Read tsotso 1 TSINYINGA 19 Bible Online

1 TSINYINGA 19 - tsotso bible

1 TSINYINGA 19

¹Matukhu mati nikakhavira, Mwami Nahashi wa Amoni yakhutsa; ma mwana wewe walaangwangwa Hanuni, nakwa mwami.

²Mwami Daudi yavoola, “Niitsa khukholela Hanuni mwana wa Nahashi kali malahi, shichila tata wewe yakholela kali malahi.” Daudi yaruma varumwa khuye, khutsia khumuleminya mwoyo havukono hehe. Lwa varumwa va Daudi vatukha mu shivala shia Vaamoni, khuleminya Hunani mwoyo,

³Vimilili va Vaamoni, vavoolela Mwami Hanuni, “Usuuvilanga Daudi urumi vandu khwitsa khukhuleminya mwoyo, shichila yali waha tata wowo luyali? Shikali kario tawe! Uvarumi hanu khuli varumishitsi, vu khwitsa khurunishitsa havundu hosi mu shivala, khushikwana.”

⁴Hanuni yakumila varumwa va Daudi, navaveka matelu kavo, narandula tsinguvu tsiavo mu masikamo, navakhunga khurulayo.

⁵Valola tsisoni tsinyishi khukalukha ingo. Lwa Daudi yahulila kali nikakholeshe, yavarumila likhuva vakhole, nivashimenya mu litaala lia Yeriko, khandi vavuli khukalukhakhu, nivashili khumeela matelu kavo.

⁶Mwami Hanuni nende Vaamoni vitsa khumanya ndi vakholi Daudi, khuva mutsiku wavo; khu varunga ifetsa tsikilo 34 khusamulitsa makaare nende vahili va makaare, khurula khuluveka luli ivuluka -- imbo wa Mesopotamia, khandi khurula mu tsisomo tsia Maaka nende Zoba, tsili mu shivala shia Siria.

⁷Makaare tsiheelefu makhomi kavaka na kavili, ka vali nivasamulitsi nende vasikali vu Mwami wa Maaka, vitsa manivumbakha maheemo ku khumenyamu, himbi havundu halaangwangwa Medeba. Vaamoni vitsa khandi khurula mu mataala kavo koosi, nivirechekha khukwana.

⁸Lwa Daudi yahulila kali nikakholekhanga, yaruma Yohabu nende vasikali voosi.

⁹Vaamoni varoonjela, nivavukula vwiyangu vwavo ha vwinjililu vwi litaala lia Raba, nilili litaala likali liavo; khandi vami vali nivitsa khuvakhonya, vavukula vwiyangu vwavo ihalekhu mushikuri.

¹⁰Yohabu yalola ndi vasikali vu mutsiku vamali khuraanjila imbeli wewe nende inyuma. Nalwo lwa yarovola vasikali vamanya khukwana va Israeli, navavikha mu vwiyangu vwa vanyala khukwanilamu Vasiria.

¹¹Yavukula vasikali valala viliihe narovola amwavo wewe Abishai, khuvasinjilila; yavavikha mu vwiyangu, vwa vanyala khukwanilamu Vaamoni.

¹²Yohabu yamuvoolela, “Niiva uliitsa khulola ndi Vasiria vakuuranga inzi, kenyekhanga witsi ukhonye; khandi niiva Vaamoni valiitsa khuva vakuuranga yivi, niitsa makhukhonye.

¹³Uve ni tsingulu nende ikholo! Lekha khukwane ni tsingulu tsiosi, shichila vandu veru nende mataala ka Nyasaye weru. Saalanga ndi lienya lia Nyasaye likholeshe.”

¹⁴Yohabu nende vasikali veve, varoonjela nivatsia khukwana, ma Vasiria nivilukha.

¹⁵Lwa Vaamoni valola Vasiria, nivilukhanga, khali vo vene vilukha imbeli wa Abishai nivatsia mukari mwi litaala likali. Nalwo lwa Yohabu yakalukha Yerusalemi.

¹⁶Vasiria vamanya ndi Vaisraeli vavakuuri; khu valera vasikali khurula mu tsisomo tsia Siria khuluveka luli ivukwi wu Muchela kwa Efurate, manivarovola Shobaki, mwimilili wa vasikali vu Mwami Hadadezeri wa Zoba, khuvasinjilila.

¹⁷Lwa Daudi yavoolelwa makhuva kenako koosi, yalaanga halala vasikali va Vaisraeli, niyambukha Muchela kwa Yorodani, navavikha mu vwiyangu vwa vanyala khukwanilamu Vasiria. Liihe liaraanga,

¹⁸ma Vaisraeli nivakhunganyinya vasikali va Vasiria. Daudi nende vandu veve, viira vahili va makaare ki liihe tsiheelefu saba va Vasiria nende vasikali tsiheelefu makhomi kane vachendanga khu vilenje. Viira khandi Shobaki, wali nali mwimilili wa vasikali va Siria.

¹⁹Lwa vami vakhonyanga Mwami Hadadezeri vamanya ndi Israeli vavakuuri, valomba milembe na Daudi nivakwa vandu veve vu khwamiha. Vasiria vambakhana khukhonya Vaamoni.