Read tsotso 2 TSINYINGA 20 Bible Online

2 TSINYINGA 20 - tsotso bible

2 TSINYINGA 20

¹Matukhu mati nikakhavira, Vamoabu nende Vaamoni, khandi vandu valala khurula khu Vameuni vitsa nivakwana Mwami Yehoshafati wa Yuda.

²Vandu valala vitsa nivavoolela Mwami Yehoshafati, “Mukaanda kwa vasikali vi tsingulu vitsanga khukhukwana, nivarula mu shivala shia Edomu, khuluveka lundi lwi Inyanza yi Ichumbi. Vatushi khale mu litaala lia Hazazoni-tamari” (Lira lindi ni Engedi.)

³Mwami Yehoshafati yaria, naviritsa khureeveshitsa vukhonyi khurula khu Mwami Nyasaye. Yahaana lilako vandu vahonje vuchila khulia, shia havundu hosi mu shivala shia Yuda.

⁴Vandu va Yuda vivunjelitsa, nivenyanga Mwami Nyasaye avakhonye. Ni kilikali, varula shia havundu hosi mu shia litaala mu shivala shia Yuda, nivakhavanga Mwami Nyasaye.

⁵Mwami Yehoshafati yasinjila imbeli wi shikhaalo shia vandu va Yuda, khandi va Yerusalemi mu Litempeli liu Mwami Nyasaye imbeli wu lwanyi luyia;

⁶navoola, “Mwami Nyasaye, uli Nyasaye wa vakuuka veru, nivi Nyasaye uli mwikulu. Nivi wamihanga vwami vwa vandu vi tsimbia tsiosi khulilova. Nivi uli ni tsingulu nende vunyali. Mundu avulakhuho unyala khukhukuura.

⁷Nivi Nyasaye weru. Lwa vandu vovo Israeli vitsa mu shivala shinu, wa khunganyinya vandu vamenyanga munu, khandi nuha vitsukhulu va Aburahamu wali nali mulina wowo shivala shienesho, khu shive shiavo mihika ni mihika.

⁸Vamenyanga mushio; khandi vayumbakhamu Litempeli khuva havundu ha vasaalilanga khu yivi, nivavoola,

⁹‘Niiva matiinyu kanyala khukhukwila, kave ni liihe inoho vulwale inoho inzala -- khulasinjila imbeli wi Litempeli linu, ni hali ha vasaalilanga; makhusaale khu yivi, nu khuli mu vutiinyu vweru; uliitsa khukhuhulila, nu khukhuhonyinya.’

¹⁰“Navutswa khumenyanga hanu na Vaamoni, Vamoabu nende Vaedomu, vamenyanga mu tsisomo tsia wakaya Vaisraeli vakwane, lwa varula mu shivala shia Misri. Khulwa yako, va valekha, nivavula khuvativitsa.

¹¹Lolakhu khuli vakhuvanzilanga khutsi; vitsi khukhukhunga khurula mu shivala, shia wakhuha khuva shieru shiu khumenyamu.

¹²Nivi Nyasaye weru! Vasalilitse, shichila khuvula tsingulu tsiu khukwana mukaanda kwa vasikali vanyishi, vakhukwananga yava. Khali khukorelwi shia khunyala khukhola; navutswa khulindililanga ukhukhonye.”

¹³Vandu voosi va Yuda, halala na vakhali vavo nende vaana vavo halala na vaana vatoro, vali nivasinjile ha Litempeli henaho.

¹⁴Nalwo lwa Roho wu Mwami Nyasaye yitsa ni tsingulu khu Yahazieli mwana wa Zakaria, mwana wa Benaya mwana wa Ye-hiheli mwana wa Matania, mundu warulanga mu vandu vu lwivulu lwa Levi khandi mwitsukhulu wa Asafu, lwa yali nasinjile mu shikhaalo shia vandu.

¹⁵Yahazieli yavoola, “Mwami Yehoshafati, halala na vandu voosi va Yuda nende Yerusalemi, mumbulishitsi! Mwami Nyasaye avoolanga makhuva yaka shichila munyi, ‘Muvuli khuria inoho khuheenda mwoyo, shichila mukaanda kwa vasikali vanyishi yava. Liihe lia mukwananga shikali ni lienyu tawe, navutswa ni lia Nyasaye.

¹⁶Roonjeli muvakwane mukamba. Valiitsa khuva nivatikulukhanga himbi ha Injila ya Zizi. Mutsitsanga khuvanyola khundulu khu luhoongo luli ivukwi wi Mwichendanyama shia Yeruheli.

¹⁷Liihe livulakhuho lia mutsitsanga khukwana. Mwirecheshe, numulindilila. Musinjile ni tsingulu, mamulole khuli Mwami Nyasaye atsitsanga khumuha likuura. Vandu va Yuda nende Yerusalemi, muvuli khuria inoho khuheenda mwoyo. Roonjeli mukamba muvakwane. Mwami Nyasaye, uli Nyasaye aliitsa khuva na munyi!’ ”

¹⁸Mwami Yehoshafati yakwa hasi mahunama; ma vandu voosi va Yuda nende Yerusalemi nivasikama nivasaala khu Mwami Nyasaye.

