Read tsotso 2 TSINYINGA 25 Bible Online

2 TSINYINGA 25 - tsotso bible

2 TSINYINGA 25

¹Amazia yaraanga khwamiha, nali ni mihika makhomi kavili na chiranu. Yamiha mu Yerusalemi khumihika makhomi kavili na tisa. Mama wewe yalaangwangwa Yehodani wi litaala likali lia Yerusalemi.

²Mwami Amazia yakhola likhola liu vulunji imbeli wu Mwami Nyasaye, navutswa shiyakhola nu mwoyo kwosi tawe.

³Lwa yali niyakumila vwami ni tsingulu, yiira varumishi vali niviira tata wewe.

⁴Navutswa shiyiirakhu vaana va varumishi venavo tawe; nikhali yalonda makhuva ku Mwami Nyasaye yali niyavoola mu Malako ka Musa, “Vivuli valiitsa khuvula khwiirwa, shichila vutamanu vwa vaana vavo, inoho vaana khwiirwa, shichila vutamanu vwa vivuli vavo; navutswa shia mundu wosi, aliitsa khukhutsa khulondokhana khu vwoni vwevwe mwene.”

⁵Mwami Amazia yalaanga halala vandu voosi va Yuda nende Benyamini khulondokhana khu mikaanda chia vasikali khandi khulondokhana khu tsinzivulu tsia varulamu. Yarovola vimilili vi mikaanda chia vasikali iheelefu indala nende imia indala. Chialimu na vasikali vali ni mihika makhomi kavili inoho mihika minyishi tsiheelefu tsimia tsivaka. Vali na vasikali varovolwa, virechekha khukwana, vamanya vulahi khukwana na marimu nende tsingavo.

⁶Mwami Amazia yasamulitsa khandi vasikali tsiheelefu imia indala khurula Israeli navarunga ifetsa vitonye tikilo tsiheelefu tsivaka ni tsimia tsine.

⁷Navutswa mundu wa Nyasaye yitsa khuye, navoola, “Yivi Mwami Amazia, uvuli khutsiakhu khukwana halala na vasikali va Israeli; shichila Mwami Nyasaye shiali halala na Israeli, khali nu mundu khurula mu lusomo lwa Efurahimu tawe.

⁸Khali niiva ulatsia, ukwane ni ikholo mu liihe, Nyasaye alachila mutsiku wowo akhukuuri; shichila Nyasaye ali ni tsingulu, tsichilanga mundu akuura inoho akuurwa.”

⁹Mwami Amazia yareeva mundu wa Nyasaye mwenoyo, “Nikholele shina ifetsa yosi yamali khurunga mukaanda kwa vasikali va Israeli?” Mundu wa Nyasaye yachipa, “Mwami Nyasaye aliitsa khukhuha mu vunyishi khuvira yeneyo!”

¹⁰Nalwo lwa Amazia yaseevula vasikali vali nivitsi khuye khurula Efurahimu; navavoolela vatsi ingo. Nikamali khwikholekha kario, vatsia ingo, nivali nu vurima vululu, shichila vandu va Yuda.

¹¹Navutswa Mwami Amazia yatinya ikholo, niyimilila vasikali veve khutsia mu Luhoongo lwi Ichumbi. Vakwanayo niyiira vasikali tsiheelefu likhomi va Vaedomu.

¹²Vasikali va Yuda vakumila khandi ni tsingulu vandu tsiheelefu likhomi nivashili mwoyo. Vavukula vandu venavo, nivavahila hikulu hene khu lwanda. Vavasiuva, voosi nivasionokha.

¹³Navutswa mukaanda kwa vasikali va Vaisraeli, va Amazia yali niyakaya vavuli khutsia naye khukwana, vaseera mataala kali mu shivala shia Yuda, khuraanjila mu Samaria khutukha mu litaala lia Betsi Horoni. Viirayo vandu tsiheelefu tsivaka, khandi nivayaayayo vindu mu vunyishi.

¹⁴Lwa Mwami Amazia yakalukha, namali khwiira vasikali va Vaedomu, yakalukha ni misambwa chia vanyasaye va Vaedomu. Yachivukula nichikwa khuli vanyasaye veve, nachinamila nu khuchikholela misango.

