Read tsotso 2 TSINYINGA 24 Bible Online

2 TSINYINGA 24 - tsotso bible

2 TSINYINGA 24

¹Yohashi yaraanga khwamiha nali ni mihika saba. Yamiha mu Yerusalemi khumihika makhomi kane. Mama wewe yalaangwangwa Zibia wi litaala lia Beresheba.

²Yohashi yakhola likhola liu vulunji imbeli wu Mwami Nyasaye, mumatukhu koosi ka musalisi Yehohada yali nashili mwoyo.

³Musalisi Yehohada yaveshela Mwami Yohashi vakhali vavili; niyivula khuvo vaana vi shiyayi nende vi shikhana.

⁴Matukhu mati nikakhavira, Mwami Yohashi yalola nu vulahi Litempeli liu Mwami Nyasaye khumbakhwa vuyia.

⁵Mwami Yohashi yalaanga halala vasalisi nende vandu vu lwivulu lwa Levi, navavoolela, “Simushi mutsi mu mataala ka Yuda, ma musolole tsisenti tsia Vaisraeli voosi vatushili khurunga shia khumuhika, khulu khulomba vuyia Litempeli lia Nyasaye wenyu. Mukhole vwangu!” Navutswa vandu vu lwivulu lwa Levi shivakhola vwangu tawe.

⁶Khulwa yako, Mwami Yohashi yalaanga musalisi Yehohada, namuvoolela, “Shichila shina nuvula khwenya vandu vu lwivulu lwa Levi khusolola vushuru khurula mu lusomo lwa Yuda nende Yerusalemi, vwa Musa wali murumishi wu Mwami Nyasaye yali niyavoolela Vaisraeli vahaane, khulu khukhonyana mihinzilu chikholekhanga mu Liheemo Litakatifu?”

⁷Vaana varika Atsalia, wali mukhali mutamanu woyo, vapomola nivinjila mu Litempeli liu Mwami Nyasaye; nivarumishila vindu vilimu vitakatifu khusaala khu misambwa chia Baali.

⁸Mwami Yohashi yahaana lilako lisanduku liu khusololelamu tsisenti lilombwi; nu khuvikhwa ilwanyi wi shilivwa shi Litempeli liu Mwami Nyasaye.

⁹Likhuva liarumwa shia havundu hosi mu shivala shia Yuda nende Yerusalemi livoolanga ndi mundu wosi alere khu Mwami Nyasaye vushuru vwa Musa, wali murumishi wa Nyasaye yavoolela Vaisraeli vasolole, lwa vali nivali mwichendanyama.

¹⁰Vimilili voosi nende vandu voosi vasangala; nivalakhula vushuru vwavo mu lisanduku lienelo khutukha lwa litsula.

¹¹Lwa vandu vu lwivulu lwa Levi valeranga lisanduku li vihanwa khu vimilili vakhonyanga Mwami Yohashi, khandi valola litsuli ni tsisenti, muhandichi wu Mwami Yohashi nende murumishi wu musalisi Yehohada, varulitsamu tsisenti tsienetso; khandi vakalushitsa lisanduku lienelo havundu ha liarelwangwa. Vatsililila khukhola ndio, khutukha lwa vasolola tsisenti tsinyishi.

¹²Mwami Yohashi nende Yehohada vavukula tsisenti tsienetso, nivaha vandu vasinjililanga muhinzilu kwa kholekhanga mu Litempeli liu Mwami Nyasaye. Vasamulitsa vafundi va machina, vi tsimbaho, nende vi vivia nende mukasa khukalushila khulomba vuyia Litempeli liu Mwami Nyasaye havundu ha liali niliapomolwa.

¹³Vandu voosi vasinjililanga muhinzilu kwenoko, vakhola muhinzilu ni shinani; nivatsililila khukalushila khulomba vuyia shia havundu hosi ha liali niliapomolwa. Vakalushila khulomba vuyia Litempeli lia Nyasaye, niliva khuli liali niliumbakhwa muliraanga, khali nilitinya khuvira khuli liumbakhwa.

¹⁴Lwa vali nivakhamala khulomba, valera tsisenti tsia vali nivarikale natsio khu Mwami Yohashi nende Yehohada. Varumishila tsisenti tsienetso, khulomba vindu viu khurumikha mu Litempeli liu Mwami Nyasaye. Vindu vilala khuvio viali viu khukholela muhinzilu, na vindi khuhaanilakhu vihanwa viu khusambwa. Valomba khandi khurula khu tsisenti tsienetso tsinjio tsiu vubani nende vindu vindi khurula khu itsahabu nende ifetsa. Vatsililila khukhola musango kwi vihanwa viu khusambwa mu Litempeli liu Mwami Nyasaye, khumatukhu koosi ka Yehohada yali nashili mwoyo.

