Read tsotso EZIRA 10 Bible Online

EZIRA 10 - tsotso bible

EZIRA 10

¹Lwa Ezira yali nasaalanga khandi niyiyama vwoni vwevwe havulavu, nalila nakwa mahunama imbeli wi Litempeli; shituma shikali shia Vaisraeli, nivali vandu vasatsa, vakhali, nende vaana vivunjelitsa havundu ha yali nali. Vandu venavo valilanga vululu muno.

²Shekania mwana wa Yeheli, khurula mu vandu vu lwivulu lwa Elamu, yavoolela Ezira, “Khwiyamanga khwakhaywa khuva vasuuvilwa imbeli wa Nyasaye weru, shichila khwahila vakhali khurula mu vandu vi tsimbia tsindi. Navutswa khali ndio, lisuuvilitswa liliho shichila Israeli.

³Khulwa yako, leshi khukhole lilakano na Nyasaye weru liu khulekhana na vakhali va khwahila voosi nende vaana vavo. Khulalonda inganakani yoyo yu vukhonyi khandi ya vandu vaheetsanga malako ka Nyasaye weru luyali vakhuvoolela khulonde. Shia shindu shiosi shiliitsa khwikholekha khulondokhana khu malako.

⁴Kholi vwangu, shichila nu muhinzilu kwenyu vene. Khutsi khuli inyuma wenyu. Tinyi mamukhole.”

⁵Khu, Ezira yaraanga khukakhola, lwa yakhola vimilili va vasalisi, va vandu vu lwivulu lwa Levi, khandi va vandu vali nivarikale khwisuuha ndi valiitsa khukhola ka Shekania yali navooli.

⁶Ezira yarula imbeli wi Litempeli lia Nyasaye natsia mu inzu ya Yehohanani, mwana wa Eliashibu. Ezira yakonamu vutukhu vwosi vuchila khulia inoho khung'wakhu matsi; shichila yikhalanga vandu vali nivaruli mu vuhaambe lwa vambakhana khuva vasuuvilwa.

⁷Likhuva lialanditswa shia havundu hosi mu shivala shia Yuda nende mu litaala likali lia Yerusalemi ndi vandu voosi vali nivaruli mu vuhaambe vivunjelitsili mu Yerusalemi.

⁸Niiva mundu aliitsa khwambakhana khutukhaho matukhu kavaka nikashili khuvira, khulondokhana khu lilako lia vimilili nende vasakhulu vali nivaviritsa, aliitsa khunuulwa miandu chiechie chiosi, nu khurungwa khurula mu vandu vali nivarula mu vuhaambe.

⁹Vandu voosi vi tsimbia tsia Yuda nende Benyamini vivunjelitsila mu Yerusalemi matukhu kavaka nikashili khuvira. Kikholekha mweli kwa tisa, khulitukhu lia makhomi kavili liu mweli kwenoko. Vandu voosi vikhala mu lwanyi lwi Litempeli lia Nyasaye, nivatechelanga shichila makhuva kenako khandi shichila imbula inyishi yali nikhuvanga.

¹⁰Nalwo lwa musalisi Ezira yasinjila navavoolela, “Mwakhola vwoni; shichila mwahila vakhali khurula mu vandu vi tsimbia tsindi, khandi mwalerela Israeli vutamanu.

¹¹Khulwa yako, mwiyame havulavu mwakhola vwoni khu Mwami Nyasaye, uli Nyasaye wa vakuuka venyu, mamukhole lienya lielie. Mwiyahule haluveka khurula khu vandu vamenyanga mu shivala shinu khandi khurula khu vakhali venyu vamwahila khurula mu vandu vi tsimbia tsindi.”

¹²Vandu voosi valaanjilila nivachipa, “Nindio kali; khuliitsa khukhola khuli uvooli khukhole.”

¹³Navutswa vatsililila nivavoola, “Vandu va khuli hanu ni vanyishi khandi ni matukhu ka imbula ikhuvanga inyishi. Shiukhunyala kutsililila khusinjila mushikuri tawe. Khumeeta khu kenako, shiukhunyala khukhola muhinzilu yuku khulitukhu lilala inoho kavili tawe; shichila khwakhola vwoni vunyishi mbirilila.

¹⁴Nu vulahi vimilili veru vakhole kenyekhanga khulweru voosi. Mundu wosi wahila mukhali khurula mu vandu vuluhia lundi yitsi hanu mumatukhu kaviritswa, nali halala na vimilili nende vakhalachi vi litaala lielie; khu Nyasaye weru avuli khukhulolela vurima shichila vikholwa vieru.”

