Read tsotso 2 VAMI 3 Bible Online

2 VAMI 3 - tsotso bible

2 VAMI 3

¹Khumuhika kwi likhomi na munane, lwa Mwami Yehoshafati wa Yuda yamihanga, mwana wa Ahabu yalaangwangwa Yoramu, yakwa Mwami wa Israeli. Yamiha mu litaala lia Samaria khumihika likhomi na chivili.

²Yakhola vindu vitamanu imbeli wu Mwami Nyasaye. Navutswa yambakhana khulonda mwiima kwa tata wewe inoho mama wewe vali nivakhola. Yasambulanyinya shimanyilu shi lichina litakatifu lia tata wewe, yali niyalomba khusaala khu Baali.

³Nikhali, yatsililila khukhola vwoni vwa Yerobohamu mwana wa Nebati yakhola, khandi nachila Vaisraeli nivakhola vwoni. Yambakhana khulekhana nu vwoni vwenovo.

⁴Mwami Mesha wa Moabu yali wavaya makondi; yaheetsanga Mwami wa Israeli vimeme tsiheelefu imia indala nende vwoya khurula mu mamiiko tsiheelefu imia indala.

⁵Navutswa lwa Mwami Ahabu yali niyakhutsa, Mwami Mesha yahinganyinya Mwami wa Israeli.

⁶Mumatukhu kenako, Mwami Yoramu yarula mu litaala lia Samaria, nalaanga halala vasikali veve voosi.

⁷Mwami Yoramu yaruma khandi likhuva khu Mwami Yehoshafati wa Yuda, navoola, “Mwami wa Moabu umali khumbinganyinya. Unyala khwitsa khukhonya khukwana Moabu?” Mwami Yehoshafati yamuchipa, “Niitsa khukhukhonya khukwana. Inzi ndi vutswa khuli yivi, vandu vaanje khuli vandu vovo, tsifarasi tsianje khuli tsifarasi tsiotsio.

⁸Khunyala khuvirila khunjila shina khutsia khukwana?” Mwami Yoramu yamuchipa, “Khutsitsanga khuvirila mwichendanyama mwa Edomu.”

⁹Nalwo lwa Mwami Yoramu nende vami va Yuda nende Moabu vasimukha nivatsia. Lwa vali nivakhachenda khumatukhu saba, vavula matsi ka vang'wa, khali vasikali inoho miruku chiavo.

¹⁰Mwami Yoramu yahuka, “Ni shina! Mwami Nyasaye umali khulaanga khutsi vami vavaka, khu Mwami wa Moabu akhukuuri?”

¹¹Mwami Yehoshafati yareeva, “Muprofeti alikhuho hanu wa khunyala khutsia khureeveshitsa khu Mwami Nyasaye khuvirila khuye?” Mwimilili wa vasikali vu Mwami Yoramu yachipa, “Mwana wa Shafati ulaangwangwa Elisha ali hanu. Neye wakhonyanilanga Eliya.”

¹²Mwami Yehoshafati yavoola, “Ni Muprofeti watoto.” Nalwo lwa vami vavaka venavo, vasimukha nivatsia khu Elisha.

¹³Elisha yareeva Mwami wa Israeli, “Shichila shina wenyanga khukhonye? Simukha utsi khureeveshitsa khu vaprofeti va tata wowo nende mama wowo vareevishitsakhu.” Mwami Yoramu yavoola, “Shikali kario tawe. Mwami Nyasaye neye wakhulaanga halala khutsi vami vavaka khu Mwami wa Moabu akhukuuri.”

¹⁴Elisha yavoola, “Nzisuuhanga khuvirila khu Mwami Nyasaye wi Mikaanda Chiliihe, wandumishilanga ndi shimbele nakhukhonya, niiva shinakhaheele mulina wowo Mwami Yehoshafati wa Yuda luyali tawe.

¹⁵Navutswa simukha utsi khunanjila mukhuvi wi shilili nunundi.” Lwa mukhuvi wi shilili yali nakhuvanga shilili shieshie, Elisha yanyola tsingulu tsiu Mwami Nyasaye,

¹⁶navoola, “Mwami Nyasaye avoolanga, ‘Yeeva vwina vunyishi mu luhoongo yulu.

¹⁷Khali niiva utsitsanga khuvula khulolakhu imbula yosi inoho vushindu vwosi, luhoongo yulu luliitsa khwitsula matsi manyishi, ma yivi, miruku chiochio, nende tsinyama tsiotsio tsindi, muve na matsi manyishi ku khung'wa.’ ”

¹⁸Elisha yatsililila khuvoola, “Yishi ni shindu shitoro khukhola imbeli wu Mwami Nyasaye. Atsitsanga khukhuha tsingulu tsiu khukuura Vamoabu.

¹⁹Uliitsa khukwana nu khukuura mataala kavo malahi kene ki tsimbinga. Uliitsa khureemela hasi misala chiavo chiosi, chia matunda, khwikalila tsisieveye tsiavo tsiosi, nu khwononyinya milimi chiavo milahi na machina.”

²⁰Litukhu lialondakhu mu mavwevwe, isaa yu khukhola musango kwa shia khase khosi mu mavwevwe, matsi karulila khuluveka lwa Edomu, nikalanda shia havundu hosi.

²¹Lwa Vamoabu vahulila ndi vami vavaka vamali khwitsa khuvakwana, vandu voosi vi tsingulu tsiu khuchinga viuchi, khuraanjila khu vakali khu vatititi, valaangwa, khandi nivavikhwa khu mipaka.

²²Lwa vavukha litukhu lilondakhu mu mavwevwe, liuva liasakhanga khu matsi kenako. Vamoabu vali nivali khuluveka lundi lwinjila, matsi kalolekhanga khuli mamuuchi -- khuli masahi.

²³Vavoola, “Yako ni masahi! Kanyala khuva vami yavo vakwani, khandi vamali khwiirana vene khuvene. Munyi Vamoabu, chendi mutsi khuyaaya vindu viavo!”

²⁴Navutswa lwa Vamoabu vatukha mu maheemo ka Vaisraeli vamenyamu, Vaisraeli venavo vavakwana, Vamoabu nivilukha. Vaisraeli vaseera shivala shienesho, nivasinza Vamoabu.

²⁵Vasambulanyinya mataala; khandi shia mundu wosi nasiuva lichina mu shia mulimi mulahi, khutukha nikava manyishi mu mulimi kwenoko. Vikalila tsisieveye tsiosi khandi nivareema shia musala kwosi mulahi. Litaala lia Kiri-haresetsi nalio lionyene liarikala na machina kalio ha kavetsanga; navutswa vandu vali nivali na machina khu mikoye, valivotokhana nivalikwana.

²⁶Lwa Mwami wa Moabu yali namanyi ndi atsitsanga khukuurwa mu liihe, yavukula vandu tsimia saba vamanya khukwana ni vivavi, nachelitsa khuhitsanyinya mutsiku nu khwilushila Siria; [1] navutswa yakhaywa.

²⁷Nalwo lwa yavukula mwana wewe mukhulundu, wali natushili khwamiha havukono hehe, namukhola khuva musango khu lisisi li litaala likali. Vaisraeli vali nu vurima vunyishi, shichila kenako. Valekha khukwana, nivakalukha mu shivala shiavo vene.