Read tsotso 2 TSINYINGA 7 Bible Online

2 TSINYINGA 7 - tsotso bible

2 TSINYINGA 7

¹Lwa Mwami Solomoni yali namali khusaala lisaala lielie, mulilu kwarula mwikulu, nu kulaalitsa vihanwa viu khusambwa nende misango; ma vukhumi vu Mwami Nyasaye nu vwitsula mu Litempeli.

²Vasalisi shivali vinjila mu Litempeli liu Mwami Nyasaye tawe; shichila vukhumi vu Mwami Nyasaye vwitsula mulio.

³Lwa Vaisraeli voosi valola mulilu nu kurulanga mwikulu, khandi vukhumi vu Mwami Nyasaye nuvuli khu Litempeli, vinama havundu ha vasinjilanga henaho, nivasaala, khandi nivasanditsa Mwami Nyasaye. Vavoola, “Nyasaye nu mulahi; shichila vuyaanzi vwevwe nu vwi mihika ni mihika.”

⁴Nalwo lwa Mwami Solomoni nende vandu voosi vakhola misango khu Mwami Nyasaye.

⁵Mwami Solomoni yakhola musango kwi tsing'ombe tsiheelefu makhomi kavili na tsivili nende makondi tsiheelefu imia indala na makhomi kavili. Mwami Solomoni nende vandu voosi vatakasa Litempeli lia Nyasaye.

⁶Vasalisi vavukula vwiyangu vwavo, khali vandu vu lwivulu lwa Levi vakhola ndio, nivitsominyanga Mwami Nyasaye ni vindu viavo viu khwimbila, viu Mwami Daudi yalomba vive viu khwitsominyila Mwami Nyasaye; khandi via yarumishilanga khulu khusanditsa Mwami Nyasaye, navoola, “Mwami Nyasaye wakhuyaanza mihika ni mihika!” Vasalisi vakhuva visiliva; Vaisraeli voosi nivasinjila.

⁷Mwami Solomoni yatakasa havundu hali hakari wu lwanyi, lwavetsanga imbeli wi Litempeli liu Mwami Nyasaye; shichila naho ha yahaanila shihanwa shiu khusambwa nende shivana shi vihanwa viu khulera milembe. Yakhola ndio, shichila vwaali vwa yali niyaloomba khu mukasa vwali vutititi muno, khali shihanwa shiu khusambwa, shihanwa shi imu nende shivana, shiviali viatukhakhu tawe.

⁸Mwami Solomoni nende Vaisraeli voosi vikhoyela Mulukha kwa Matiili khumatukhu saba. Khwaliho na vandu vanyishi, khuraanjila khu Injila ya Hamaatsi khutukha khu muchela kuli khu mupaka kwa Misri.

⁹Vali vatakasi vwaali khumatukhu saba; khandi matukhu kandi saba khwikhoyela mulukha. Vamala khwikhoyela mulukha kwenoko khulitukhu liukhumalilikha.

¹⁰Khulitukhu lia makhomi kavili na kavaka, liu mweli kwa saba, Mwami Solomoni yaseevula vandu khutsia ingo wavo. Vali nu vuyaanzi vunyishi khandi nivasangala, shichila vindu vilahi, viu Mwami Nyasaye yali niyakholela Daudi nende vandu veve Israeli.

¹¹Lwa Mwami Solomoni yali namali khumbakha Litempeli liu Mwami Nyasaye nende inzu yu vwami, khandi namali khukhola shia shindu shiosi, shia yali naloshitsi khukhola mu Litempeli liu Mwami Nyasaye nende inzu yeye yu vwami,

¹²Mwami Nyasaye yalolekha khuye mu vutukhu; navoola, “Mali khuhulila lisaala liolio; khandi ndovole Litempeli linu, khuva havundu ha vakholela misango.

¹³Lwa niitsa khwikalila imbula khuvula khukhuva, inoho khuvoolela tsisichi khwononyinya viraakwa mu milimi, inoho khurumila vandu vaanje lukhutsu;

¹⁴niiva vandu vaanje valiitsa khusaala khwinzi, nu khwikanila khurula mu vwoni vwavo, khandi valeshe khukhola vindu vitamanu, niitsa khuvahulila nindi mwikulu. Niitsa khuvasemeha khurula mu vwoni vwavo, khandi nombe shivala shiavo khuhindahala khandi.

¹⁵Niitsa khuheenza Litempeli linu manzirecheshe khuhulila lisaala liosi lia vandu vasaalanga hanu,

¹⁶shichila mali khulirovola khandi mali khulitakasa khuva havundu ha valiitsa khusaalilanga khwinzi mihika ni mihika. Naliheenza nu khulilinda khumatukhu koosi.

¹⁷Niiva yivi Mwami Solomoni, ulandumishila mu vusuuvilwa, khuli tata wowo yakholanga, nu khukhola shia shindu shiosi shia khuvoolela, ulonde mechitso nende mivaalo kaanje;

¹⁸nalwo lwa ndweshitsa lilaaka lia nali nalaaka tata wowo Daudi. Lwa namuvoolela, ‘Mulala khu vitsukhulu vovo aliitsa khwamiha shivala shia Israeli.’

¹⁹Navutswa niiva muliitsa khunzambakhana nu khwivilila khulonda malako nende mivaalo kaanje ka namuha, mamutsi khusaala khu vanyasaye vandi,

²⁰nalwo lwa niitsa khumukhunga mu shivala shia namuha; khandi nalwo lwa niitsa khwambakhana Litempeli lia mali khutakasa linu, khuva havundu ha vasaala khwinzi. Niitsa khulikhola liava khuli likhuva liu khukholelwa shihenye henye, nu khuchaywa na vandu voosi.

²¹“Khali niiva Litempeli liaheelwa luyali lunyishi muno, vandu voosi valiitsa khuchenda nivavirilaho valiitsa khuva nilichenya, nivavoola, ‘Shichila shina Mwami Nyasaye nakhola yaka khu shivala yishi nende Litempeli linu?’

²²Nalwo lwa valichipa, ‘Shichila vivilila khulonda malako ku Mwami Nyasaye, warulitsa vakuuka vavo mu shivala shia Misri; nivahaanda khu vanyasaye vandi khandi nivasaala khuvo. Nashio shivune shiachila Mwami Nyasaye navarumila matiinyu yaka koosi.’ ”