Read tsotso 2 TSINYINGA 35 Bible Online

2 TSINYINGA 35 - tsotso bible

2 TSINYINGA 35

¹Mwami Yosia yikhoyela Mulukha kwa Pasaka mu Yerusalemi khuha Mwami Nyasaye luyali. Vasinza likondi liu Mulukha kwa Pasaka khulitukhu li likhomi na kane khu mweli ku khuraanga.

²Yaha vasalisi mihinzilu chiavo chiu khukhola mu Litempeli liu Mwami Nyasaye, navatinyilitsa vachikhole vulahi vwene.

³Mwami Yosia yavoolela vandu vu lwivulu lwa Levi, vahaananga mivaalo khu Vaisraeli voosi; khandi vali nivakholwa khuva vatakatifu khu Mwami Nyasaye, “Vishi Lisanduku li Lilakano Litakatifu mu Litempeli liu Mwami Solomoni, mwana wa Daudi yumbakha. Muvuli khulichinga khu maveeka kenyu; navutswa khutukha murumishile Mwami Nyasaye, uli Nyasaye wenyu nende vandu veve Israeli.

⁴Vukuli vwiyangu vwenyu mu Litempeli khulondokhana khu tsinzivulu tsienyu, khulondokhana khu mihinzilu chia mwaheelwa nu Mwami Daudi wa Israeli nende mwana wewe Mwami Solomoni,

⁵ma musinjile Havundu Hatakatifu khulondokhana khu tsinzivulu tsia vakuuka venyu, khali shia vandu vavula muhinzilu kwosi mu Israeli.

⁶Mulasinza likondi liu Mulukha kwa Pasaka, mwikhole vene khuva vatakatifu, ma murecheshitsili Vaisraeli veshie shia valia, khulondokhana khu mivaalo ku Mwami Nyasaye yahaana khuvirila khu Musa.”

⁷Mwami Yosia yahaana khurula mu shiayo shieshie makondi, vimeme via makondi nende vi tsimbuli tsiheelefu makhomi kavaka, nende vihuunwa tsiheelefu tsivaka khulu khwikhoyela Mulukha kwa Pasaka

⁸Khali varumishi veve virulitsa nu mwoyo mulala khuhaana vukhonyi vwavo khu vandu, vasalisi, nende vandu vu lwivulu lwa Levi. Varumishi vasinjililanga Litempeli liu Mwami Nyasaye, Mukali wa vasalisi voosi Hilikia, Zakaria, nende Yeheli, vahaana khu vasalisi vimeme via makondi nende vimeme vi tsimbuli tsiheelefu tsivili ni tsimia sita nende tsichilishi tsimia tsivaka, tsia vahaana khuli vihanwa vi misango chiu Mulukha kwa Pasaka.

⁹Khali Konania, Shemaya nende Netsaneli, nivali vamwavo veve, Hashabia, Ye-hiheli, Yozabadi, navo vali vimilili va vandu vu lwivulu lwa Levi; vahaana khandi khu vandu vu lwivulu lwa Levi vimeme via makondi nende tsimbuli tsiheelefu tsiranu nende tsichilishi tsimia tsiranu, khuli vihanwa viu Mulukha kwa Pasaka.

¹⁰Lwa vindu viosi viali niviakharechekhwa shichila mulukha kwa Pasaka, vasalisi nende vandu vu lwivulu lwa Levi vavukula vwiyangu vwavo, khulondokhana khuli Mwami Yosia yali navooli.

¹¹Lwa vimeme via makondi nende tsimbuli viali niviakhasinzwa, vandu vu lwivulu lwa Levi vasinza vimeme vienevo; ma vasalisi nivamitsa masahi kavio khu vwaali.

¹²Vakavula mu vandu miruku chi vihanwa viu khusambwa khulondokhana khu vituma via vandu vi tsinzu, khu vavihaane khulondokhana khu mivaalo kali mu Malako ka Musa.

¹³Vandu vuluhia lwa Levi vahembela misango chiu Mulukha kwa Pasaka khu mulilu, khulondokhana khu mivaalo, khandi nivateshela vihanwa vitakatifu mu tsinyungu, tsingalayi, nende tsinjo; vakavulila vandu inyama vwangu.

