Read tsotso 2 TSINYINGA 27 Bible Online

2 TSINYINGA 27 - tsotso bible

2 TSINYINGA 27

¹Yotsamu yaraanga khwamiha, nali ni mihika makhomi kavili na chiranu. Yamiha mu Yerusalemi khumihika likhomi na sita. Mama wewe yalaangwangwa Yerusha mwana wi shikhana wa Zadoko.

²Yali wi likhola liu vulunji mu likhola imbeli wu Mwami Nyasaye, khuli tata wewe Uzia yali niyakhola; navutswa yalekha khwinjilakhu mu Litempeli liu Mwami Nyasaye, khuli tata wewe Uzia yinjilamu. Nikhali, vandu vatsililila khukhola miima mitamanu.

³Mwami Yotsamu yalomba vuyia Shilivwa shili Ivuluka wi Litempeli liu Mwami Nyasaye, nakhola muhinzilu munyishi khu lisisi lia havundu halaangwangwa Ofeli.

⁴Khali ndio, Mwami Yotsamu yumbakha mataala mu shivala shi vikulu shia Yuda. Yumbakha tsimbinga nende minaara mu vikulu mu miliru.

⁵Mwami Yotsamu yakwana Mwami wa Vaamoni, navakuura. Vaamoni vamurunga vushuru vwi ifetsa tsikilo 3,400, inganu tsitani 1,000, nende ishayiri tsitani 1,000. Vaamoni vamulerela vulitoho vulala vwene vwi vindu vienevo khumuhika kwa khavili nende khavaka.

⁶Mwami Yotsamu yali ni tsingulu tsinyishi muno, shichila yali musuuvilwa khu Mwami Nyasaye, uli Nyasaye wewe.

⁷Shia shindu shindi shiosi shia Yotsamu yakhola, maahe keke koosi, khandi khuli yamenyanga mwene, loli, viosi viahandikwa mu Shitabu shi Tsinyinga shia Vami va Israeli nende Yuda.

⁸Yotsamu yali nali ni mihika makhomi kavili na chiranu, lwa yaraanga khwamiha. Yamiha mu Yerusalemi khumihika likhomi na sita.

⁹Mwami Yotsamu yakhutsa, mmbili kwekwe nu kuyeveelwa mu litaala likali lia Daudi. Mwana wewe Ahazi yamiha havukono hehe.