Read tsotso 1 TSINYINGA 27 Bible Online

1 TSINYINGA 27 - tsotso bible

1 TSINYINGA 27

¹Yaka nako mira ka vimilili va vandu vi tsinzu tsia Israeli, vimilili vi tsinzivulu nende vimilili vi mikaanda chia vasikali vakholanga muhinzilu mu vwami vwa Daudi. Shia mweli khumuhika, mukaanda lukanu kwa vasikali tsiheelefu makhomi kavili na vane, vakholanga muhinzilu, nivali hasi wu mwimilili wa vasikali khumuhika kwenoko.

²Yashobehamu mwana wa Zabudieli, neye wasinjililanga mukaanda ku khuraanga, khu mweli ku khuraanga. Khwali na vasikali tsiheelefu makhomi kavili na vane mu mukaanda kwekwe.

³Yashobehamu yali mwitsukhulu wa Perezi, khandi neye wali mwimilili wa vasikali khu mweli ku khuraanga.

⁴Mwitsukhulu wa Ahohi, walaangwangwa Dodai, neye wali mwimilili wu mukaanda khu mweli kwa khavili. Mikilotsi neye wali mwimilili wu mukaanda kwekwe. Khwali na vasikali tsiheelefu makhomi kavili na vane mu mukaanda kwekwe.

⁵Benaya mwana wu musalisi Yehohada, neye wali mwimilili wa vasikali wa khavaka. Yali mwimilili, nu khuva na vasikali tsiheelefu makhomi kavili na vane mu mukaanda kwekwe.

⁶Neye Benaya wali musikali wi tsingulu tsinyishi mu “Makhomi Kavaka” khandi neye wasinjililanga “Makhomi Kavaka” venavo. Mwana wewe Amizabadi, neye wali mwimilili wu mukaanda kwekwe.

⁷Amwavo wa Yohabu walaangwangwa Asaheli, neye wali wa khane khu mweli kwa khane. Mwana wewe Zebadia, neye wavukula havukono hehe. Khwali na vasikali tsiheelefu makhomi kavili na vane mu mukaanda kwekwe.

⁸Mwimilili wu mukaanda kwa vasikali walaangwangwa Shamuhutsi, khurula mu vandu vu lwivulu lwa Izura, neye wali wa kharanu, khu mweli kwa kharanu. Khwali na vasikali tsiheelefu makhomi kavili na vane mu mukaanda kwekwe.

⁹Ira mwana wa Ikeshi, khurula mu litaala lia Tekoha neye wali wa sita, khu mweli kwa sita. Khwali na vasikali tsiheelefu makhomi kavili na vane mu mukaanda kwekwe.

¹⁰Helezi khurula havundu halaangwangwa Peloni, khurula mu vandu vuluhia lwa Efurahimu, neye wali wa saba, khu mweli kwa saba. Khwali na vasikali tsiheelefu makhomi kavili na vane mu mukaanda kwekwe.

¹¹Sibekai khurula mu litaala lia Husha, mu vandu vu lwivulu lwa Zera, neye wali wa munane, khu mweli kwa munane. Khwali na vasikali tsiheelefu makhomi kavili na vane mu mukaanda kwekwe.

¹²Abiezeri khurula mu litaala lia Anatsotsi, mu vandu vuluhia lwa Benyamini, neye wali wa tisa, khu mweli kwa tisa. Khwali na vasikali tsiheelefu makhomi kavili na vane mu mukaanda kwekwe.

¹³Maharai khurula mu litaala lia Netofa, mu vandu vu lwivulu lwa Zera, neye wali wi likhomi, khu mweli kwi likhomi. Khwali na vasikali tsiheelefu makhomi kavili mu mukaanda kwekwe.

¹⁴Benaya khurula mu litaala lia Piratsoni mu lusomo lwa Efurahimu, neye wali wi likhomi nu mulala, khu mweli kwi likhomi nu mulala. Khwali na vasikali tsiheelefu makhomi kavili na vane mu mukaanda kwekwe.

¹⁵Helidai khurula mu litaala lia Netofa, nali mwitsukhulu wa Otsinieli, neye wali wi likhomi na vavili, khu mweli kwi likhomi na chivili. Khwali na vasikali tsiheelefu makhomi kavili na vane mu mukaanda kwekwe.

¹⁶Yaka nako mira ka vimilili va vandu vi tsimbia tsia Israeli: Eliezeri mwana wa Zikuri neye wali mwimilili wa vandu vuluhia lwa Rubeni. Shefatia mwana wa Maaka, neye wali mwimilili wa vandu vuluhia lwa Simioni.

