Read tsotso 1 VAMI 8 Bible Online

1 VAMI 8 - tsotso bible

1 VAMI 8

¹Nalwo lwa Mwami Solomoni yalaanga halala vimilili voosi vi tsimbia nende tsinzivulu tsia Israeli khwitsa khuye mu Yerusalemu khu vavukuli Lisanduku li Lilakano liu Mwami Nyasaye, khurula Sayoni, nilili litaala likali lia Daudi, khulihila mu Litempeli.

²Voosi vakana halala lwa vali nivali mu Mulukha kwa Matiili mu mweli kwa saba, nu kuli mweli kwa Etsanimu.

³Lwa vimilili voosi va Israeli vali nivakhavukana halala, vasalisi vachinga ikulu Lisanduku li Lilakano;

⁴manivalichinga khulihila mu Litempeli. Vandu vuluhia lwa Levi nende vasalisi vasuunda khandi Liheemo Litakatifu nende vindu vialio viosi mu Litempeli.

⁵Mwami Solomoni nende Vaisraeli voosi vakanila imbeli wi Lisanduku li Lilakano, manivasinzilaho makondi manyishi nende tsing'ombe tsinyishi -- tsinyishi khuli musango -- tsikhanyala khuvula khuvalitswa.

⁶Khulwa yako, vasalisi vachinga Lisanduku li Lilakano liu Mwami Nyasaye, nivalihila mu Litempeli khandi nivalivikha Havundu Hatakatifu Hene, hasi hi vilombe vi tsimbaha.

⁷Tsimbaha tsiavio tsiaraambiha tsiakhunikha lisanduku nende misala chia varumishilanga khuchinga.

⁸Mundu wosi yasinjilanga imbeli wa Havundu Hatakatifu Hene, yalolanga khu tsindulu khwi misala chienecho; navutswa khurula havundu handi hosi tawe. (Khali misala chienecho chishiliho matukhu kanu.)

⁹Shindu shivulakhuho shiali mu Lisanduku li Lilakano nikakhali machina kavili kakhongwa, ka Musa yali niyavikhaho ha Shikulu shia Sinai, lwa Mwami Nyasaye yakhola lilakano Vaisraeli, lwa vali nivarulanga mu shivala shia Misri.

¹⁰Lwa vasalisi vali nivarulanga Havundu Hatakatifu, malesi kitsula shia havundu hosi mu Litempeli liu Mwami Nyasaye,

¹¹shichila vukhumi vu Mwami Nyasaye, vwali shia havundu hosi mu Litempeli lienelo, nivavula khukalukhamu khukhola mihinzilu chiavo.

¹²Khu, Solomoni yasaala, “Mwami Nyasaye, nivi wamala khurechekha liuva mwikulu, nikhali warovola khumenya mu shisuundi tititi.

¹³Mali khumbashila yivi Litempeli lilahi liene, havundu hoho ha umenya mihika ni mihika.”

¹⁴Lwa Vaisraeli voosi vali nivasinjileho, Mwami Solomoni yishevukha navaheenza, khandi nakasitsa vandu venavo voosi.

¹⁵Nalwo lwa Solomoni yavoola, “Khwitsominyi Mwami Nyasaye, uli Nyasaye wa Israeli! Umali khurweshitsa lilaaka lia yalaaka tata wanje Daudi; lwa yavoola,

¹⁶‘Shili khurovolakhu litaala liosi, shia havundu hosi mu vandu vi tsimbia tsiosi tsia Israeli, ha Litempeli linyala khumbakhwa khuva havundu ha vandu valiitsa khusaala khwinzi, khuraanjila khulitukhu lia narulitsa vandu vaanje mu shivala shia Misri. Navutswa narovola Daudi khwamiha vandu vaanje.’ ”

¹⁷Nalwo lwa Solomoni yatsililila navoola, “Tata wanje Daudi yaloshitsa khumbakha Litempeli, khuva havundu ha vanyala khusaala khu Mwami Nyasaye, uli Nyasaye wa Israeli;

¹⁸navutswa Mwami Nyasaye yamuvoolela, ‘Wali ninganakani indahi mu mwoyo kwokwo, lwa wenyanga khunzumbashila Litempeli;

¹⁹nikhali shiali nivi utsitsanga khumbakha Litempeli lienelo tawe. Mulala khu vaana vovo va wivula, neye uliitsa khuliumbakha havukono hoho.’

