Read tsotso 2 TSINYINGA 12 Bible Online

2 TSINYINGA 12 - tsotso bible

2 TSINYINGA 12

¹Lwa Rehobohamu yali niyakhasinjila ni tsingulu mu vwami, khandi nanyoli tsingulu tsinyishi, ye mwene nende Vaisraeli voosi valekha khulonda Malako ku Mwami Nyasaye.

²Khumuhika kwa kharanu, ku Mwami Rehobohamu yamihanga, shichila Vaisraeli vambakhana khuva vasuuvilwa khu Mwami Nyasaye, Mwami Shishaka wa Misri yakwana vandu va Yerusalemi.

³Yarula mu shivala shia Misri na makaare kiliihe iheelefu indala ni tsimia tsivili, vandu tsiheelefu makhomi sita vahilanga tsifarasi, halala na vasikali vene vanyishi vanyala khuvula khuvalitswa khurula Libia, Suki, nende Etsopia.

⁴Yavukula ni tsingulu malala khu mataala ki tsimbinga ka Yuda, natukha mu Yerusalemi.

⁵Nalwo lwa Muprofeti Shemaya yasimukha natsia khu Mwami Rehobohamu nende vimilili va Yuda, vali nivakanile mu Yerusalemi, shichila Mwami Shishaka. Yavavoolela, “Mwami Nyasaye avoolanga, ‘Lwa mwanzambakhana; khali inzi nzitsanga khumwambakhana nunundi khu Mwami Shishaka amukwane.’ ”

⁶Vimilili va Israeli nende Mwami Rehobohamu vichehitsa; nivavoola, “Mwami Nyasaye akholanga likhola liu vulunji.”

⁷Lwa Mwami Nyasaye yalola ndi vichehitsi vene, yavoolela Muprofeti Shemaya, “Lwa vamali khwichehitsa vene, shinzitsanga khuvativitsa tawe; navutswa nzitsanga khuvahonyinyakhu hatititi vwangu yuvu. Mwami Shishaka shiatsitsanga khusalilitsa vandu va Yerusalemi, shichila vurima vwanje tawe.

⁸Navutswa valiitsa khuva varumishi va Shishaka, nikanyalikha vamanye vwavukhani vuliho hakari wi likhola muhinzilu kwanje nende muhinzilu kwa vami vamihanga vandu vi tsimbia tsindi.”

⁹Mwami Shishaka wa Misri yakwana vandu va Yerusalemi. Yavukula mavishilu ki Litempeli liu Mwami Nyasaye. Yavukula khandi livishilu li inzu yu vwami. Yavukula shia shindu shiosi, khali tsingavo tsia Solomoni yali niyalomba khu itsahabu.

¹⁰Mwami Rehobohamu yalomba havukono hatsio tsingavo khurula khu mukasa. Yavukula tsingavo tsienetso, naha vasikali valindanga vilivwa vi inzu yu vwami.

¹¹Shia isaa yosi yu Mwami Rehobohamu yinjilanga mu Litempeli liu Mwami Nyasaye, valindi vatsitsanga naye, nivachinji tsingavo; nivakharulayo, vatsikalushitsanga mu inzu yavo ya valindilamu.

¹²Mwami Nyasaye shiyavukulila vurima Rehobohamu tawe, shichila Rehobohamu yali mwichehitsi khuye; khandi shiyamutivitsa muno tawe. Khali ndio, vindu vilahi viakholekha mu shivala shia Yuda.

¹³Khali ndio, Rehobohamu yasinjila ni tsingulu mu Yerusalemi, natsililila khwamiha. Rebohamu yali nali ni mihika makhomi kane nu mulala, lwa yaraanga khwamiha. Yamiha mu Yerusalemi, litaala likali liu Mwami Nyasaye yali niyarovola khurula mu mataala koosi mu vandu vi tsimbia tsiosi tsia Israeli khuva havundu ha vasaalilanga khumihika likhomi na saba. Mama wa Rehobohamu yalaangwangwa Nahama, nali Muamoni.

¹⁴Navutswa Rehobohamu yakhola vindu vitamanu, shichila yambakhana khuchelitsa khukhava lienya liu Mwami Nyasaye.

¹⁵Shia shindu shindi shiosi shia Rehobohamu yakhola lwa yamihanga, muliraanga khutukha mulimalilikha; khandi makhuva khulondokhana khu vandu vi inzu yeye, viahandikwa mu Shitabu shi Tsinyinga shiu Muprofeti Shemaya, khandi Mushitabu shiu Muprofeti Ido. Rehobohamu nende Yerobohamu, vali vamenya nivakwananga vene khuvene.

¹⁶Rehobohamu yakhutsa, mmbili kwekwe nu kuyeveelwa mu litaala likali lia Daudi. Mwana wewe Abiya yamiha havukono hehe.