¹⁵Khulwa yako, Mwami Nyasaye yavukulila vurima Mwami Amazia, naruma khuye muprofeti. Muprofeti mwenoyo yamuvoolela, “Shichila shina nutsia khureeva vukhonyi khu vanyasaye va vandu, vakhaywa khuhonyinya vandu vavo vene khurula khu yivi?”

¹⁶Navutswa lwa yali nashilomolomanga, Mwami Amazia yamuvoolela, “Ni litukhu shina lia khwakhurovola khukhonyanila Mwami Amazia inganakani khuli yamihanga? Honjela! Shichila shina wenyanga khwiirwa?” Muprofeti mwenoyo yahonjela, navutswa yavoola, “Manyi ndi Nyasaye ali ni lienya liu khukhutivitsa, shichila ukholi ndio khandi wambakhane khuhulishitsakhu inganakani yanje yakhukhonyi.”

¹⁷Lwa Mwami Amazia wa Yuda yali nareevi inganakani khurula khu vandu vamukhonyanga inganakani, yarumana likhuva khu Mwami Yehohashi wa Israeli, mwana wa Yehohazi khandi mukuuka wa Yehu, namwenyanga amukwane.

¹⁸Navutswa Mwami Yehohashi wa Israeli yachipa Mwami Amazia wa Yuda, “Litukhu lindi, livwa limeelanga mu vikulu via Lebanoni liaruma likhuva khu musala kwa ceda, nilivoola, ‘Veshela mwana wanje wi shiyayi mwana wi shikhana wowo.’ Nalwo lwi inyama yumbulimu yaviraho himbi, niseneela livwa lienelo hasi.

¹⁹Mwami Amazia, nunundi ulolanga wakuura vasikali va Vaedomu; uli mwiloli khandi wichinjililanga. Navutswa nuyaanza khola nuwikhala ingo. Shichila shina uraanjitsanga vutiinyu vunyala khukhutivitsa yivi mwene, halala na vandu vovo va Yuda?”

²⁰Navutswa Mwami Amazia yambakhana khuhulishitsa; shichila Nyasaye yenyanga vatsiku veve vamukuuri, lwa vakhava vukhonyi khu vanyasaye va Edomu.

²¹Mwami Yehohashi wa Israeli yakwana Mwami Amazia wa Yuda. Vakwanila mu litaala lia Betsi-shemeshi lili mu shivala shia Yuda.

²²Mukaanda kwa vasikali va Yuda vakuurwa na Vaisraeli; shia musikali nakalukha ingo wavo.

²³Mwami Yehohashi wa Israeli yakumila ni tsingulu Mwami Amazia wa Yuda, mwana wa Yohashi, mwana wa Ahazia mu litaala lia Betsi-shemeshi; namuhila Yerusalemi. Yapomolayo lisisi lia Yerusalemi khuraanjila khu Shilivwa shia Efurahimu khutukha khu Shilivwa shiu Mumbeka, himbi luchendo lwi tsimita imia indala.

²⁴Yavukula itsahabu nende ifetsa yosi halala ni vindu viosi via vanyola mu Litempeli lia Nyasaye, via vitsukhulu va Obedi-Edomu valindanga, nende livishilu li inzu yu vwami. Yavukulayo vandu vandi khandi; nakalukha Samaria.

²⁵Mwami Amazia wa Yuda yamenya mihika chindi likhomi na chiranu, lwa Mwami Yohashi, wali mwana wa Yehohazi wa Israeli yali niyakhutsa.

²⁶Vindu vindi viosi via Mwamu Amazia yakhola, muliraanga khutukha mulimalilikha mumatukhu keke ka yamihanga, viahandikwa mu Shitabu shi Tsinyinga shia Vami va Yuda nende Israeli.

²⁷Khuraanjila khulitukhu liu Mwami Amazia yalekha khulonda malako ku Mwami Nyasaye, vamwikhalila mu Yerusalemi khuli vamwiira; niyilushila mu litaala lia Lakishi; navutswa varumayo vandu khumukumila khandi nivamwiirilayo.

²⁸Vachinjila mmbili kwekwe khu tsifarasi, nivakuyeveela mu vilindwa via vandu vi inzu yu vwami vayeveelwamu mu litaala likali lia Daudi.