²⁰“Mwami Nyasaye umali khurweshitsa nunundi lilaaka lielie, lia yali niyalaaka. Mali khwamiha havukono ha tata wanje, khuli Mwami wa Israeli; khandi mali khumbakha Litempeli, khuva havundu ha vanyala khusaala khu Mwami Nyasaye, uli Nyasaye wa Israeli.

²¹Mbani havundu mu Litempeli lienelo, ha vanyala khuvikha Lisanduku li Lilakano lili na machina kakhongwa ki lilakano liu Mwami Nyasaye yakhola na vakuuka veru, lwa yavarulitsa mu shivala shia Misri.”

²²Nalwo lwa Solomoni yasinjila imbeli wu vwaali vu Mwami Nyasaye imbeli wa vandu voosi, nachinga ikulu mwikulu makhono keke,

²³nasaala, “Mwami Nyasaye, uli Nyasaye wa Israeli, Nyasaye wundi avulakhuho khuli yivi ikulu mwikulu inoho hasi khulilova! Urweshitsilanga vandu vovo lilaaka liolio, khandi umanyinya ndi wa vayaanza lwa valondanga nu mwoyo kwosi malako koko.

²⁴Umali khurweshitsa lilaaka lia walaaka tata wanje Daudi; umali khurweshitsa nunundi shia likhuva liosi lia walomoloma.

²⁵Khulwa yako, Mwami Nyasaye, uli Nyasaye wa Israeli, saalanga ndi urweshitsi lilaaka lindi lia walaaka tata wanje Daudi, lwa wamuvoolela ndi mulala khu vitsukhulu veve aliitsa khwamiha shia khase khosi khuli Mwami wa Israeli, niiva valiitsa khuva vacheli khulonda malako koko, khuli tata wanje Daudi yakholanga.

²⁶Khulwa yako, yivi Nyasaye wa Israeli, rweshitsa shia shindu shiosi, shia walaaka tata wanje Daudi, nali murumishi wowo.

²⁷“Navutswa Nyasaye anyala khumenya khulilova? Khali shianyala khutukha mwikuli, mwakhavambalala tawe. Litempeli lia mali khumbakha yili, linyala khuva munjila shina livambalalu?

²⁸Mwami Nyasaye, uli Nyasaye wanje, ninzi murumishi wowo. Hulishitsa lisaala lianje, khandi ukholele nunundi ka khureevanga.

²⁹Heenza khu Litempeli yili mbasu nu vutukhu, havundu umali khurovola, khuva ha vanyala khusaala khu yivi. Umbulili lwa mbenzanga khu Litempeli yili, nisaala khu yivi.

³⁰Hulila lisaala lianje khandi lisaala lia vandu vovo, lwa vaheenzanga havundu hanu nivasaala. Khuhulile nuli hango hoho mwikulu, ukhusemehe.

³¹“Lwa mundu akholela wundi shindu shitamanu, khandi vamulere ha vwaali vwovwo mu Litempeli yili, khwitsa khwisuuha ndi avulakhu shindu shitamanu shiakholi,

³²yivi Mwami Nyasaye, hulishitsa nuli mwikulu, khandi ukhalachili murumishi wowo. Salilitsa mundu ukholi shindu shitamanu, khuli kenyekhanga, uvoholole mundu uvula vutamanu vwosi.

³³“Lwa Vaisraeli vovo vakuurwa na vatsiku vavo, shichila vakholi vwoni imbeli wowo, khandi vakalushi khu yivi nu khwitsa mu Litempeli, nivasaalanga khuvirila munjila yu khwichehitsa nivareevanga khusemehwa,

³⁴vahulishitsi nuli mwikulu. Semeha vandu vovo vwoni, uvakalushitsi mu shivala shia wali nuwaha vakuuka vavo yishi.