¹⁹Vandu valala vuluhia lwa Levi khurula mu tsinzivulu tsia Kohaatsi nende Kora, vasinjila, nivalaanjilila nu mwoyo mukali khwitsominya Mwami Nyasaye, uli Nyasaye wa Israeli.

²⁰Litukhu lialondakhu mu mavwevwe, vasimukha nivatsia mwichendanyama himbi mu litaala lia Tekoha. Lwa vali nivarulaho, Mwami Yehoshafati yasinjila, navoola, “Munyi vandu va Yuda nende Yerusalemi, mumbulishitsi! Muve ni lisuuvila mu Mwami Nyasaye, uli Nyasaye wenyu, mamusinjile ni tsingulu. Muve ni lisuuvila mu vaprofeti veve, mamunyole likuura.”

²¹Lwa Mwami Yehoshafati yali namali khushelenyinya na vandu, yarovola vandu valala khwimbila Mwami Nyasaye tsinyimbo, khandi khumwitsominya shichila vukhumi vu vutakatifu vwevwe, nivaroonjele imbeli wa vasikali. Nindi vimbanga, “Khusanditsanga Mwami Nyasaye, shichila vuyaanzi vwevwe nu mihika ni mihika!”

²²Lwa varaanga khwimba nu khwitsominya, Mwami Nyasaye yakoyanyinya Vaamoni, Vamoabu nende vandu vi shivala shi vikulu shia Edomu, lwa vali nivaseeranga Yuda; manivakuurwa.

²³Vasikali va Vaamoni nende Vamoabu, vakwana vasikali vi shivala shi vikulu shia Edomu; khandi nivavativitsa voosi. Nivamali khumulula vandu vi shivala shi vikulu shia Edomu, vakalukhana niviirana vene.

²⁴Lwa vasikali va Yuda vatukha ha munaara kwali nu kuli mwichendanyama, vaheenza mukaanda kwa vasikali vanyishi, nivalola voosi valaakalale hasi vamali khukhutsa. Mundu avulakhuho wali nashili mwoyo.

²⁵Lwa Mwami Yehoshafati nende vandu veve vitsa khuyaaya vindu, vanyolayo tsing'ombe tsinyishi, viukhulia, tsinguvu, nende vindu vindi viu vukuuli vululu. Vamala matukhu kavaka, nivayaayanga vindu vienevo, navutswa viali vinyishi khuvo.

²⁶Khulitukhu lia khane, vivunjelitsa mu Luhoongo lwa Beraka, wa vitsominyila Mwami Nyasaye. Nashio shivune shichilanga havundu henaho nalaangwa Luhoongo lwa Beraka, nikali khuvoola “Khwitsominya” khali nunundi.

²⁷Mwami Yehoshafati yakalushitsa vasikali veve voosi va Yuda nende va Yerusalemi mu Yerusalemi nivali nu vuyaanzi, shichila Mwami Nyasaye yali umali khuvakuurila vatsiku vavo.

²⁸Lwa vali nivakhatukha mu Yerusalemi, varoonjela nivatsia mu Litempeli liu Mwami Nyasaye, nivakhuvanga vukhana, vilili nende visiliva.

²⁹Vwami vwosi vwa vandu vi tsimbia tsiosi varaanga khuha Mwami Nyasaye luyali, lwa vahulila makhuva khulondokhana khuli Mwami Nyasaye yakwana vatsiku va Israeli.

³⁰Mwami Yehoshafati yamiha mu milembe; Nyasaye namulinda vulahi shia havundu hosi.

³¹Mwami Yehoshafati yamiha Yuda. Yali nali ni mihika makhomi kavaka, lwa yaraanga khwamiha Yuda. Yamiha mu Yerusalemi khumihika makhomi kavili na chiranu. Mama wewe yalaangwangwa Azuba mwana wa Shilihi.

³²Yalonda mwiima kwa tata wewe Asa, vuchila khukulekhakhu. Yakhola likhola liu vulunji imbeli wu Mwami Nyasaye.

³³Navutswa havundu ha vasaalilanga hali nashili khusambulwa. Vandu valekha nu mwoyo kwosi khukhava Nyasaye wa vakuuka vavo.

³⁴Shia shindu shindi shiosi shiu Mwami Yehoshafati yakhola, khuraanga khutukha mulimalilikha, viahandikwa mu Vitabu vi Tsinyinga via Yehu mwana wa Hanani, makhuva kandi kahandikwa mu Shitabu Shikhulu shia vami va Israeli.

³⁵Matukhu kandi nikamali khuvira, Mwami Yehoshafati wa Yuda yakhola lilakano liu khwiyunga nu Mwami Ahazia wa Israeli, wali niyakhola vindu vitamanu vinyishi.

³⁶Vahuchilitsana naye khumbakha mukaanda kwi tsimeli tsiu khutsia mu litaala lia Tarishishi. Lwa vali nivakhumbakha tsimeli tsienetso havundu halaangwangwa Ezioni Geberi,

³⁷Eliezeri mwana wa Dodavahu khurula mu litaala lia Maresha yaprofeta khu Yehoshafati, navoola, “Mwami Nyasaye aliitsa khwononyinya vindu via walomba, shichila ulombi lilakano liu khwiyunga nu Mwami Ahazia.” Tsimeli tsia pomolanyinywa, nitsivula khutsia mu litaala lia Tarishishi.