Read tsotso 2 TSINYINGA 19 Bible Online

2 TSINYINGA 19 - tsotso bible

2 TSINYINGA 19

¹Mwami Yehoshafati wa Yuda yakalukha nali mulamu mu inzu yeye yu vwami mu Yerusalemi.

²Navutswa Muprofeti Yehu mwana wa Hanani wali muloli, yasimukha natsia khwakana nu Mwami Yehoshafati. Yavoola, “Usuuvilanga nu vulahi khukhonya vandu vatamanu, uyaanze yavo vahimanga Mwami Nyasaye? Vindu via ukholi vichili Mwami Nyasaye khukhuvukulila vurima.

³Khali ndio, vindu vilala viliho viukholanga vilahi; shichila wativitsa misambwa chia Ashera shia havundu hosi mu shivala shiosi; khandi uchelitsanga khukhava nu mwoyo kwosi Nyasaye.”

⁴Mwami Yehoshafati yamenyanga mu Yerusalemi. Yachendanga shia khase khosi mu vandu, khuraanjila mu litaala lia Beresheba khutukha khu shivala shi vikulu shia Efurahimu. Yakalushitsa vandu venavo khu Mwami Nyasaye, uli Nyasaye wa vakuuka vavo.

⁵Yarovola vakhalachi mu shivala shienesho, mu mataala koosi ki tsimbinga mu shivala shia Yuda.

⁶Yavavoolela, “Muve vacheli khulondokhana khu ka mukholanga; shichila shikali mukhalachilanga khuluveka lu mundu tawe; navutswa khuluveka lu Mwami Nyasaye, uli na munyi lwa mukhalachilanga vandu.

⁷Khulwa yako, muhe Mwami Nyasaye luyali. Muve vacheli mu ka mukholanga; shichila Mwami Nyasaye, uli Nyasaye weru, shianyala khuyaanzilila vandu, khukholelwa vutamanu inoho khwihonelwa inoho khuheelwa asooya tawe.”

⁸Mwami Yehoshafati yarovola mu Yerusalemi vandu valala vuluhia lwa Levi, vasalisi, nende vimilili valala va vandu vi tsinzivulu tsia Israeli khuva vakhalachi. Vaheelwa muhinzilu kukhurumikha mu makhuva khulondokhana khu malako ku Mwami Nyasaye, khandi khuviritsa viyaalo viu mushiina. Vamenyanga mu Yerusalemi.

⁹Yavaha mivaalo, navoola, “Mukhole muhinzilu kwenyu numuha Mwami Nyasaye luyali. Muve vasuuvilwa nu khumurumishila nu mwoyo kwosi.

¹⁰Isaa yosi ya veshie vamenyanga na munyi mu shivala shienyu, varula mu mataala kenyu nivamulerela makhuva ku khuvayaalila, kave ku khwiirana vene khuvene inoho vutamanu vundi vwosi inoho khulondokhana khu malako, mechitso, muvachelihitsi ndi vavuli khukhola vwoni imbeli wu Mwami Nyasaye. Nivavuli khukhola ndio, Mwami Nyasaye aliitsa khumusalilitsa munyi halala navo vululu muno, khurulana khu vurima vwevwe. Navutswa niiva muliitsa khukhola muhinzilu kwenyu, muliitsa khulekha khukholakhu vwoni.

¹¹Mukali wa vasalisi voosi Amaria, neye utsitsanga khumusinjilila mu vindu viosi khulondokhana khu Mwami Nyasaye. Zebadia mwana wa Ishimaeli, uli gavana wa vandu va Yuda, neye utsitsanga khumusinjila mu makhuva khulondokhana khu mwami wamihanga. Vandu vuluhia lwa Levi, navo vatsitsanga khumusinjilila mu makhuva koosi kukhuyaala mushiina. Mukhole shia shindu shiosi numuli ni ikholo. Mwami Nyasaye ave na yavo vakholanga likhola liu vulunji!”