³⁵“Lwa wikalila imbula khuvula khukhuva, shichila vandu vovo vakholi vwoni imbeli wowo, khandi lwa vikanila nivaheenza khu Litempeli yili, nivasaalanga khuvirila munjila yu khwichehitsa khu yivi,

³⁶vahulishitsi nuli mwikulu. Semeha mwami nende Vaisraeli vwoni vwavo. Vechitsi khukhola likhola liu vulunji. Mwami Nyasaye, ruma imbula mu shivala shioshio yishi, shia waha vandu vovo vamenyemu khumatukhu koosi.

³⁷“Lwa inzala iliitsa khuva nili mu shivala inoho matiinyu, inoho viraakwa khwononyinywa nu vushindu vuli ni tsingulu tsinyishi inoho tsisichi, inoho lwa vatsiku vakwananga vandu vovo, inoho vulwale khuvaho inoho lukhutsu muvo,

³⁸hulishitsa lisaala liavo. Niiva mulala khu vandu vovo Israeli, khurulana vuveleli mu mwoyo kwekwe, aliitsa khuchinga ikulu mwikulu makhono keke; nasaalanga naheenzi khu Litempeli yili,

³⁹hulishitsa lisaala lielie. Vahulishitsi nuli hango hoho mwikulu, uvasemehe khandi wu vakhonye. Nivi wonyene wamanya ku mundu akanakananga mu mwoyo kwekwe. Kholela shia mundu wosi, khulondokhana khu ka yenyanga khukholelwa.

⁴⁰Nalwo lwa vandu vovo valiitsa khukhuha luyali khumatukhu koosi, ka vashili mwoyo mu shivala shia waha vakuuka veru.

⁴¹“Khali lwa mundu mucheni wosi, ukhali mulala khu vandu venyu Israeli arula mu shivala ihale wene, khwitsa khusaala khuvirila khu lira liolio li tsingulu --

⁴²shichila vandu valiitsa khuhulila makhuva khulondokhana khu luyali lwolwo lwi tsingulu, khandi vindu viu khuchenyinya via wakholela vandu vovo -- lwa yitsa khusaala naheenzi khu Litempeli yili,

⁴³hulishitsa lisaala lielie. Uhulile khandi ukhole ka yenyanga nuli mwikulu, mwa wumenyanga, khu vandu mu shivala valikhumanya nu khulonda malako koko, khuli vandu vovo Israeli vakholanga. Nalwo lwa valiitsa khumanya khandi ndi Litempeli lia mali khumbakha yili, naho havundu ha vasaalanga khu yivi.

⁴⁴“Lwa vandu vovo vatsia mu liihe khukwana vatsiku vavo, shia havundu hosi ha uliitsa khuvaruma, khandi lwa vasaala khu yivi nivaheenzi mu litaala likali lia warovola yili nende Litempeli lia nakhumbashila yili,

⁴⁵hulishitsa lisaala liavo. Vahulili nuli mwikulu, uvahe tsingulu tsiu khukuura muliihe.

⁴⁶“Lwa vandu vovo vakholela yivi vwoni -- shichila mundu avulakhuho wakhakhola vwoni -- ma uvalolele vurima nu khulekha vatsiku vavo khuvakuura, khandi khuvahila khuva vavohe mu shivala shindi, khali niiva shivala shienesho shili ihale wene inoho himbi;

⁴⁷hulishitsa lisaala liavo. Niiva valikanila nivamenyanga mu shivala shienesho, khandi vasaale khu yivi, nivavoolanga havulavu vakhola vwoni nende vindu vitamanu, yivi Mwami Nyasaye, uhulishitsi lisaala liavo.

⁴⁸Niiva valikanila nu mwoyo kwosi nivamenyanga mu shivala shienesho, ma vasaale khu yivi nivaheenzanga mu shivala shia waha vakuuka vavo yishi, litaala likali lia warovola yili, nende Litempeli lia nakhumbashila yili,

⁴⁹hulishitsa lisaala liavo. Vahulili nuli hango hoho mwikulu, uvalolele tsimbavasi.

⁵⁰Uvasemehe vwoni vwavo vwosi; khandi ukhole vatsiku vavo khuvalolela tsimbavasi.

⁵¹Navo vandu vovo yivi mwene; nivi mwene wa varulitsa mu shivala shia Misri, shili khuli lijiko liakhanga mulilu.

