “Kumili vaprofeti va Baali. Muprofeti avuli khwilukhakhu khali mulala khuvo.” Vakumila vaprofeti venavo; Eliya nakholomokha natsia navo mu Muchela kwa Kishoni, naviira voosi.

⁴¹Eliya yavoolela Mwami Ahabu, “Simukha utsi khulia nu khung'wa nunundi. Mbulili imbula nihilikananga niyenya khukhuva.”

⁴²Lwa Mwami Ahabu yasimukha natsia khulia nu khung'wa, Eliya yanina ikulu khu Shikulu shia Karameli, wa yikhunamishila hasi, murwi kwekwe nu kuli hakari hi vilenje vievie.

⁴³Eliya yavoolela murumishi wewe, “Simukha utsi khuheenzela khuluveka lwi inyanza.” Murumishi mwenoyo yasimukha natsia, nakalukha, navoola, “Mbulakhu shindu shiandoliyo ni tsimoni tsianje.” Eliya yamuvoolela hali saba atsiyo khuheenza.

⁴⁴Lwa murumishi mwenoyo yali niyakhatsiayo lukhola saba, yavoola, “Nakhalolayo lilesi litititi khuli mukhono ku mundu musatsa, nu kurulanga mu inyanza.” Eliya yavoolela murumishi wewe, “Simukha utsi khu Mwami Ahabu, umuvoolele anini mu likaare lielie liliihe akalushi ingo, imbula nishili khuraanga khukhuva.”

⁴⁵Lwa tsisaa tsindititi tsiali nitsiakhavira, khwali na malesi mamwamu mwikulu, vushindu nuvuranga khuhuutsa, ma imbula inyishi niraanga khukhuva. Ahabu yanina mu likaare lielie, nakalukha mu litaala lia Yezireli.

⁴⁶Mwami Nyasaye yitsulitsa Eliya ni tsingulu tsietsie; yavoha tsinguvu tsietsie mu shisiindi, niyilukhaka natsia mu litaala lia Yezireli, Ahabu nashili khutukhayo.