Read tsotso EZIRA 4 Bible Online

EZIRA 4 - tsotso bible

EZIRA 4

¹Vatsiku va vandu vi tsimbia tsia Yuda nende Benyamini vanyola likhuva ndi vandu vali nivakalushi khurula mu vuhaambe vumbakhanga vuyia Litempeli liu Mwami Nyasaye, uli Nyasaye wa Israeli.

²Vasimukha nivatsia khulola Zerubabeli nende vimilili va vandu vi tsinzivulu, nivavoola, “Leshi khumukhonye khumbakha Litempeli; shichila khali khutsi khusaalanga khu Nyasaye mulala mwele wa munyi musaalakhu khandi. Khwamenya nu khukholela khuye misango khuraanjila khulitukhu liu Mwami Esari-hadoni wa Ashuria, yakhulera khumenya hanu.”

³Navutswa Zerubabeli, Yeshwa, nende vimilili vi tsinzivulu tsia Israeli vachipa, “Leshi khukhukhonya khumbashila Mwami Nyasaye, uli Nyasaye weru Litempeli. Khutsi vene khutsitsanga khumbashila Mwami Nyasaye, uli Nyasaye weru Litempeli, khuli Mwami Kureeshi wa Perisia avooli khukhole.”

⁴Nalwo lwa vandu vu mu shivala shienesho vaheenditsa mwoyo vandu va Yuda; khandi nivavarishitsa khumbakha.

⁵Vahaana asoya khu vandu vi shivala shiavo khuvikalila khumbakha. Vatsililila khukhola kenako mumatukhu koosi ku Mwami Kureeshi wa Perisia yamihanga khandi mumatukhu ku Mwami Dario wa Perisia yamihanga.

⁶Lwa Mwami Ahaseru yaraanga khwamiha, vatsiku va vandu vamenyanga mu Yuda nende mu Yerusalemi vahandika vindu vitamanu viu khuvayaala.

⁷Mumatukhu ku Mwami Aratashasita wa Perisia yamihanga, Bishilamu, Mitsiredatsi, Tabeheli halala na valina vavo vandi vahandika ibarwa khu Mwami Aratashasita. Ibarwa yeneyo yahandikwa Muluaramaiki, khandi yenyekhanga ikalukhanyinywi lwa vachisomanga.

⁸Rehumu wali nali gavana, nende Shimushai wali nali mukarani wu lusomo vahandika ibarwa iyi khu Mwami Aratashasita khulondokhana khu Yerusalemi.[2]

⁹“Khutsi gavana Rehumu nende mukarani wu lusomo Shimushai, valina veru, vakhalachi, nende varumishi vandi voosi, vandu vamenyanga khale mu mataala ka Erechi, Babilonia, nende Susa mu shivala shia Elamu;

¹⁰halala na vandu vandi va Ashuri-banipali wali mundu mukali khandi wi tsingulu tsinyishi yarulitsa mu tsingo tsiavo navahila khutsia khumenya mu litaala lia Samaria nende havundu handi mu lusomo khuluveka luli imbo wu Muchela kwa Efurate.”

¹¹Yaka nako makhuva kahandikwa mu ibarwa yeneyo: “Khutsi varumishi vovo, va khumenyanga khuluveka luli imbo wu Muchela kwa Efurate, khuhandikanga khu Mwami Aratashasita.

¹²“Khwenyanga yivi mwami umanye ndi Vayahudi vitsa hanu khurula mu tsisomo tsiotsio tsindi vitsi khumenya mu Yerusalemi, khandi vakalushilanga khumbakha vuyia litaala likali litamanu khandi lia mahingani lienelo. Vraanji khukalushila khumbakha masisi khandi valamala vwangu yuvu.

¹³Yivi mwami, niiva litaala likali yili liliitsa khukalushilwa khumbakhwa vuyia ma masisi kalio kavwi khumbakhwa, vandu valiitsa khulekha khurunga vushuru; ma livishilu liolio li inzu yu vwami lilicheha.

¹⁴Lwa khuli vandu va yivi wamihanga, shikenyekhanga khulole yaka nikakholekhanga tawe; khandi khuvoolanga

¹⁵ndi uhaane lilako liu khurunishitsa mu vitabu viali via vakuuka vovo vavikha. Niiva ulakhola ndio, uliitsa khunyola ndi litaala likali yili liahingana shia khase khosi khandi ndi khurula mumatukhu kakhale, vandu vamenyanga mulio vanyashitsa vami nende vamihi vi tsisomo. Vandu valio shivali vatoro khwamiha tawe. Nashio shivune shiachila litaala likali lienelo nilitivitswa.

¹⁶Khulwa yako, khuli ni lisuuvila ndi niiva litaala likali yili linyala khumbakhwa vuyia, ma masisi kalio kavwi khumbakha, yivi mwami, uvula vunyali vu khwamiha lusomo khuluveka luli imbo wu Muchela kwa Efurate.”

¹⁷Mwami Aratashasita yaruma lichipu yili: “Mbandichilanga gavana Rehumu, mukarani wu lusomo Shimushai, halala na valina vavo vamenyanga mu litaala lia Samaria khandi havundu handi khuluveka luli imbo wu Muchela kwa Efurate, nyoli mulembe.

¹⁸“Ibarwa ya mwahandika yasomwa nikalukhanyinywa imbeli wanje.

¹⁹Nahaana lilako varunishitsi, khandi nivanyola ndi khurula mumatukhu kakhale litaala likali lia Yerusalemi liahinjitsa vami, khandi ndi lia yitsula vahingani nende vandu vachilanga vutiinyu nu vuvaho.

²⁰Vami vi tsingulu vayamihayo khandi vayamihakhu lusomo lwosi khuluveka luli imbo wu Muchela kwa Efurate, nivasololanga vushuru nu khurunga mirungu chindi chienyekhanga.

²¹Khulwa yako, muhaane malako ndi vandu venavo valeshe khukalushila khumbakha litaala likali khutukha lwa mba ninakhahaana malako.

²²Muve vacheli muvuli khwivilila makhuva yaka. Shichila shina salilitswi, manyole maraava?”

²³Lwa ibarwa yu Mwami Aratashasita yasomwa vwangu khu Rehumu, Shimushai, halala na valina vavo, vasimukha vwangu nivatsia Yerusalemi manivanika Vayahudi valeshe khukalushila khumbakha litaala likali.

²⁴Muhinzilu ku khumbakha Litempeli lia Nyasaye kwali kusinjilitswi, khandi liatsililila khuvaho khutukha khumuhika kwa khavili lwa Mwami Dario wa Perisia yamihanga.