⁵²“Yivi Mwami Nyasaye, saalanga ndi ukholele vandu vovo Israeli nende mwami wavo malahi, khandi uhulishitsi lisaala liavo, lwa vasaalanga khu yivi wu vakhonye.

⁵³Nivi wavarovola khurula mu vandu vandi voosi khulilova, khu vave vandu vovo mwene, khuli lwa wavoola khuvirila khu murumishi wowo Musa ndi warovola Israeli, khurula mu vandu vandi voosi, lwa warulitsa vakuuka veru mu shivala shia Misri.”

⁵⁴Lwa Solomoni yali namali khusaala khu Mwami Nyasaye, yasinjila narula imbeli wu vwaali, ha yali nasikamenje nachinji mwikulu makhono keke.

⁵⁵Yasaalila Vaisraeli voosi vanyole tsikhaavi tsia Nyasaye, lwa yalomoloma nu mwoyo mukali. Solomoni yavoola,

⁵⁶“Khwitsominyi Mwami Nyasaye uheele Vaisraeli milembe, khuli yali niyalaaka aliitsa khukhola. Umali khurweshitsa lilaaka lielie lilahi liosi, lia yali niyalaaka khuvirila khu murumishi wewe Musa.

⁵⁷Nzikombanga ndi Mwami Nyasaye, uli Nyasaye weru ave na khutsi, khuli yavetsanga na vakuuka veru. Nzikombanga ndi avuli khukhulekha inoho khukhwivilila.

⁵⁸Nzikombanga ndi akhukhole khulonde malako keke, mechitso, nende mivaalo keke, khu khutsililile khumenya shia khase khosi, khulondokhana khuli yenyanga khumenye; khandi khutsililile khurweshitsa malako koosi, nende makhuva koosi ka yavoolela vakuuka veru khukhole.

⁵⁹Nzikombanga ndi Mwami Nyasaye, uli Nyasaye weru, atsililile khwitsushitsa lisaala yili nende makhuva kandevi akhole khumatukhu koosi. Nzikombanga ndi shia khase khosi, alolele tsimbavasi Vaisraeli nende mwami wavo, khulondokhana khuli venyanga shia litukhu.

⁶⁰Nzikombanga ndi vandu vi tsimbia tsiosi khulilova vamanye ndi Mwami Nyasaye, neye Nyasaye wonyene -- avulakhuho wundi.

⁶¹Navutswa nzikombanga ndi munyi, vandu veve mutsililile khuva vasuuvilwa khu Mwami Nyasaye, uli Nyasaye weru shia khase khosi, mulonde mechitso keke nende malako keke koosi, khuli mukholanga nunundi.”

⁶²Mwami Solomoni nende Vaisraeli voosi valiho vakhola misango khu Mwami Nyasaye.

⁶³Solomoni yasinza tsing'ombe tsiheelefu makhomi kavili na tsivili nende makondi tsiheelefu imia indala na makhomi kavili, khuli vihanwa viu khulera milembe. Mwami Solomoni nende Vaisraeli voosi vakhola Litempeli khuva litakatifu.

⁶⁴Khulitukhu lilala lienelo, Mwami Solomoni yatakasa luveka lwa hakari lu lwanyi, havundu hali imbeli wi Litempeli; khandi nakholelayo misango chi vihanwa viu khusambwa, vihanwa vi imu, nende shivana shi miruku chi vihanwa viu khulera milembe. Yakhola ndio, shichila vwaali vwalombwa khu mukasa, vwali vwacheha muno khuhaanilakhu vihanwa vienevo viosi.

⁶⁵Nalwo lwa Solomoni nende Vaisraeli voosi, vikhoyela Mulukha kwa Matiili khumatukhu saba mu Litempeli mwenomo. Khwaliho ni shituma shia vandu vanyishi khurula khali khuluveka luli ivuluka wi Injila ya Hamaatsi nende mupaka kwi shivala shia Misri khuluveka luli ikuvanda.

⁶⁶Solomoni yaseevula vandu khurulaho khulitukhu lia munane. Voosi vitsominya Mwami Solomoni, nivatsia ingo. Vali ni likhoya linyishi muno, khandi nivasangala shichila vindu viosi vilahi, viu Mwami Nyasaye yali nakholele murumishi wewe Daudi nende Vaisraeli.