Read tsotso 1 VAMI 22 Bible Online

1 VAMI 22 - tsotso bible

1 VAMI 22

¹Milembe chiali hakari ha Siria nende Israeli khumihika chivaka, vuchila khukwana.

²Navutswa khumuhika kwa khavaka Mwami Yehoshafati wa Yuda yakholomokha natsia khulola Mwami Ahabu wa Israeli.

³Mwami Ahabu wa Israeli yareeva varumishi veve, “Mwamanyakhu ndi litaala lia Ramotsi lili mu lusomo lwa Gileadi ni lieru, nikhali shindu shiosi shivulakhuho, shia khukholanga khulivukula khurula khu Mwami wa Siria?”

⁴Khu, Mwami Ahabu yareeva Mwami Yehoshafati, “Unyala khutsia ninzi khukwana vandu litaala lia Ramotsi lili Gileadi?” Yehoshafati yamuchipa, “Nzirecheshe, niiva wayirechekha, khali vasikali vaanje nende tsifarasi tsianje tsiu khukwanila.

⁵Navutswa lukhuraanga lwene, leshi khureeve Mwami Nyasaye.”

⁶Nalwo lwa Mwami Ahabu wa Israeli yalaanga halala vaprofeti, himbi vandu tsimia tsine, navareeva, “Nzi khukwana litaala lia Ramotsi lili mu lusomo lwa Gileadi, inoho mbuli khutsia khulikwana?” Vamuchipa, “Simukha utsi khukwana. Mwami Nyasaye aliitsa khukhuha tsingulu tsiu khukuura.”

⁷Navutswa Mwami Yehoshafati yareeva, “Muprofeti wundi alikhuho hanu wa khunyala khureeva akhuvoolele ku Mwami Nyasaye yenyanga khukhole?”

⁸Mwami Ahabu wa Israeli yamuchipa, “Khuliho nu muprofeti wundi mulala ulaangwangwa Mikaya mwana wa Imula. Navutswa namulechela, shichila shiaprofetanga vindu vilahi khulondokhana khwinzi tawe; navutswa shia khase khosi aprofetanga vindu vitamanu khulondokhana khwinzi.” Mwami Yehoshafati yamuvoolela, “Lekha khulomoloma munjila yeneyo!”

⁹Nalwo lwa Mwami Ahabu wa Israeli yalaanga mulala khu varumishi veve, navoola, “Leri vwangu Mikaya mwana wa Imula.”

¹⁰Vami vavili venavo, nivifwali tsikaanzu tsiavo tsiu vwami, vali nivikhale khu visoko viavo viu vwami havundu ha vilulilanga imu, himbi ha shilivwa shi litaala lia Samaria, khandi vaprofeti voosi vali nivaprofetanga imbeli wavo.

¹¹Mulala khu vaprofeti venavo walaangwangwa Zedekia mwana wa Kenahana, yalomba tsinzika khurula khu vivia, navoolela Mwami Ahabu, “Mwami Nyasaye avoolanga, ‘Uliitsa khurumishila tsinzika yitsi khukwana Vasiria nu khuvativitsa voosi.’ ”

¹²Vaprofeti vandi voosi vavoola makhuva malala mele. Vavoola, “Roonjela utsi khukwana litaala lia Ramotsi lili Gileadi khutukha lwa uliitsa khukhura. Mwami Nyasaye aliitsa khukhuha tsingulu tsiu khukuura.”

¹³Nikhali, mundu warumwa khutsia khulaanga Mikaya yamuvoolela, “Vaprofeti voosi vaprofetele Mwami Ahabu malahi, khutukha ukhole malala mele.”

¹⁴Navutswa Mikaya yamuvoolela, “Khwisuuhilanga khuvirila mu lira liu Mwami Nyasaye uli mwoyo ndi kambolela muvoolele, nako kamuvoolela munyi!”

¹⁵Lwa Mikaya yalolekha imbeli wu Mwami Ahabu, Mwami Ahabu yamureeva, “Yivi Mikaya, inzi nende Mwami Yehoshafati khutsi khukwana litaala lia Ramotsi lili mu lisomo lwa Gileadi, inoho khuvuli khutsia khulikwana?” Mikaya yamuchipa, “Ruli mutsi khulikwana. Ni kilikali, muliitsa khukuura, shichila Mwami Nyasaye aliitsa khumuha tsingulu tsiu khukuura.”

¹⁶Navutswa Mwami Ahabu yamuchipa, “Mbolela katoto, lwa ulomolomanga khwinzi khuvirila mu lira liu Mwami Nyasaye. Ni matukhu kanga, kanzililila khukhuvoolela ukhole ndio?”

