Read tsotso 1 TSINYINGA 16 Bible Online

1 TSINYINGA 16 - tsotso bible

1 TSINYINGA 16

¹Vahila Lisanduku li Lilakano lia Nyasaye mu liheemo, lia Daudi yali niyalilombela manivalivikha mukari mwalio. Vakhola misango chi vihanwa viu khusambwa nende vihanwa viu khulera milembe khu Nyasaye.

²Lwa Daudi yali namali khuhaana vihanwa viu khusambwa nende vihanwa viu khulera milembe, yakasitsa vandu khuvirila mu lira liu Mwami Nyasaye;

³manakavulila Vaisraeli voosi, musatsa inoho mukhali. Shia mundu yanyolanga shitonye shitititi shiu mukati, shi inyama yasihilwa, nende ikeki yilimu na matunda.

⁴Daudi yarovola valala khu vandu vu lwivulu lwa Levi, khurumikha imbeli wi Lisanduku li lilakano liu Mwami Nyasaye, khusaala, khusanditsa, nu khwitsominya Mwami Nyasaye, uli Nyasaye wa Israeli.

⁵Yarovola Asafu khuva mwimilili, halala na Zakaria khuva mukhonyani wewe, Ye-hiheli, Shemiramotsi, Yeheli, Matitsia, Eliabu, Benaya, Obedi-edomu, nende Ye-hiheli, navo vakhuva vukhana nende vilili. Asafu neye wakhuvanga manyanga,

⁶nende vasalisi vavili, Benaya nende Yahazieli, navo venyekhanga vakhuvi visiliva shia khase khosi imbeli wi Lisanduku li Lilakano lia Nyasaye.

⁷Khurula khulitukhu lienelo, Daudi yarovola Asafu nende veshie, vuluhia lwa Levi mavaha muhinzilu kukhwimbanga tsinyimbo tsiu khutsandisanga Mwami Nyasaye.

⁸Musanditse Mwami Nyasaye, musaale mu lira lielie; mulanditsi mu vandu vi tsimbia tsindi vindu via yakhola.

⁹Mwitsominyile Mwami Nyasaye mu tsinyimbo; nu muvoolela vandu shia shindu shiosi shiu khuchenyinya shia yakhola.

¹⁰Mwikhoyele mu lira lielie litakatifu; leshi mioyo chia yavo vamukhavanga chisangale;

¹¹Mukhave Mwami Nyasaye shichila ali ni tsingulu. Mumusikamile shia khase khosi.

¹²Mwitsushitse viloleshitsu viu khuchenyinya via yamala khukhola, khuli akhukhalachilanga vuchila khwihonela mundu.

¹³Munyi vitsukhulu va Aburahamu, uli murumishi wewe, Munyi vitsukhulu va Israeli, numuli va yarovola.

¹⁴Mwami Nyasaye neye Nyasaye weru; malako keke ni ka vandu voosi mu shivala.

¹⁵Muvuli khwivilila lilakano lia Nyasaye, lia yakhola liveho mihika ni mihika;

¹⁶lilakano lia yakhola na Aburahamu, lilaaka lia yalaaka Isaka.

¹⁷Mwami Nyasaye yakhola lilakano na Yakobo, litushili khuvaho mihika ni mihika.

¹⁸Yavoola, “Niitsa khukhuha shivala shia Kanaani. Nashio shiliitsa khuva shioshio mwene shiu khumenyamu.”

¹⁹Vandu va Nyasaye vavetsanga isavu indititi, vandu vacheni mu shivala shia Kanaani.

²⁰Vahuya huya khurula mu shivala yishi khutsia mushindi, khurula mu vwami yuvu khutsia mu vundi.

²¹Navutswa Nyasaye yambakhana khuhuchililakhu mundu khuvatambitsa; yakondeshela vami shichila vo:

²²“Muvuli khutiilakhu varumishi vaanje vavekhwa makura. Muvuli khunyashitsa Vaprofeti Vanje.”

²³Vandu voosi vamenyanga khulilova, mwimbile Mwami Nyasaye tsinyimbo; mulanditsi shia litukhu makhuva khu vihonyinyi vwevwe.

