Read tsotso 2 VAMI 19 Bible Online

2 VAMI 19 - tsotso bible

2 VAMI 19

¹Lwa Mwami Hezekia yahulila makhuva kenako, yarandula tsinguvu tsietsie, navelele mu mwoyo. Yifwala tsinguvu tsia makunia, natsia mu Litempeli liu Mwami Nyasaye.

²Yaruma Eliakimu nali mwimilili wi inzu yu vwami, mukarani Shebuna nende vasalisi vakali, voosi nivifwali tsinguvu tsia makunia, khutsia khu Muprofeti Isaya mwana wa Amozi.

³Vavoolela Isaya, “Nunundi ni litukhu liu khunyakhana, khusalilitswa nu khukholelwa tsisoni. Khulolekhanga khuli mukhali wivulanga mwana, navutswa avula tsingulu tsiu khwivula.

⁴Kali havulavu ndi Mwami wa Ashuria umali khuruma mwimilili wa vasikali veve khwitsa khunyeka Nyasaye uli mwoyo. Mwami Nyasaye, uli Nyasaye wowo ahulili manyeko kenako, khandi asalilitse vandu vanyekana. Khulwa yako, usaale khu Nyasaye ahonyinyi valala khu vandu veru varikala nivashili mwoyo.”

⁵Lwa varumishi vu Mwami Hezekia vatukha khu Muprofeti Isaya,

⁶Isaya yavavoolela, “Mwami Nyasaye yenyanga mutsi khuvoolela muruchi wenyu, ‘Lekha khuria shichila makhuva kamali khuhulila, ku murumishi wu Mwami wa Ashuria alomolome, khulu khumurishitsa.

⁷Mwami Nyasaye aliitsa khukhola Mwami wa Ashuria, khuhulila likhuva linyala khuchila akalushi mu shivala shieshie; khandi liliitsa khuchila yiirilwiyo ni shivavi.’ ”

⁸Lwa mwimilili wa vasikali mwenoyo, yavoolelwa ndi Mwami wa Ashuria umali khurula mu litaala lia Lakishi, yarulaho nanyola Mwami wa Ashuria nakwananga vandu vi litaala lia Libuna.

⁹Mwami Senakeribu yahulila makhuva ndi Mwami Tirihaka, nali Muetsopia wimililanga vasikali va Misri, uroonjele na vasikali veve khwitsa khumukwana, yaruma varumwa khandi khu Mwami Hezekia wa Yuda, khumuvoolela,

¹⁰“Lekha khuhuchililakhu nyasaye wowo wa usuuvililamu khukhukaata ndi litaala likali lia Yerusalemi, liliitsa khuvula khuvukulwa nu Mwami wa Ashuria.

¹¹Katoto wahulila vindu via vami va Ashuria vakhola vivala viosi, khuli vavitivitsa vutswa. Ulolanga uliitsa khuhonyinywa toto?

¹²Vakuuka vaanje vapomolanyinya mataala ka Gozani, Harani, nende Resefu, niviira vandu va Betse-deni vamenyanga mu litaala lia Telasari; khali mulala khu misambwa chiavo kuvulakhuho kwa vahonyinyakhu.

¹³Ni hena ha vami va mataala ka Hamaatsi, Arupada, Sefarivahimu, Hena, nende Iva vali?”

¹⁴Mwami Hezekia yanyola ibarwa khurula khu vandu varumwa venavo nachisoma. Nalwo lwa yasimukha natsia mu Litempeli, navikha ibarwa yeneyo imbeli wu Mwami Nyasaye,

¹⁵nasaala, “Mwami Nyasaye, uli Nyasaye wa Israeli, wikhalanga khu shisoko shiu vwami hakari ha hi vilombe vi tsimbaha, nivi Nyasaye wonyene, wamihanga vami vwosi khulilova. Nivi waloonga likulu nende lilova.

¹⁶Mwami Nyasaye, lolakhu nunundi vindu vikholekhanga khu khutsi. Hulishitsa shia shindu shiosi shiu Mwami Senakeribu alomolomanga khukhunyeka yivi Nyasaye uli mwoyo.

¹⁷Mwami Nyasaye, khutsi voosi khwamanya ndi vami va Ashuria vamala khutivitsa vandu vi tsimbia tsinyishi, nu khwononyinya vivala viavo,

¹⁸khandi khusamba misambwa chiavo, chia khalolekhanga khuvula khuva misambwa, navutswa vifwanani vi misala nende machina via vandu valomba.

¹⁹Mwami Nyasaye, uli Nyasaye weru, umali khukhuhonyinya khurula khu Vashuria, khukhola vandu vi tsimbia tsiosi khulilova vamanye ndi nivi Mwami Nyasaye, uli Nyasaye wonyene.”

²⁰Nalwo lwa Isaya mwana wa Amozi, yaruma likhuva khu Mwami Hezekia, navoola, “Mwami Nyasaye, uli Nyasaye wa Israeli avoolanga: Mali khuhulila lisaala liolio, shichila Mwami Senakeribu wa Ashuria.

