Read tsotso 1 TSINYINGA 21 Bible Online

1 TSINYINGA 21 - tsotso bible

1 TSINYINGA 21

¹Shetani yenyanga khulerela Vaisraeli vutiinyu, manaavwanyinya mulilu mu Daudi avalitsi vandu vamenyanga Israeli.

²Daudi yavoolela Yohabu nende vimilili va vasikali, “Simushi mutsi shia havundu hosi, mu shivala shia Israeli, khuraanjila khuluveka lulala lwi shivala khutukha khuluveka lundi, mamuvalitse vunyishi vwa vandu. Nyenyanga khumanya, ni vandu vanga vamenyayo.”

³Yohabu yamuchipa, “Saalanga ndi Mwami Nyasaye akhole Vaisraeli, vave vanyishi mu tsimia khuvira khuli lwa vali nunundi! Yivi mwami, voosi ni varumishi vovo. Shichila shina wenyanga khukhola ndio, khukhola vandu vuluhia lwa Israeli khulolekha vakholi vutamanu?”

⁴Navutswa Mwami Daudi yakhola Yohabu, nalonda lilako. Yohabu yarulaho, natsia shia havundu hosi mu Israeli; nakalukha Yerusalemi.

⁵Yohabu yavoolela Mwami Daudi vunyishi vwa vandu vasatsa, vanyala khutsia khukwana mu liihe: Vasikali imilioni indala nende tsiheelefu imia indala mu Israeli, nende vasikali tsiheelefu tsimia tsine na makhomi saba mu Yuda.

⁶Navutswa Yohabu yambakhana khuvalitsa vandu vi tsimbia tsia Levi nende Benyamini, shichila lilako liu Mwami Daudi shiliali limuyaanzitsi tawe.

⁷Nyasaye shiyayaanzitswa ni vindu, viali nivikholeshe tawe. Khulwa yako, yasalilitsa Israeli.

⁸Daudi yavoolela Nyasaye, “Kholi vwoni vutamanu lwa kholi ndio. Khusayanga nunundi, nuyaanza usemehe. Kholele khuvirila mu vuyiingwa.”

⁹Mwami Nyasaye yavoolela Gadi, nali muprofeti wa Daudi,

¹⁰“Simukha utsi khuvoolela Daudi ndi muheetsanga vindu vivaka, arovolekhu shilala shia yenyanga. Niitsa khukhola shialiitsa khuva narovole.”

¹¹Gadi yasimukha natsia khu Daudi, namuvoolela ku Mwami Nyasaye yali navooli; nareeva, “Ni shina shiurovolanga?

¹²Inzala khumihika chivaka? Inoho mieli chivaka khumenya nu wilukhanga vasikali va vatsiku vovo? Inoho matukhu kavaka, ku Mwami Nyasaye akhukwana ni shivavi, marumi lukhutsu mu shivala shioshio, narumishilanga injelosi yeye khulera likhutsa, shia havundu hosi mu Israeli? Ni lichipu shina liambila khu Mwami Nyasaye?”

¹³Daudi yachipa Gadi, “Ndi khuvutiinyu vutamanu muno! Navutswa shinyenyi vandu vasalilitse tawe. Lekha Mwami Nyasaye mwene ave neye usalilitsa, shichila neye wi tsimbavasi.”

¹⁴Mwami Nyasaye yaruma lukhutsu khu Vaisraeli, ma vandu tsiheelefu makhomi saba, nivakhutsa khuvo.

¹⁵Nyasaye yaruma injelosi khutsia khutivitsa Yerusalemi. Navutswa lwa injelosi yeneyo, yali nili himbi khukhola ndio, Mwami Nyasaye yavelela shichila vutiinyu vwaliho, navoolela injelosi yu khutivitsa, “Lekhana na kenako! Luvwele.” Injelosi yu Mwami Nyasaye yali nisinjile, himbi havundu ha vilulilanga imu ha Orunani, wali mundu Muyeebusi.

