Read tsotso 2 TSINYINGA 11 Bible Online

2 TSINYINGA 11 - tsotso bible

2 TSINYINGA 11

¹Lwa Mwami Rehobohamu yatukha mu Yerusalemi, yalaanga halala mikaanda chia vasikali tsiheelefu imia indala na makhomi munane, vi tsingulu tsiu khukwana khurula mu vandu vi tsimbia tsia Benyamini nende Yuda. Yenyanga khutsia khukwana Israeli nu khuraanga khandi khwamiha.

²Navutswa Mwami Nyasaye yavoolela Muprofeti Shemaya

³atsi khuvoolela Mwami Rehobohamu mwana wa Solomoni nende vandu voosi varulanga mu vandu vi tsimbia tsia Yuda nende Benyamini,

⁴“Muvuli khutikulukha khutsia khukwana vamwavo venyu. Shia mulala khu munyi khutukha akalushi ingo wewe. Kikholeshe khulondokhana khu lienya lianje.” Vahulishitsa likhuva liu Mwami Nyasaye, nivalekha khutsia khukwana Yerobohamu.

⁵Rehobohamu yarikala namenyanga mu Yerusalemi; niyumbakha tsimbinga mu mataala ka Yuda.

⁶Yumbakha mataala ka Betselehemu, Etamu, Tekoha,

⁷Betsi-zuri, Soko, Adulamu,

⁸Gatsi, Maresha, Zifu,

⁹Adorahimu, Lakishi, Azeka,

¹⁰Zora, Ahiyaloni, nende Heburoni. Yaka nako mataala kumbakhwa ni tsimbinga mu vandu vi tsimbia tsia Yuda nende Benyamini.

¹¹Yakhola mataala kenako khuva ni tsingulu; narovola vimilili vanyala khukasinjilila. Yavikha mu mataala kenako shiukhulia, makura ku musayituni, nende idivai.

¹²Yavikha tsingavo nende marimu mu mataala koosi, khandi nakakhola khuva ni tsingulu tsinyishi. Yamiha vandu vi tsimbia tsia Yuda nende Benyamini.

¹³Vasalisi nende vandu vu lwivulu lwa Levi vamenyanga shia havundu hosi mu shivala shia Israeli viyunga na Rehobohamu.

¹⁴Khali vandu vu lwivulu lwa Levi valekha havundu ha vayitsanga miruku chiavo nende miandu chiavo; nivitsa mu shivala shia Yuda nende Yerusalemu; shichila Mwami Yerobohamu nende vaana veve vi shiyayi vali va vambakhana khuli vasalisi vu Mwami Nyasaye.

¹⁵Yerobohamu yarovola vasalisi veve mwene vanyala khurumikha havundu ha vasaalilanga, va matimoni nende vifwanani viasasanga vihuunwa via ye mwene yali niyalomba.

¹⁶Navutswa vandu vali nu mwoyo ku khwenya khukhava Mwami Nyasaye, uli Nyasaye wa Israeli, nivali yavo varulanga mu vandu vi tsimbia tsiosi tsia Israeli valonda vandu vu lwivulu lwa Levi mu Yerusalemi, khukholela Mwami Nyasaye, uli Nyasaye wa vakuuka vavo musango.

¹⁷Vatinyilitsa vwami vwa Yuda nuvuva ni tsingulu; khandi nivakhonya Rehobohamu mwana wa Solomoni, namenya mu vulindi vulahi khumihika chivaka; shichila Rehobohamu yalonda mwiima kwa Daudi, khandi kwa tata wewe Solomoni mumatukhu kenako.

¹⁸Rehobohamu yahila mukhali walaangwangwa Mahalatsi, wali mwana wi shikhana wa Yerimotsi, wa Daudi yivula khu Abihaili, mwana wi shikhana wa Eliabu mwana wa Yese.

¹⁹Yivula khuye vaana vi shiyayi vavaka, nivali Yehushi, Shemaria, nende Zahamu.

²⁰Rehobohamu yahila khandi mukhali wundi walaangwangwa Maaka mwana wi shikhana wa Abisolomu. Yivula khuye Abiya, Atahi, Ziza, nende Shelomitsi.

²¹Rehobohamu yali wayaanza muno mukhali wewe Maaka mwana wi shikhana wa Abisolomu, khumeeta khu vakhali veve vandi voosi nende vakhali veve vali nivamenyinywa. Rehobohamu yali wahila vakhali likhomi na munane, vakhali vamenyinywa makhomi sita. Yivula khuvo vaana vi shiyayi makhomi kavili na munane nende vaana vi shikhana makhomi sita.

²²Rehobohamu yarovola mwana wa Maaka walaangwangwa Abiya khuva mwimilili unyala khwimilila vamwavo veve voosi; shichila yali ni inganakani yu khumwamihitsa havukono hehe.

²³Rehobohamu yakhola muhinzilu kwekwe kwosi khuvirila mu vusitsa. Yakavulila valala khu vaana veve mihinzilu chiu khukhola shia havundu hosi mu tsisomo tsia Yuda nende Benyamini, khandi mu mataala koosi ki tsimbinga. Yavaha shia shindu shiosi shia venyanga, navaveshela vakhali vanyishi.