¹⁵Navutswa Yehohada yahindila, manasakhula. Yakhutsa nali ni mihika imia indala na makhomi kavaka.

¹⁶Vayeveela mmbili kwekwe mu vilindwa via vami vayeveelwamu mu litaala likali lia Daudi; shichila vindu vilahi via yali nakholi mu shivala shia Israeli, khu Nyasaye nende Litempeli lielie.

¹⁷Lwa Yohashi yali niyakhutsa, vimilili va Yuda vatsia khu Mwami Yohashi, nivamuleminya mwoyo. Mwami Yehohada yavahulishitsa.

¹⁸Vandu venavo valekha khusaala mu Litempeli liu Mwami Nyasaye, uli Nyasaye wa vakuuka vavo; nivaraanga khusaala khu misambwa nende vifwanani viu musambwa kwi shikhali kwa Ashera. Mwami Nyasaye yavukulila vurima lusomo lwa Yuda nende Yerusalemi, khurulana khu vwoni vwenovo.

¹⁹Khali ndio, Mwami Nyasaye yaruma vaprofeti khu vandu, khu vakalushitsi khuye mwene. Vavavoolela mivaalo ka valonda, navutswa vambakhana khuvahulishitsa.

²⁰Nalwo lwa Roho wa Nyasaye yitsa ni tsingulu khu mwana wu musalisi Yehohada walaangwangwa Zakaria. Zakaria yasinjila imbeli wa vandu, navoola, “Nyasaye avoolanga, ‘Shichila shina numumeneka malako kaanje? Shiumuliitsa khuhindahala tawe. Lwa mwa mwambakhana, khali inzi mali khumwambakhana.’ ”

²¹Navutswa vamwikhalila, nivakhava khuli vanyala khumwiira. Nikhali vamulesa na machina mu lwanyi lwi Litempeli liu Mwami Nyasaye, nakhutsa khulondokhana khu lilako liu Mwami Yohashi.

²²Mwami Yohashi yivilila vindu vilahi via Yehohada tata wa Zakaria yali niyamukholela; niyiira mwana wewe Zakaria. Lwa Zakaria yali nakhutsanga, yavoola, “Mwami Nyasaye alole ka wu kholanga, nu khuvanzila!”

²³Lwa muhika kwali nu kuvwetsanga, mukaanda kwa vasikali va Siria vakwana Mwami Yohashi. Vaseera shivala shia Yuda nende Yerusalemi, niviira vimilili voosi va vandu. Vahila vindu via vali nivayaaya khu Mwami Yohashi, wali niyamihanga litaala lia Damasika.

²⁴Khali niiva mukaanda kwa vasikali va Siria vali isavu indititi ya vandu, Mwami Nyasaye yavaha tsingulu tsiu khukuura vasikali vanyishi va Yuda; shichila vali valekha Mwami Nyasaye, uli Nyasaye wa vakuuka vavo. Nindi Mwami Yohashi yakhalachilwa.

²⁵Lwa vasikali va Vasiria varuho, valekha Mwami Yohashi nasalili vululu muno. Varumishi veve vamwikhalila khuvanzila shisahi shiu mwana wu musalisi Yehohada, shia yali niyasuundula. Nalwo lwa vamwiirila khu shitali shieshie. Yakhutsa, mmbili kwekwe nu kuyeveelwa mu litaala likali lia Daudi; navutswa shikwayeveelwa havundu ha vami vayeveelwangwa tawe.

²⁶Vandu vikhalila khwiira Mwami Yohashi vali Zabadi mwana wu mukhali Muamoni walaangwangwa Shimehatsi nende Yehozabadi mwana wi shiyayi wu mukhali Mumoabu walaangwangwa Shimuritsi.

²⁷Makhuva kahandikwa khulondokhana khu vaana veve, khali vuprofeti vunyishi khulondokhana khuye, khandi makhuva khuli vakalushila valomba vuyia Litempeli lia Nyasaye kahandikwa mu Shitabu shili na makhuva khu Shitabu shia Vami. Mwana wewe Amazia, yamiha havukono hehe.