²¹Yili nalio likhuva liu Mwami Nyasaye avoolanga khuye: Munyi vandu va Sayoni, amuchayanga, amusekhanga; asung'usanga murwi kwekwe shichila munyi vandu va Yerusalemi.

²²Ni viina wa wakholela shihenye henye khandi nunyeeka? Ni viina wa wichinjililanga nulaanjilila khandi nu wilolela? Ninzi Nyasaye Mutakatifu wa Israeli!

²³Waruma vandu vovo khwitsa khukholela Mwami Nyasaye shihenye henye, nuvoola: Natikulukha khu vutoonje vwi vikulu, na makaare kaanje kiliihe, khutsia khutukha khu vikulu via Lebanoni. Nayeelitsa misala chia ceda miraambi chiliyo, khandi mitarakwa milahi chiene khali ninzinjila mukari mwene khali mukari mu muliru kwi misala miraambi kwenoko.

²⁴Nayeva visima nung'wa matsi ka vandu vi tsimbia tsindi, khali nikhaminya michela chiosi chia Misri, lwa nasena muko ni vilenje vianje.

²⁵“Ushili khuhulilakhu ndi nali naloshitsa khukhola kenako khurula khale? Kakholi nunundi, nako ka nali naloshitsa khukhola khurula khale, Nakhuha tsingulu tsiu khukalukhanyinya mataala ki tsimbinga khukwa vituma via mataala kapomolanyinywa.

²⁶Vandu vamenyayo vali vavwa tsingulu; vaheenda mwoyo nivaria; vakwa khuli viraakwa mu mulimi, khuli vunyasi vunyelele. Khuli vunyasi khu visechese vi tsinzu; vwaniala nuvushili vuvisi.

²⁷“Namanya shia shindu shiosi khu yivi, shia shindu shiosi shia wu kholanga, khali shia ukhakholanga. Namanya khuli luli mululu shichila inzi.

²⁸Lwa uli mululu khwinzi khandi mbulili makhuva khuli uli mwiloli, niitsa khuvikha ingaka yanje muliulu liolio khandi inanga yanje mu munwa kwokwo; khukalushitsi khuvirila khu muhaanda mulala kwene kwa witsilakhu.”

²⁹Nalwo lwa Isaya yavoolela Mwami Hezekia, “Yishi nashio shimanyilu shi shindu shiliitsa khwikholekha. Muhika kunu nende kulondakhu, uliitsa khulia imu yumbulimu yimeelela yonyene; navutswa muhika kulondakhu uliitsa khuraaka imu yoyo, nu khuchesa. Uliitsa khandi khuraaka misabibu nu khulia matunda ku musabibu.

³⁰Yavo vamenyanga Yuda valiitsa khwihonolokha khandi vaneere khuli viraakwa vimeelanga miili nichitsia mu mukari malova, nu khwama matunda.

³¹Khuliitsa khuva na vandu mu Yerusalemi khandi khu Shikulu shia Sayoni valiitsa khwihonolokha, shichila Mwami Nyasaye ali nu vunyali vu khukhola kenako.

³²“Mwami Nyasaye uvooli likhuva lielie shichila Mwami wa Ashuria, ‘Shialiitsa khwinjilakhu mu litaala, inoho khulesa khali muvanu mulala mulio tawe. Musikali wosi aliitsa khuvula khwisuundakhu himbi mu litaala yili nali ni ingavo. Masisi ku khwishinga kaliitsa khuvula khumbakhwa khulivotokhana.

³³Aliitsa khukalushila khu muhaanda mulala kwene kwa yitsilamu, vuchila khwinjila mu litaala yili. Inzi Mwami Nyasaye mali khuvoola.

³⁴Niitsa khushinga litaala yili, nu khulihonyinya, shichila luyali lwanje mwene khandi shichila lilaaka, lia yali niyalaaka murumishi wanje Daudi.’ ”

³⁵Muvutukhu vwenovo, injelosi yu Mwami Nyasaye, yasimukha nitsia havundu ha vasikali vamenyanga mu maheemo, niyiira vasikali tsiheelefu imia indala makhomi munane na varanu. Khulitukhu lilondakhu mu mavwevwe, valaakalalayo, voosi nivamali khukhutsa!

³⁶Nalwo lwa Mwami Senakeribu wa Ashuria yasalanyinya vasikali mu maheemo ka vamenyamu, narulayo. Yakalukha mu litaala lia Nineve, namenyayo.

³⁷Khulitukhu lindi, vavili khu vaana veve, nivali Adurameleki nende Sharezeri vamwiira ni vivavi viavo; lwa yali nasaalanga khu musambwa kwekwe kwa Nisiroki. Vilukha nivatsia mu shivala shia Ararati. Mwana wewe wundi Esari-hadoni yamiha havukono hehe khuli Mwami wa Ashuria.