¹⁶Daudi yaheenza, nalola injelosi yu Mwami Nyasaye, nisinjile hakari mu vushindu, nikumile shivavi mu mukhono kwekwe, niyenyanga khutivitsa Yerusalemi. Daudi nende vasakhulu, nivifwali tsinguvu tsia makunia, nivakwa hasi mahunama.

¹⁷Daudi yasaala, “Nyasaye, ninzi ukholi vwoni. Ninzi wahaana lilako vandu khuvalitswa. Ni shina shia vandu vavula vutamanu yava vakholi? Mwami Nyasaye, uli Nyasaye wanje, salilitsa inzi nende vandu vi inzu yanje, uvuli khwiira vandu vovo.”

¹⁸Nalwo lwi injelosi yu Mwami Nyasaye, yavoolela Gadi avoolele Daudi atsi khumbakha vwaali vu Mwami Nyasaye, havundu ha vilulilanga imu ha Orunani, wali mundu Muyeebusi.

¹⁹Daudi yalonda malako ku Mwami Nyasaye, natsia, khuli Gadi yali namuvoolele.

²⁰Lwa Orunani yali nashilulanga inganu, yishevukha nalola injelosi; vaana vi shiyayi veve vane, vali nivali naye vivisa vene.

²¹Nalwo lwa Daudi yisuunda himbi, khandi lwa Orunani yaheenza manamulola, yarula havundu ha vilulilanga imu, manakwa mahunama imbeli wa Daudi.

²²Daudi yavoolela Orunani, “Ngulitsila havundu hoho ha vilulilanga imu, khu nzumbashiliho Mwami Nyasaye vwaali; khu lukhutsu luvuli khuvaho. Nzitsanga khukhurunga vukuuli vwakwo vwosi vwenyekhanga.”

²³Orunani yavoolela Daudi, “Yivi mwami, vukula; ukhole koosi ka wenyanga khukhola. Yitsi natsio tsihili tsiu khusambila khu vwaali, khuli shihanwa shiu khusambwa; khandi yivi navio vitonye vi tsimbaho, tsia havundu ha vilulilanga viurumishila khusamba; nende inganu yu khuhaana, khuli shihanwa shi imu. Khuheetsanga vindu vienevo viosi.”

²⁴Navutswa Mwami Daudi yachipa Orunani, “Shikali kario tawe. Nzitsanga khukhurunga vukuuli vwosi vwenyekhanga. Shinyala khuha Mwami Nyasaye shili shioshio, inoho khuhaana vihanwa viu khusambwa via nakhakuula tawe.”

²⁵Daudi yakuula khu Orunani havundu henaho ni tsisenti tsimia sita, tsiali nitsialombwa khu itsahabu.

²⁶Daudi yumbakhaho vwaali vu Mwami Nyasaye, manahaanilaho vihanwa viu khusambwa nende vihanwa viu khulera milembe. Yasaala khu Mwami Nyasaye, ma Mwami Nyasaye nachipa, lwa yaruma mulilu khurula mwikulu khusamba misango, chiali nichili khu vwaali.

²⁷Mwami Nyasaye yalomoloma khu injelosi, manivikha shivavi mushiula shiayo.

²⁸Mumatukhu kenako, lwa Daudi yalola ndi Mwami Nyasaye, umali khumuchipila havundu ha vilulilanga imu ha Orunani, wali mundu Muyeebusi, yakholelaho misango.

²⁹Mumatukhu kenako, Liheemo Litakatifu liu Mwami Nyasaye, lia Musa yali niyaloomba mwichendanyama, halala nu vwaali vwi vihanwa viu khusambwa, viali nivishili havundu ha vasaalanga mu litaala lia Gibioni.

³⁰Navutswa Daudi yakhaywa khutsiayo khusaala khu Mwami Nyasaye, shichila yaria injelosi yu Mwami Nyasaye, inyala khumwiira ni shivavi.