²⁴Muvoolele vandu vi tsimbia tsindi vukhumi vwevwe, vikholwa vievie viu khuchenyinya khu vandu voosi

²⁵Mwami Nyasaye neye uli ni tsingulu wenyekhanga khwitsominywa mu vunyishi; aheelwi luyali lunyishi khuvira vanyasaye vandi voosi.

²⁶Vanyasaye va vandu vi tsimbia tsindi ni misambwa chionyene vutswa. Navutswa Mwami Nyasaye neye waloonga likulu.

²⁷Vukhumi nende vunyali vimuvotokhananga, tsingulu nende vuyaanzi via yitsula mu Litempeli lielie.

²⁸Vandu voosi khulilova, mwitsominye Mwami Nyasaye mwitsominye vukhumi vwevwe nende vunyali vwevwe.

²⁹Mwitsominye lira liu vukhumi liu Mwami Nyasaye; mulere shihanwa nu mwinjila mu Litempeli lielie. Mwinamili Woyo uli Mutakatifu lwa ava niyakhalolekha.

³⁰Vandu voosi khulilova, mutechele imbeli wewe! Lilova liasinjilitswa vulahi mu makono kalio, vuchila khusuundiwa.

³¹Lilova nende likulu mwinamili musangale! Muvoolele vandu vi tsimbia tsindi ndi Mwami Nyasaye neye mwami.

³²Inyanza nende vilombe viosi vili mwoyo muyo, muhilikane. Milimi nende vindu viosi vilimu, musangale.

³³Misala chili mu muliru chiliitsa khwimba nu vuyaanzi imbeli wu Mwami Nyasaye, shichila aliitsa khwitsa khukhalachila vandu voosi khulilova.

³⁴Musanditse Mwami Nyasaye, shichila neye mulahi; vuyaanzi vwevwe nu vwi mihika ni mihika!

³⁵Muvooleli, “Yivi Nyasaye uli Muhonyinyi weru, ukhuhonyinye; Khulere halala; nu khuhonyinya khurula khu vandu vi tsimbia tsindi, nikanyalikha khukhusanditse nu khwitsominya lira liolio litakatifu.”

³⁶Mwitsominye Mwami Nyasaye, uli Nyasaye wa Israeli! Mumwitsominye nunundi khandi mihika ni mihika! Nalwo lwa vandu voosi vavoola, “Amina,” nivitsominya Mwami Nyasaye.

³⁷Mwami Daudi yaha Asafu nende veshie, nivali vandu vu lwivulu lwa Levi vunyali vu khusinjilila khusaala khwakholekha havundu hi Lisanduku li Lilakano liavikhwa. Shia litukhu kenyekhanga vakholeyo mihinzilu chiavo.

³⁸Obedi-edomu mwana wa Yedutsuni halala na vandu makhomi sita na munane, khurula mu vandu vu lwivulu lwelwe, venyekhanga vavakhonye. Hosa nende Obedi-edomu, navo vaheelwa vunyali vu khusinjilila vilivwa.

³⁹Navutswa musalisi Zadoko, nende vasalisi veshie, navo vasinjililanga khusaala khu Mwami Nyasaye, khwakholekhanga havundu ha vasaalilanga mu litaala lia Gibioni.

⁴⁰Shia mu mavwevwe nende halukolovo, vahaananga vihanwa viu khusambwa vi misango khu vwaali, khulondokhana khuli kahandikwa mu Malako ku Mwami Nyasaye yaha Israeli.

⁴¹Vandu va vavetsanga halala navo ni Hemani, Yedutsuni, nende vandu vandi vali nivarovolwa vutswa, khwimba tsinyimbo tsiu khwitsominya Mwami Nyasaye, shichila vuyaanzi vwevwe nu vwi mihika ni mihika.

⁴²Hemani nende Yedutsuni, navo vaheelwa vunyali vu khusinjilila visiliva nende manyanga, halala ni vindu vindi via vakhuvanga, lwa vimbanga tsinyimbo tsiu khwitsominya. Vandu vu lwivulu lwa Yedutsuni, navo vaheelwa muhinzilu ku khulinda vilivwa.

⁴³Nalwo lwa shia mundu wosi yasimukha natsia ingo, ma Daudi nakalukha ingo khukasitsa vandu vi inzu yeye.