¹⁷Hashabia mwana wa Kemweli, neye wali mwimilili wa vandu vu lwivulu lwa Levi. Zadoko neye wali mwimilili wa vandu vi inzu ya Haruni.

¹⁸Elihu, nali mulala khu vamwavo va Daudi, neye wali mwimilili wa Yuda; Omuri mwana wa Mikaheli, neye wali mwimilili wa vandu vuluhia lwa Isakari.

¹⁹Ishimaya mwana wa Obadia, neye wali mwimilili wa vandu vuluhia lwa Zabuloni. Yerimotsi mwana wa Azirieli, neye wali mwimilili wa vandu vuluhia lwa Nafutali.

²⁰Hosheha mwana wa Azazia, neye wali mwimilili wa vandu vuluhia lwa Efurahimu. Yoeli mwana wa Pedaya, neye wali mwimilili wi inusu ya vandu vuluhia lwa Manaase khuluveka luli imbo.

²¹Ido mwana wa Zakaria neye wimililanga inusu ya vandu vuluhia lwa Manaase khuluveka luli ivukwi mu lusomo lwa Gileadi. Yahasieli mwana wa Abuneri neye wali mwimilili wa vandu vuluhia lwa Benyamini.

²²Azareli mwana wa Yerohamu neye wali mwimilili wa vandu vuluhia lwa Dani. Navo vali vimilili va vandu vi tsimbia tsia Israeli.

²³Mwami Daudi yalekha khuvalitsa vandu vali hasi hi mihika makhomi kavili, shichila Mwami Nyasaye yali walaaka aliitsa khuchila Vaisraeli vivulane vave vanyishi, khuli tsinyining'ini mu malesi.

²⁴Yohabu mwana wa Zeruya, yaraanga khuvalitsa vandu, navutswa yakhaywa khuvalitsa. Nyasaye yasalilitsa Israeli khurulana khu livalitswa lia vandu, ma isavu ya vandu voosi nivula khuhandikwa, mu vitabu viu Mwami Daudi yahandikamu makhuva keke.

²⁵Azimavetsi mwana wa Adieli, neye wasinjililanga tsinzu tsia vavikhamu vindu via vandu vi inzu yu vwami. Yonatsani mwana wa Uzia, neye wasinjililanga tsinzu tsia vavikhamu vindu tsili mu tsisomo tsiliho, himbi mu mataala, michitsi, nende minaara.

²⁶Ezuri mwana wa Kelubu, neye wasinjililanga vahinzili vakholanga mihinzilu mu milimi.

²⁷Shimei khurula mu litaala lia Raama, neye wasinjililanga milimi chi misala chi misabibu. Zabudi khurula mu litaala lia Shefamu, neye wasinjililanga vindu viarulanga khu misabibu.

²⁸Baali Hanani khurula mu litaala lia Gederi, neye wasinjililanga misala chi misayituni nende mukhuyu hasi hi vikulu khuluveka luli imbo. Yohashi neye wasinjililanga havundu ha vavikhanga makura ku musayituni.

²⁹Shitirai khurula mu litaala lia Sharoni, neye wasinjililanga tsing'ombe mu lwomera mu litaala lia Sharoni. Shafati mwana wa Adulai, neye wasinjililanga tsing'ombe mu tsihoongo.

³⁰Obili khurula mu Vashimaheli neye wasinjililanga tsingamia. Yedeya khurula Meronotsi, neye wasinjililanga tsipunda.

³¹Yazizi khurula mu vandu vu lwivulu lwa Haguri, neye wasinjililanga makondi nende tsimbuli. Yavo voosi navo vimilili vasinjililanga miandu chiu Mwami Daudi.

³²Khootsa wa Daudi walaangwangwa Yonatsani, yali mundu wamanya khuchelihitsa ninganakani khandi mundu wasoma. Ye vandu mwene nende Yeheli mwana wa Hakimoni, navo vasinjililanga masomo ka vaana vu Mwami Daudi.

³³Ahitsofeli neye wakhonyanga Mwami Daudi ninganakani. Hushai warulanga mu vandu vu lwivulu lwa Araki, neye wali mulina wu Mwami Daudi.

³⁴Lwa Ahitsofeli yakhutsa, Abiatsari nende Yehohada mwana wa Benaya, navo vali vandu vu khumukhonya ninganakani. Yohabu neye wali mwimilili wu mukaanda kwa vasikali vi inzu yu vwami.