¹⁷Mikaya yamuchipa, “Ndoli ni tsimoni tsianje vasikali voosi va Israeli, nivasalani mu vikulu, khuli makondi kavula mwayi; Mwami Nyasaye navoola, ‘Vandu yava vavula mwimilili; lekha shia mulala atsi ingo mu milembe.’ ”

¹⁸Mwami Ahabu yavoolela Mwami Yehoshafati, “Shimbele nikhuvoolele, avulakhu shindu shilahi shiaprofetanga khulondokhana khwinzi. Shia khase khosi aprofetanga shindu shitamanu khulondokhana khwinzi!”

¹⁹Khulwa yako, Mikaya yatsililila khuvoola, “Hulishitsa likhuva liu Mwami Nyasaye avoolanga! Nalola Mwami Nyasaye niyikhale mwikulu khu shisoko shieshie shiu vwami, tsinjelosi tsietsie tsiosi, nitsisinjile himbi khuye.

²⁰Mwami Nyasaye yareeva, ‘Ni viina unyala khukaatilitsa Ahabu, khu atsi khukwana litaala lia Ramotsi lili mu lusomo lwa Gileadi, khwiirilwa mu litaala lienelo?’ Tsinjelosi tsindala tsiavoola shindu shilala, na tsindi nitsivoola shindi vutswa,

²¹khutukha lwa roho yalolekha imbeli, nasinjila imbeli wu Mwami Nyasaye, navoola, ‘Namukaata.’

²²Mwami Nyasaye yareeva, ‘Munjila shina.’ Nalwo lwa roho mwenoyo yachipa, ‘Nasimukha nzi khukhola vaprofeti voosi va Ahabu, khuvoola makhuva ku vuvehi.’ Mwami Nyasaye yavoola, ‘Simukha utsi khumukaatilitsa. Ulakuura nutsia khukhola kenako.’ ”

²³Mikaya yamalila navoola, “Yaka nako kikholeshe. Mwami Nyasaye ukholi vaprofeti vovo voosi yavo vakhuvehele. Navutswa ye mwene umali khuviritsa ndi matiinyu kakhukwili!”

²⁴Nalwo lwa Muprofeti Zedekia yasimukha natsia khu Mikaya, namusamula lukhovi khuluseye, nareeva, “Khurula litukhu shina, lwa roho wu Mwami Nyasaye yarula mwinzi nalomoloma khuvirila mu yivi?”

²⁵Mikaya yamuchipa, “Uliitsa khulola kenako, lwa uliitsa khwivisa mwene mukari mwi inzu.”

²⁶Mwami Ahabu wa Israeli yahaana lilako, “Kumili Mikaya, mumukalushitsi khu gavana Amoni wi litaala likali, khandi khu Yohashi mwana wu Mwami Ahabu.

²⁷Vavoolele vamuvohe mucheela, ma vamuliishitsi mukati nende matsi khutukha lwa ngalukha mu milembe.”

²⁸Mikaya yamuvoolela, “Niiva uliitsa khukalukha mu milembe, ni kilikali Mwami Nyasaye shianyala khuva walomoloma khuvirila khwinzi tawe.” Khulwa yako, Mikaya yatsililila navoola, “Munyi voosi, muhulishitsi kamali khuvoola!”

²⁹Mwami Ahabu wa Israeli nende Mwami Yehoshafati wa Yuda, vasimukha nivatsia khukwana litaala lia Ramotsi lili mu lusomo lwa Gileadi.

³⁰Mwami Ahabu wa Israeli yavoolela Mwami Yehoshafati, “Lwa khuva nu khutsitsanga khukwana mu liihe, inzi nimwaminya mwene; navutswa yivi ulifwala tsikaanzu tsiotsio tsiu vwami.” Khulwa yako, Mwami Ahabu wa Israeli yimwaminya mwene, natsia khukwana mu liihe.

³¹Mwami wa Siria yali uvoolele vimilili vavili vavuli va makaare keke kiliihe makhomi kavaka na khukwana mundu wundi wosi, nikakhali Mwami Ahabu wa Israeli.

³²Lwa vimilili va makaare kiliihe venavo, valola Mwami Yehoshafati, voosi vakanakana ndi nu Mwami wa Israeli, nivashiama khumukwana. Navutswa lwa Mwami Yehoshafati yalila,

³³nalwo lwa vamanya ndi shiali Mwami Ahabu wa Israeli tawe; nivalekha khumuhitsanyinya.

³⁴Navutswa mundu wundi yitsukhana nalesi muvanu kwekwe, nalivira Mwami Ahabu wa Israeli mu vikuumba viu mukhono kwekwe. Mwami wa Israeli yavoolela mundu wahilanga likaare lielie liliihe, “Shiaminyila likaare liolio hanu, undulitsi mu liihe, shichila mali khusalilitswa.”

