Read tsotso 2 TSINYINGA 34 Bible Online

2 TSINYINGA 34 - tsotso bible

2 TSINYINGA 34

¹Yosia yaraanga khwamiha nali ni mihika munane. Yamiha nali mu Yerusalemi khumihika makhomi kavaka nu mulala.

²Yali wi likhola liu vulunji imbeli wu Mwami Nyasaye; khandi yalonda mwiima kwa kuuka wewe Daudi. Yalondanga nu mwoyo kwosi malako koosi ka Nyasaye.

³Khumuhika kwa munane lwa Yosia yamihanga, nashili mwana, yaraanga khusaala khu Nyasaye wa kuuka wewe Daudi. Mihika chine nichiakhavira, yaraanga khusambula mu Yuda nende mu Yerusalemi havundu ha vasaalanga khu misambwa, vimanyilu viu musambwa kwi shikhali kwa Ashera, nende misambwa chindi chiosi chia vali nivalomba.

⁴Yimilila vandu khusambula vwaali vuli havundu ha vasaalilanga khu Baali. Yareemakanyinya vwaali vu khusambilakhu vubani vuli hikulu khuvwo. Yasionolanyinya vifwanani via Ashera nende misambwa chindi chiosi chialiho, nasalanyinya lukuushi lwene khu vilindwa via vandu vali niviirwa shichila vavikholela misango.

⁵Mwami Yosia yasamba vikuumba via vasalisi via vandu vasaalanga khu misambwa khu vwaali vwavo. Yarulitsa mu Yuda nende Yerusalemi vindu vienevo.

⁶Mwami Yosia yakhola malala mele khu mataala kandi kali mu vandu vi tsimbia tsia Manaase, Efurahimu, nende Simioni, khali khutukha khuluveka luli ivuluka wu lusomo lwa Nafutali nende mataala kali nikativitswa himbi khuko.

⁷Yasambula vwaali nende vimanyilu via Ashera, nasionolanyinya misambwa chienecho mu lukuushi. Yareemakanyinya mu vitonye vwaali vwosi vwa vasambilakhu vubani shia havundu hosi mu Israeli. Mwami Yosia yakalukha Yerusalemi.

⁸Khumuhika kwi likhomi na munane lwa Mwami Yosia yamihanga, lwa yali namali khunihitsa shivala nende Litempeli, yaruma Shafani mwana wa Azalia, gavana wa Yerusalemi walaangwangwa Maseya, nende Yoha mwana wa Yehohazi, wali mukarani, khutsia khukalushila khumbakha vuyia Litempeli liu Mwami Nyasaye, uli Nyasaye wewe.

⁹Vasimukha nivatsia khu Mukali wa vasalisi voosi Hilikia, nivamuha tsisenti tsiali nitsilerelwi mu Litempeli lia Nyasaye, tsia vandu vu lwivulu lwa Levi vakholanga muhinzilu ku vulindi vwi vilivwa vali nivasolole khurula khu vandu vi tsimbia tsia Manaase, Efurahimu, vandu vandi vali varikala mu Israeli, vandu voosi va Yuda, mu vandu vuluhia lwa Benyamini nende vandu vamenyanga mu Yerusalemi.

¹⁰Vavukula tsisenti tsienetso nivaha vandu va vali nivarovole khusinjilila muhinzilu kukholekhanga khu Litempeli liu Mwami Nyasaye. Vandu venavo varunga vahinzili vu khumbakha vuyia Litempeli.

¹¹Vahaana khandi tsisenti khu vafundi vi tsimbaho nende vumbashi khukuula machina kakhongwa, nende tsimbaho tsi mikulu nende tsirilu tsiu khumbashila tsia vami va Yuda vali nivalekha nitsikuundanga.

¹²Vandu vakhola muhinzilu mu vusuuvilwa. Vandu va vasinjililanga mu muhinzilu kwenoko varulanga mu tsinzivulu tsia vandu vu lwivulu lwa Levi. Navo vali Yahaatsi nende Obadia khurula mu vandu vu lwivulu lwa Merari; Zakaria nende Meshulamu khurula mu vandu vu lwivulu lwa Kohaatsi. Vandu vuluhia lwa Levi voosi vali vayechela khwimba tsinyimbo ni vindu viu vukhana.

¹³Vandu vuluhia lwa Levi vandi navo vasinjililanga vuchinji vwi vindu viu khumbashila khandi navo vaheenzanga mihinzilu chia vandu vakholanga lukanu, na vandi nivava vakarani, veechitsi khandi valindi vi vilivwa.

¹⁴Lwa vali nivavukulanga tsisenti tsiali nitsialerwa mu Litempeli liu Mwami Nyasaye, musalisi Hilikia yanyola Shitabu shia Malako ku Mwami Nyasaye ka Musa yali niyahaana.

¹⁵Nalwo lwa Hilikia yavoolela mukarani Shafani, “Nyoli Shitabu shia Malako mu Litempeli liu Mwami Nyasaye.” Yaha Shafani shitabu shienesho.

¹⁶Shafani yavukula shitabu shienesho nahila khu Mwami Yosia namuvoolela, “Khutsi va khuli varumishi vovo khukholanga shia shindu shiosi shia wavoola khukhole.