¹⁵Mundu avulakhuho wahinganyinya ka vali nivavooli, nikakhali Yonatsani mwana wa Asaheli nende Yazeya mwana wa Tikiva. Meshulamu nende Shebetsai warulanga mu vandu vu lwivulu lwa Levi navo vavakhonya mu makhuva kenako.

¹⁶Vandu vali nivarula mu vuhaambe vakhola khuli vavoolelwa. Khulwa yako, musalisi Ezira yarovola vandu khurula mu vimilili vi tsinzivulu nahandika mira kavo khulondokhana khu shia inzu. Khulitukhu liu khuraanga liu mweli kwi likhomi vikhala nivaraanga khurunishitsa makhuva kenako.

¹⁷Khulitukhu liu khuraanga liu mweli ku khuraanga, vali vamali khurunishitsa shia shindu shiosi khulondokhana khu vandu vali nivahila vakhali khurula mu vandu vi tsimbia tsindi.

¹⁸Vandu vu lwivulu lwa vasalisi vali nivahila vakhali khurula mu vandu vi tsimbia tsindi kalolekha ni Maseya, Eliezeri, Yaribu, nende Gedalia, nivali vandu vu lwivulu lwa Yeshwa mwana wa Yozadaki, halala na vamwavo veve.

¹⁹Vaviritsa nivalaka valiitsa khulekhana na vakhali vavo, nivahaana limiiko khuli shihanwa shiu musango khulu vwoni vwavo.

²⁰Hanani nende Zebadia navo vanyolekha mu lwivulu lwa Imeri.

²¹Maseya, Eliya, Shemaya, Yeheli nende Uzia navo vanyolekha mu lwivulu lwa Harimu.

²²Eliohenai, Maseya, Ishimaeli, Netsaneli, Yozabadi; nende Elasa navo vanyolekha mu lwivulu lwa Pashuri.

²³Yozabadi, Shimei, Kelaya (lira lindi Kelita), Petsahia, Yuda, nende Eliezeri navo vanyolekha mu vandu vu lwivulu lwa Levi.

²⁴Eliashibu neye wanyolekha mu vimbi vi tsinyimbo. Shalumu, Telemu, nende Uri navo vanyolekha mu valindi vi Litempeli.

²⁵Vandu vu lwivulu lwa Paroshi, Ramia, Izia, Malukiya Miyamini, Eliazari, Malukiya nende Benaya navo vanyolekha mu Vaisraeli vandi.

²⁶Matania, Zakaria, Yeheli, Abudi, Yeremotsi, nende Eliya navo vanyolekha mu lwivulu lwa Elamu.

²⁷Eliohenai, Eliashibu, Matania, Yeremotsi, Zabadi, nende Aziza navo vanyolekha mu lwivulu lwa Zatu.

²⁸Yehohanani, Hanania, Zabai, nende Atsulai navo vanyolekha mu lwivulu lwa Bebai.

²⁹Meshulamu, Maluku, Adaya, Yashubu, Shehali nende Yeremotsi navo vanyolekha mu lwivulu lwa Bani.

³⁰Adina, Kelali, Benaya, Maseya, Matania, Bezaleli, Binui, nende Manaase navo vanyolekha mu lwivulu lwa Pahatsi-moabu.

³¹Vandu vanyolekha mu lwivulu lwa Harimu vali Eliezeri, Ishiya, Malukiya, Shemaya, Simioni,

³²Benyamini, Maluku, nende Shemaria.

³³Matenai, Matata, Zabadi, Elifeleti, Yeremai, Manaase, nende Shimei navo vanyolekha mu lwivulu lwa Hashumu.

³⁴Vandu vanyolekha mu lwivulu lwa Bani vali Mahadai, Amuramu, Uheli,

³⁵Benaya, Bedeya, Keluhi,

³⁶Vania, Meremotsi, Eliashibu,

³⁷Matania, Matenai, nende Yahasu.

³⁸Vandu vanyolekha mu lwivulu lwa Binui vali Shimei,

³⁹Shelemia, Natsani, Adaya,

⁴⁰Makanadebai, Shashai, Sharai,

⁴¹Azareli, Shelemia, Shemaria,

⁴²Shalumu, Amaria nende Yosefu.

⁴³Ye-hiheli, Matitsia, Zabadi, Zebina, Yadai, Yoeli, nende Benaya navo vanyolekha mu lwivulu lwa Nebo.

⁴⁴Vandu venavo voosi vali vahila vakhali khurula mu vandu vi tsimbia tsindi. Valekhana na vakhali venavo halala na vaana vavo.