Read tsotso 2 VAMI 21 Bible Online

2 VAMI 21 - tsotso bible

2 VAMI 21

¹Manaase yali nali ni mihika likhomi na chivili, lwa yakwa Mwami wa Yuda. Yamiha mu Yerusalemi khumihika makhomi kane na chiranu. Mama wewe yalaangwangwa Hefiziba.

²Manaase yakhola vindu vitamanu imbeli wu Mwami Nyasaye, shichila yalonda vikholwa vi tsisoni, via vandu vi tsimbia tsiu Mwami Nyasaye yakhunganyinya khurula mu shivala shienesho vakholanga; lwa vandu veve visuundanga mushio.

³Hezekia yumbakha khandi havundu ha vandu vasaalanga khu misambwa, ha tata wewe yali ni yasambulanyinya. Yumbakha vwaali khusaala khu musambwa kwa Baali, nalomba shifwanani shiu musambwa kwi shikhali kwa Ashera, khuli Mwami Ahabu wa Israeli yali niyakhola. Manaase yasaala khandi khu tsinyining'ini.

⁴Yumbakha vwaali mu Litempeli liu Mwami Nyasaye, havundu wu Mwami Nyasaye yali niyavoola naho ha valiitsa khusaala khuye.

⁵Hezekia yumbakha vwaali khusaala khu tsinyining'ini mu tsilwanyi tsivili tsi Litempeli liu Mwami Nyasaye.

⁶Yahaana mwana wewe wi shiyayi, khuli shihanwa shiu khusambwa shiu musango. Yakhola vwoni vunyishi imbeli wu Mwami Nyasaye; khali namukhola khuva nu vurima.

⁷Yavikha shimanyilu shiu musambwa kwi shikhali kwa Ashera mu Litempeli, ni hali havundu wu Mwami Nyasaye yavoolela Daudi nende mwana wewe Solomoni makhuva yaka, “Mu Litempeli linu, hanu mu Yerusalemu, naho havundu hamali khurovola mu tsisomo tsiosi tsia vandu vi tsimbia likhomi na tsivili tsia Israeli, khuva havundu ha valiitsa khusaalilanga.

⁸Niiva Vaisraeli valiitsa khulonda lilako lianje liosi, varweshitsi malako koosi ku murumishi wanje Musa yavaha, khu shinyala khulekhakhu vakhunjwi khurula mu shivala, shia nahaana khu vakuuka vavo tawe.”

⁹Navutswa vandu venavo vambakhana khulonda malako ku Mwami Nyasaye; ma Manaase navimilila khukhola vwoni vunyishi khuvira vwoni vwa vandu vi tsimbia tsiu Mwami Nyasaye, yali niyakhunga mu shivala shienesho, lwa vandu veve visuundanga mushio.

¹⁰Mwami Nyasaye yavoola khuvirila mu varumishi veve, nivali vaprofeti,

¹¹“Mwami Manaase wa Yuda umali khukhola vwoni vwi tsisoni yuvu. Ukholi vindu vinyishi vitamanu muno, khuvira via Vaamori vakholanga; khandi uchili vandu va Yuda khukhola vwoni khuvirila mu misambwa chiechie.

¹²Khulwa yako, inzi Mwami Nyasaye wa Israeli, niitsa khulerela vandu va Yerusalemi nende Yuda matiinyu kaliitsa khukhola vandu valiitsa khuhulila vatechele.

¹³Niitsa khusalilitsa vandu vamenyanga mu litaala lia Yerusalemi, khuli nasalilitsa litaala lia Samaria, khuli nasalilitsa Mwami Ahabu wamihanga lusomo lwa Israeli halala na vitsukhulu veve. Niitsa khumulula vandu vamenyanga mu Yerusalemi, vanihu khuli isahani yavochitsi nu khuchikhunikha hasi.

¹⁴Niitsa khulekha vandu valiitsa khwihonolokha; nu khuvalera mu makhono ka vatsiku vavo. Valiitsa khuvakuura nu khuvayaaya shia shindu shiosi, khurula mu shivala shiavo.

¹⁵Niitsa khukhola vandu vaanje kenako, shichila vakholele vindu vitamanu, khali vanombi khuvalolela vurima, khuraanjila khulitukhu lia vakuuka vavo varula mu shivala shia Misri, khutukha nunundi.”

¹⁶Nikhali, Manaase yiira vandu vanyishi vali nivavula vutamanu vwosi, khali masahi nikasalana shia havundu hosi mu tsinjila tsia Yerusalemi. Yakhola ndio, khumeeta khu ka yali nakholi lwa yachila vandu va Yuda, nivakhola vindu vitamanu imbeli wu Mwami Nyasaye.

¹⁷Shia shindu shindi shiosi, shia Manaase yakhola, khali khumeetakhu vwoni vwevwe vwa yali nakholi, viahandikwa mu Shitabu shi Tsinyinga shia Vami va Yuda.

¹⁸Manaase yakhutsa, nayeveelwa mu mulimi kwi inzu yu vwami, mulimi kwa Uza. Mwana wewe Amoni yamiha havukono hehe khuli mwami.

¹⁹Amoni ya nali ni mihika makhomi kavili na chivili, lwa yaraanga khwamiha. Yamiha mu Yerusalemi khumihika chivili. Mama wewe yalaangwangwa Meshulemetsi, mwana wi shikhana wa Haruzi, wi litaala lia Yotiba.

²⁰Yakhola vindu vitamanu imbeli wu Mwami Nyasaye, khuli tata wewe Manaase yali niyakhola.

²¹Yalonda mwiima kwa tata wewe, khandi narumishila misambwa chia tata wewe yarumishilanga, nu khusaala khuchio.

²²Amoni yivilila Mwami Nyasaye, uli Nyasaye wa vakuuka veve, niyambakhana khulonda malako ku Mwami Nyasaye.

²³Varumishi va Amoni vamwikhalila nivenya khumwiira, nivamwiirila mu inzu yu vwami.

²⁴Navutswa vandu va Yuda viira vandu voosi vali niviira Amoni; nivamihitsa Yosia mwana wewe khuva mwami.

²⁵Shia shindu shindi shiosi, shia Amoni yakhola viahandikwa mu Shitabu shi Tsinyanga shia Vami va Yuda.

²⁶Amoni yayeveelwa mu vilindwa vili mu mulimi kwa Uza; mwana wewe Yosia niyamiha havukono hehe khuli mwami.