¹⁷Khuvukule tsisenti tsiali nitsiavikhwa mu Litempeli liu Mwami Nyasaye, khurunji vimilili vasinjililanga muhinzilu khu varunji vahinzili vavo.”

¹⁸Mukarani Shafani yavoolela Mwami Yosia, “Musalisi Hilikia umbeele shitabu.” Shafani yasoma shitabu shienesho imbeli wu Mwami Yosia.

¹⁹Lwa Mwami Yosia yahulila makhuva ka vasomanga khurula mu shitabu shienesho, yarandula tsikaanzu tsietsie.

²⁰Yahaana lilako yili khu musalisi Hilikia, Ahikamu mwana wa Shafani, Abudoni mwana wa Mika, mukarani Shafani, nende Asaya, murumishi wakhonyanga Mwami Yosia:

²¹“Simushi mutsi khundevela inzi halala na vandu vaanje varikala vamenyanga mu Yerusalemi nende Yuda makhuva kahandikwa mu shitabu shia munyoli yishi. Mwami Nyasaye umali khukhuvukulila vurima vunyishi, shichila vakuuka veru vambakhana khulonda likhuva lielie; khandi valekha khukholakhu shindu shiosi khulondokhana khu ka shitabu yishi shivoolanga.”

²²Musalisi Hilikia halala na yavo vu Mwami Yosia yali niyaruma vasimukha nivatsia khulomoloma khu muprofeti mukhali walaangwangwa Hulida, nali mukhali wa Shalumu mwana wa Tokhatsi, mwana wa Tikiva khandi mukuuka wa Harihasi, wasinjililanga lisanduku li tsikaanzu. Hulida yamenyanga mu Yerusalemi, mu Lusomo lwa Khavili.

²³Hulida yavavoolela, “Mwami Nyasaye, uli Nyasaye wa Israeli avoolanga, ‘Voolela mundu ukhurumi khwinzi,

²⁴ndi nzitsanga khulera matiinyu havundu hanu khandi khu vandu vamenyaho -- vilaamo viosi viahandikwa mu shitabu shiavasomi imbeli wu Mwami wa Yuda yishi.

²⁵Lwa vamali khunzambakhana khandi vakholi misango khu vanyasaye vandi, vakholi khuvavukulila vurima khurulana khu vindu viosi via valomba ni mikhono chiavo. Nzitsanga khuvukulila vurima havundu hanu, khandi vuliitsa khuvula khuvwa.’

²⁶Yaka nako ka inzi Mwami Nyasaye mbolanga shichila Mwami Yosia, wahulishitsa kahandikwa mu shitabu yishi,

²⁷manuwikanila khandi nu wichehitsa mwene imbeli wanje, nurandula tsikaanzu tsiotsio nulila, lwa wahulila nisiomanga khuli nzitsanga khusalilitsa havundu hanu khandi vandu vamenyaho. Mali khuhulila lisaala liolio.

²⁸Lola, uliitsa khukhutsa khuli vakuuka vovo vakhutsa, mmbili kwokwo kuyeveelwi mu shilindwa mu milembe. Shiutsitsanga khulolakhu matiinyu ka nzitsanga khulera havundu hanu khandi khu vandu vamenyanga hanu tawe.” Vandu venavo vakalukha khu Mwami Yosia ni lichipu yili.

²⁹Nalwo lwa Mwami Yosia yalaanga halala vimilili voosi va Yuda nende Yerusalemi.

³⁰Yasimukha halala na vandu va Yuda nende Yerusalemi, vasalisi nende vandu vu lwivulu lwa Levi -- vandu voosi khuraanjila khu muti khutukha khu vakali, nivatsia mu Litempeli liu Mwami Nyasaye. Yavasomela makhuva kali mu Shitabu shi Lilakano, shia vali nivanyoli mu Litempeli liu Mwami Nyasaye.

³¹Mwami Yosia yasinjila havundu hehe, nakhola vuyia lilakano nu Mwami Nyasaye, khulonda malako keke, mivaalo nende mechitso keke nu mwoyo kwekwe kwosi khandi ni tsingulu tsietsie tsiosi; khandi khukhola ka lilakano lienyanga kakholwi, khuli kahandikwa mu shitabu yishi.

³²Yalomba shia mundu wosi mu Yerusalemi khandi mu lusomo lwa Benyamini khulaaka khukhola ka lilakano lienyanga kakholwi. Vandu va Yerusalemi vakhola ndio, khulondokhana khuli Lilakano liu Mwami Nyasaye, uli Nyasaye wa vakuuka vavo lienyanga kakholwi.

³³Mwami Yosia yononyinya misambwa chiosi chi shifwavi chia vandu, chiali mu tsisomo tsiosi mu Israeli. Yakhola vandu voosi vali nivitsi mu Yerusalemi khurumishila Mwami Nyasaye, uli Nyasaye wavo. Vandu vatsililila khulonda malako ku Mwami Nyasaye, uli Nyasaye wa vakuuka vavo, lwa Mwami Yosia yali nashili mwoyo.