Read tsotso EZIRA 1 Bible Online

EZIRA 1 - tsotso bible

EZIRA 1

¹Khumuhika ku khuraanga muliamiha liu Mwami Kureeshi wa Perisia, khulu khwenya likhuva liu Mwami Nyasaye lia yavoolela Yeremia lirweshitswi, Mwami Nyasaye yatsuva Mwami Kureeshi khuvoolela vandu voosi shia havundu hosi mu vwami vwevwe makhuva khulondokhana khu lilako yili nu khulihandika lisomwi mu shivala shieshie,

²“Mwami Kureeshi wa Perisia avoolanga, ‘Mwami Nyasaye, uli Nyasaye wu mwikulu, umbeele vwami shia havundu hosi khulilova, khandi umbeele vunyali vu khumbakha Litempeli lielie mu Yerusalemi, mu lusomo lwa Yuda.

³Nyasaye wenyu ave na munyi voosi vamuli vandu veve. Mwenyekhanga mutsi Yerusalemi khumbakha vuyia Litempeli liu Mwami Nyasaye, uli Nyasaye wa Israeli -- neye Nyasaye wa vasaalakhu mu Yerusalemi.

⁴Shia mulala warikala mwoyo khu vandu veve, vali nivamenya mu vuhaambe nali ni lienya liu khukalukha, khutukha vareende veve vamukhonye ifetsa nende itsahabu, miandu nende miruku, khali ni vihanwa viu khwirulitsa khuhaana nu mwoyo mulala mu Litempeli lia Nyasaye mu Yerusalemi.’ ”

⁵Vimilili vi tsinzivulu tsia vandu vi tsimbia tsia Yuda nende Benyamini, vasalisi nende vandu vu lwivulu lwa Levi, khandi shia mundu wosi wa Nyasaye yali natsuvi virechekha nivatsia khumbakha vuyia Litempeli liu Mwami Nyasaye mu Yerusalemi.

⁶Vareende vavo voosi va vakhonya ni vindu vialombwa khu ifetsa nende itsahabu, miandu nende miruku, nende vihanwa vindi viu vukuuli, khumeeta khu vihanwa vindi via vali nivirulitsa khuhaana nu mwoyo mulala.

⁷Mwami Kureeshi wa Perisia ya vakalushitsila tsibakuli nende vikombe viu Mwami Nebukadineza yali niyarulitsa mu Litempeli liu Mwami Nyasaye mu Yerusalemi; navikha mu litempeli lia vanyasaye veve.

⁸Yavukula vindu vienevo naha Mitsiredatsi, mwimilili wi livishilu li inzu yu vwami. Yavivalitsa, naha vindu vienevo Sheshibazari, wali nali mwamihi wa Yuda.

⁹Isavu yi vindu via valitswa viali: tsisahani makhomi kavaka tsialombwa khu itsahabu tsibakuli iheelefu indala tsialombwa khu ifetsa tsinjoo makhomi kavili na tisa tsialombwa khu ifetsa

¹⁰tsibakuli makhomi kavaka tsialombwa khu itsahabu; tsibakuli tsindititi tsimia tsine ni likhomi tsialombwa khu ifetsa nende vindu vindi iheelefu indala.

¹¹Isavu yosi yi vindu vialombwa khu itsahabu nende ifetsa yali vindu tsiheelefu tsiranu ni tsimia tsine. Sheshibazari yavukula vindu vienevo, navihila Yerusalemi, mumatukhu ka vandu varulitswa mu vuhaambe nivahilwa Yerusalemi.