¹⁴Nivakhamala khukhola ndio, vandu vu lwivulu lwa Levi vavukula inyama yavo vene khandi ya vasalisi vali vitsukhulu va Haruni; shichila vasalisi vakhola muhinzilu khutukha vutukhu, nivasambanga vihanwa viu khusambwa nende shivana shi miruku chiu khukholela misango.

¹⁵Vandu vimbanga tsinyimbo vuluhia lwa Levi khurula mu vandu vu lwivulu lwa Asafu yava vavukula vwiyangu vwavo khuli Mwami Daudi yali niyavivaalila: Asafu, Hemani, nende Yedutsuni, wavetsanga muprofeti wu Mwami Yosia. Valindi vi vilivwa vi litempeli shivarulakhu havundu ha valindanga tawe, shichila vandu vu lwivulu lwa Levi vandi navo va valombelanga shiukhulia shia Pasaka.

¹⁶Shia shindu shiosi shiakholwa khulitukhu lienelo, khusaala khu Mwami Nyasaye, khukhola kenyekhanga khulondokhana khu Mulukha kwa Pasaka, khandi khuhaana vihanwa viu khusambwa khu vwaali.

¹⁷Vaisraeli valiho khulitukhu lienelo vikhoyela Mulukha kwa Pasaka, khandi nivikhoyela Mulukha Kukhulia Mukati kwalombwa vuchila Mamela khumatukhu saba.

¹⁸Mulukha kwa Pasaka kuvulakhuho khuli kwenoko kwakholekhakhu, khurula mumatukhu ka Muprofeti Samweli. Khali Mwami avulakhuho mu vami vamihanga wikhoyelakhu mulukha khuli kwa Mwami Yosia, vasalisi, vandu vu lwivulu lwa Levi, nende vandu va Yuda, Israeli nende Yerusalemi vikhoyela.

¹⁹Mulukha kwa Pasaka kwenoko khwikhoyelwa khumuhika kwi likhomi na munane, lwa Mwami Yosia yamihanga.

²⁰Lwa Mwami Yosia yali namali khukhola vindu vienevo viosi khu Litempeli, Mwami Neko wa Misri yimilila mukaanda kwa vasikali veve, khutsia khukwana mu litaala lia Karakemishi khu Muchela kwa Efurate. Yosia yaroonjela natsia khumukwana.

²¹Navutswa Mwami Neko yaruma varumwa khuye nivavoola, “Mwami wa Yuda, ni shina shia khuvunanga hakari hoho nende inzi? Shingwananga yivi nunundi tawe, navutswa vatsiku vaanje. Nyasaye umali khumbolela khole vwangu. Lekha khuhinganyinya Nyasaye, uli ninzi, inoho aliitsa khukhutivitsa.”

²²Navutswa Mwami Yosia yali nu mwoyo ku khwenya khukwana. Yambakhana khuhulishitsa ka Nyasaye yali navooli khuvirila khu Mwami Neko wa Misri amuvoolele. Yimwaminya mwene natsia khukwanila mu lwomera lwa Megido.

²³Lwa vali nivakwananga mu liihe, Mwami Yosia yaleswa nu muvanu ku Mmisiri. Yahaana lilako khu varumishi veve, “Ndulitsi havundu hanu; salilitswi vululu muno!”

²⁴Vamurulitsa mu likaare lielie liliihe lia yali nalimu, nivamuvikha mu likaare lielie liliihe lindi; manivamuhila Yerusalemi, ma nakhutsilayo. Mmbili kwekwe kwayaveelwa mu vilindwa via vandu vi inzu yavo yu vwamihi; ma vandu voosi vamenyanga mu Yuda nende Yerusalemi nivamwikhula.

²⁵Muprofeti Yeremia yalomba lwimbo lu khwikhula Mwami Yosia. Khali nunundi vandu vimbanga tsinyimbo mu Israeli, vave vasatsa nende vakhali khurumishila lwimbo lwenolo khumwikhula. Lwimbo lwenolo lunyolekhanga mu shitabu shiahandikwa shi tsinyimbo tsiu khwikhula.

²⁶Shia shindu shindi shiosi shiu Mwami Yosia yakhola, khuli yihaana nu mwoyo kwosi khu Mwami Nyasaye, nu khulonda Malako keke;

²⁷khandi vindu via mwene yakhola mu limenya lielie, muliraanga khutukha mulimalilikha, viosi viahandikwa mu Shitabu shia Vami va Israeli nende Yuda.