³⁵Lwa liihe liali nilili lilulu muno, Mwami Ahabu yatsililila khuva mu likaare lielie, naheenzanga Vasiria. Masahi karulanga mulikuule lielie karoonyaroonya hasi hi likaare lielie liliihe, nakhutsa khulukolovo khwenokho.

³⁶Lwa liuva liali niliyeelanga, mundu yalanditsa likhuva mu vasikali, navoola, “Shia mundu wosi atsi mu litaala lielie liarulamu; shia mundu wosi atsi mu shivala shiavo!”

³⁷Khulwa yako, Mwami Ahabu yakhutsa. Mmbili kwekwe kwahilwa mu litaala lia Samaria, nu khuyeveelwa iweneyo.

³⁸Likaare lielie liliihe liochitswa mulitavalia lili mu litaala lia Samaria; ma tsisiimbwa nitsikhomba masahi keke, khandi vakhali vakholanga vulaaya nivisinga vene muko, khuli Mwami Nyasaye yali niyavoola kaliitsa khwikholekha.

³⁹Shia shindu shindi shiosi, shiu Mwami Ahabu yakhola, khali makhuva khulondokhana khuli inzu yeye yu vwami yali niyasiaywa na miino ki tsinzeku nende mataala koosi kayumbakha, viahandikwa mu Shitabu shi Tsinyinga shia Vami va Israeli.

⁴⁰Lwa Mwami Ahabu yakhutsa, mwana wewe Ahazia yamiha havukono hehe khuli mwami.

⁴¹Khumuhika kwa khane, lwa Mwami Ahabu wa Israeli yamihanga, Yehoshafati mwana wa Asa yaraanga khwamiha Yuda

⁴²nali ni mihika makhomi kavaka na chiranu; yamiha mu Yerusalemu khumihika makhomi kavili na chiranu. Mama wewe yalaangwangwa Azuba mwana wi shikhana wa Shilihi.

⁴³Mwami Ahazia yakhola likhola liu vulunji imbeli wu Mwami Nyasaye, khuli tata wewe Asa yakholanga; navutswa yambakhana khusambula havundu ha vandu vasaalilanga; vandu vatsililila khukhola misango nivasambilayo vubani.

⁴⁴Yehoshafati yalomba khandi milembe nu Mwami wa Israeli.

⁴⁵Shia shindu shindi shiosi, shia Yehoshafati yakhola, vucheli vwevwe vwosi nende mahe keke ka yakwana, viahandikwa mu Shitabu shi Tsinynga shia Vami va Yuda.

⁴⁶Yiira vandu vasatsa nende vakhali voosi vakholanga vulaaya, varumikhanga ha vwaali vwa vandu vali nivambakhana khusuuvila mu Nyasaye vali nivarikalayo, khali khurula lwa tata wewe Asa yali niyamihanga.

⁴⁷Lusomo lwa Edomu shiulwalikhu nu mwami wosi tawe; mundu warovolwa nu Mwami wa Yuda khukhonyana khwamiha.

⁴⁸Mwami Yehoshafati yumbakha tsimeli tsiu khwelemela mu inyanza khutsia mu shivala shia Ofiri khuvukulayo itsahabu; navutswa tsionoshela mu litaala lia Ezioni-geberi nivavula khwelema.

⁴⁹Mwami Ahazia wa Israeli yahuchilila vandu veve khwelema na vandu va Yehoshafati, navutswa Yehoshafati yambakhana khumuhuchilila.

⁵⁰Yehoshafati yakhutsa, mmbili kwekwe nu kuyeveelwa mu vilindwa via vandu vi inzu yu vwami mu litaala likali lia Daudi; ma mwana wewe Yehoramu, niyamiha havukono hehe khuli mwami.

⁵¹Khumuhika kwi likhomi na saba, lwa Mwami Yehoshafati wa Yuda yamihanga, Ahazia mwana wa Ahabu yaraanga khwamiha Israeli; yamiha mu litaala lia Samaria khumihika chivili.

⁵²Mwami Ahazia yakhola vindu vitamanu imbeli wu Mwami Nyasaye; yalonda mwiima mutamanu kwa tata wewe Ahabu, kwa mama wewe Yezebeli, khandi kwa Mwami Yerobohamu, vachila Vaisraeli nivakhola vwoni.

⁵³Mwami Ahazia yasaala khu Baali, khandi namurumishila; khandi nachila Mwami Nyasaye, uli Nyasaye wa Israeli nava nu vurima, khuli tata wewe yakholanga.