Read tsotso 1 TSINYINGA 23 Bible Online

1 TSINYINGA 23 - tsotso bible

1 TSINYINGA 23

¹Lwa Daudi yali niyakhasakhula, yamihitsa mwana wewe Solomoni, khuva Mwami wa Israeli.

²Khu, Mwami Daudi yalaanga halala vimilili voosi va Israeli, khali vasalisi nende vandu vu lwivulu lwa Levi.

³Yavalitsa vandu vu lwivulu lwa Levi, vali ni mihika makhomi kavaka inoho khuvira chienecho; ma vunyishi vwa vandu voosi, nivava vandu tsiheelefu makhomi kavaka na munane.

⁴Mwami Daudi yarovola vandu tsiheelefu makhomi kavili na vane, khusinjilila muhinzilu kukholekhanga mu Litempeli, vandu tsiheelefu sita khuvikha vulahi vitabu via vindu viahandikwamu, nu khuviritsa viyaalo via vandu,

⁵valindi tsiheelefu tsine vu khulinda mu vilivwa, nende vandi tsiheelefu tsine vu khwitsominya Mwami Nyasaye, nivarumishilanga vindu, viu Mwami Daudi yavaha khulu khwimba tsinyimbo.

⁶Daudi yakavula vandu vu lwivulu lwa Levi, khulondokana khu vaana vavaka va Levi, yali niyivula, nivali Gerishoni, Kohaatsi, nende Merari.

⁷Gerishoni yivula vaana vi shiyayi vavili, niyali Ladani nende Shimei.

⁸Ladani yivula vaana vi shiyayi vavaka, nivali Yeheli, Zetsamu nende Yoeli,

⁹nivali vimilili vi tsinzivulu tsiarula khu Ladani. (Shimei yivula vaana vi shiyayi vavaka, nivali Shelomotsi, Hazieli nende Harani.)

¹⁰Shimei yivula vaana vi shiyayi vane, nivali Yahaatsi, Zina, Yehushi nende Beria.

¹¹Yahaatsi neye wali Mwimilili, khandi Ziza neye wamulondanga wa khavili; navutswa Yehushi nende Beria, vali nivashili khwivulakhu vaana vi shiyayi vanyishi. Vavalitswa khuli vandu varulanga mu inzu indala.

¹²Kohaatsi yivula vaana vi shiyayi vane, nivali Amuramu, Izuhari, Heburoni, nende Uzieli.

¹³Vaana vi shiyayi va Amuramu yivula vali Haruni nende Musa. (Haruni nende vitsukhulu veve vahulwa haluveka, khusinjilila vindu vitakatifu mihika ni mihika, khusamba vubani khusaala khu Mwami Nyasaye, khumurumishila, nu khukasitsa vandu khuvirila mu lira lielie.

¹⁴Navutswa vaana va Musa, wali nali mundu wa Nyasaye vavalitswa halala mu vandu vu lwivulu lwa Levi.)

¹⁵Musa yivula vaana vi shiyayi vavili, nivali Gerishomu nende Eliezeri.

¹⁶Vaana vi shiyayi va Gerishomu yivula, mwimilili wavo yali Shebuheli.

¹⁷Eliezeri yivula mwana wi shiyayi mulala wonyene vutswa walaangwangwa Rehabia, navutswa Rehabia yali na vitsukhulu vanyishi.

¹⁸Mwana wa Kohaatsi wa khavili, wali nali Izuhari yivula mwana wi shiyayi Shelomitsi; Shelomitsi neye wali mwimilili wa vandu vu lwivulu lwenolo.

¹⁹Mwana wa Kohaatsi wa khavaka, wali nali Heburoni yivula vaana vi shiyayi vane, nivali Yeria, Amaria, Yahazieli nende Yekamehamu.

²⁰Mwana wa Kohaatsi wa khane, wali nali Uzieli, yivula vaana vi shiyayi vavili, nivali Mika nende Isiya.

²¹Merari yivula vaana vi shiyayi vavili, nivali Mahuli nende Mushi. Mahuli yivula khandi vaana vi shiyayi vavili, nivali Eliazari nende Kishi;

²²navutswa Eliazari yakhutsa, vuchila khwivulakhu mwana wi shiyayi wosi, navutswa yivula vaana vi shikhana vonyene vutswa. Vaana vi shikhana veve venavo, vatsia tsikhali khu vasiala vavo, nivali vaana va Kishi.

²³Mwana wa Merari wa khavili, wali nali Mushi yivula vaana vi shiyayi vavaka, nivali Mahuli, Ederi nende Yeremotsi.

²⁴Yava navo vali vitsukhulu vandu vu lwivulu lwa Levi, khulondokhana khu tsinzivulu nende vandu vi tsinzu, shia mulala khuvo yihandikwa lira lielie. Shia mulala khu vitsukhulu veve, nali ni mihika makhomi kavili inoho mihika minyishi, yali nu muhinzilu ku khukhola mu Litempeli liu Mwami Nyasaye.

²⁵Daudi yavoola, “Mwami Nyasaye wa Israeli, uchili vandu veve vamenyanga mu milembe. Ye mwene aliitsa khumenya mu Yerusalemi mihika ni mihika.

²⁶Khulwa yako, shivune shiosi shivulakhuho, shinyala khuchila vandu vu lwivulu lwa Levi khuchinga Liheemo Litakatifu liu Mwami Nyasaye halala ni vindu vindi viosi via varumishilanga khusaala.”

²⁷Khurulana khu mivaalo ka Daudi kukhumalilikha, vandu varulanga mu vandu vu lwivulu lwa Levi voosi, vahandikwa khurumikha lwa vali nivakhatukha mihika makhomi kavili,

²⁸khandi vaheelwa muhinzilu yuku: Khukhonya vasalisi varulanga mu vandu vu lwivulu lwa Haruni muhinzilu ku khusaala mu Litempeli, khulinda vulahi lwanyi nende viko vialio, khandi khushinga shindu shiosi shili shitakatifu khuvula khwononyinywa;

²⁹khusinjilila mukati mutakatifu, vusi vurumikhanga mu vihanwa, mikati chialombwa vuchila mamela, vihanwa viakandwa, nende vusi vwa tsukanyinywa makura ku musayituni; khuvikha khu tsilaatili nu khupima vulitoho vwi vihanwa vi litempeli;

³⁰khandi khwitsominya nu khuha Mwami Nyasaye vukhumi shia mu mavwevwe nende khulukovolo;

³¹khandi isaa yosi lwa vihanwa viu khusambwa vihanwangwa khu Mwami Nyasaye khulitukhu li Lisabato, Milukha chiu Mweli Khwilavushitsa Vuyia nende mu milukha chindi. Malako kali kahaanwa khumanyinya ni vandu vanga, khurula mu vandu vuluhia lwa Levi venyekhanga vakhole muhinzilu kwenoko shia litukhu. Vandu vuluhia lwa Levi vaheelwa muhinzilu ku khusaala khu Mwami Nyasaye khumatukhu koosi.

³²Vali vaheelwa muhinzilu ku khusinjilila nu khulinda Liheemo Litakatifu liu Mwami Nyasaye nende Litempeli, khandi khukhonya viikho vavo, nivali vasalisi varulanga mu vandu vu lwivulu lwa Haruni, khukhola muhinzilu ku khusaala mu Litempeli liu Mwami Nyasaye.