Read tsotso NEHEMIA 12 Bible Online

NEHEMIA 12 - tsotso bible

NEHEMIA 12

¹Yaka nako mira ka vasalisi nende vandu vu lwivulu lwa Levi, vitsa halala na Zerubabeli mwana wa Shalitieli, nende Mukali wa vasalisi voosi Yeshwa. Vandu venavo vali Seraya, Yeremia, Ezira,

²Amaria, Maluki, Hatushi,

³Shekania, Rehumu, Meremotsi,

⁴Ido, Genetsoi, Abiya,

⁵Miyamini, Mahadia, Biliga,

⁶Shemaya, Yoharibu, Yedaya,

⁷Salu, Amoku, Hilikia, nende Yedaya. Navo vali vimilili va vasalisi nende vakhonyani vavo mumatukhu ka Yeshwa.

⁸Yaka nako mira ka vandu vu lwivulu lwa Levi: Yeshwa, Binuhi, Kadimieli, Sherebia, Yuda, nende Matania, halala na vakhonyani veve, yali mwimilili wi tsinyimbo tsiu khusanditsa.

⁹Vakhonyani vavo nivali Bakabukia nende Uno, vasinjila khuluveka lundi, nivavaheenzi mu muhinzilu kwa vakholanga.

¹⁰Yeshwa neye wivula Yohakimu, Yohakimu wivula Eliashibu; Eliashibu niyivula Yohada.

¹¹Yohada neye wivula Yonatsani; Yonatsani niyivula Yaduha.

¹²Mumatukhu ka Yohakimu yali nali Mukali wa vasalisi voosi, vasalisi vasinjililanga tsinzivulu tsia vakuuka vavo vali Meraya, wasinjililanga lwivulu lwa Seraya. Hanania neye wasinjililanga lwivulu lwa Yeremia.

¹³Meshulamu neye wasinjililanga lwivulu lwa Ezira. Yehohanani neye wasinjililanga lwivulu lwa Amaria.

¹⁴Yonatsani neye wasinjililanga lwivulu lwa Maluki. Yosefu neye wasinjililanga lwivulu lwa Shebania.

¹⁵Adina neye wasinjililanga lwivulu lwa Harimu. Helikai neye wasinjililanga lwivulu lwa Merahotsi.

¹⁶Zakaria neye wasinjililanga lwivulu lwa Ido. Meshulamu neye wasinjililanga lwivulu lwa Ginetsoni.

¹⁷Zikuri neye wasinjililanga lwivulu lwa Abiya. Pilitai neye wasinjililanga tsinzivulu tsia Miniamini nende Mohadia.

¹⁸Shamuha neye wasinjililanga lwivulu lwa Biliga. Yehonatsani neye wasinjililanga lwivulu lwa Shemaya.

¹⁹Matenai neye wasinjililanga lwivulu lwa Yoharibu. Uzi neye wasinjililanga lwivulu lwa Yedaya.

²⁰Kalayi nenye wasinjililanga lwivulu lwa Salai. Eberi neye wasinjililanga lwivulu lwa Amoku.

²¹Hashabia neye wasinjililanga lwivulu lwa Hilikia. Netsanieli neye wasinjililanga lwivulu lwa Yedaya.

²²Shitabu shiali shiahandikwamu makhuva khulondokhana khu tsinzivulu tsia vandu vu lwivulu lwa Levi, khandi khu tsinzivulu tsia vasalisi, mumatukhu ka vakali va vasalisi Eliashibu, Yohada, Yohanani, nende Yaduha. Makhuva kahandikwa khu vimilili vi tsinzu tsia vakuuka vavo. Khali tsinzivulu tsia vasalisi tsiahandikwamu mumatukhu kiliamiha liu Mwami Dario wa Perisia.

²³Mira ka vandu vu lwivulu lwa Levi, nivali vandu vimililanga tsinzivulu tsia vakuuka vavo, kahandikwa mu vitabu vi Tsinyinga, khutukha mumatukhu ka Yohanani mwana wa Eliashibu.

²⁴Yaka nako mira ka vandu vu lwivulu lwa Levi: Hashiabia, Sherebia, nende Yeshwa mwana wa Kadimieli, halala na vakhonyani vavo va vimililanga. Vali vaheelwa muhinzilu ku khwitsominya nu khusanditsa khulondokhana khu mivaalo ka Daudi, mundu wa Nyasaye. Shia shituma shia vandu shialondokhananga ni shituma shindi mu shikha shiashio.

²⁵Matania, Bakubukia, Obadia, Meshulamu, Talumoni, nende Akubu navo valindi valindanga vilivwa ha tsinzu tsi livishilu ha vilivwa vi Litempeli.

²⁶Vakhola muhinzilu kwavo, mumatukhu ka Yohakimu mwana wa Yeshwa, mwana wa Yozadaki, khandi mumatukhu ka Nehemia yamihanga khuli gavana, khandi mumatukhu ku musalisi Ezira, wali mwechitsi wa malako.

²⁷Khulitukhu lia lisisi li litaala likali liatakaswa, vandu vu lwivulu lwa Levi, valaangwa khurula shia havundu hosi ha vamenyanga khwitsa mu Yerusalemi. Khali vo vasanga mulikhoya liu khutakasa lienelo, nivimbanga tsinyimbo tsiu khusanditsa, khandi nivakhuvanga manyanga, vukhana nende vilili.

²⁸Mikaanda chia vandu vimbanga tsinyimbo vivunjelitsa halala, khurula mu lusomo lwa vamenyamu himbi Yerusalemi, khandi khurula mu michitsi chili mu litaala lia Netofatsi.

²⁹Varula khandi havundu halaangwangwa Betsi-gilugali, mu lusomo lwa Geba, nende Azimavetsi; shichila vandu vimbanga tsinyimbo, vali vayumbakha michitsi chiavo himbi Yerusalemi.

³⁰Lwa vasalisi nende vandu vu lwivulu lwa Levi vali nivamali khwitakasa vene khulondokhana khu milukha chiavo, vatakasa vandu, vilivwa nende lisisi.

³¹Nalwo lwa nalaanga halala vimilili va Vayahudi, khwitsa khwakanila ha vutoonje vwi lisisi. Narovola mikaanda mikali chivili, khuroonjela nu khwimba tsinyimbo tsiu khusanditsa Nyasaye. Mukaanda ku khuraanga kwaroonjela nu kutsia vulunji khuluveka lu mukhono musatsa khu vutoonje vwi lisisi li Shilivwa shia Masiingo.

³²Hoshaya nende inusu ya vimilili va Vayahudi va valonda munyuma;

³³khali vasalisi Azaria, Ezira, Meshulamu,

³⁴Yuda, Benyamini, Shemaya nende Yeremia;

³⁵halala na valala khu vasalisi vavukha vakhuvanga visiliva, nivali Zakaria mwana wa Yonatsani, mwana wa Shemaya, mwana wa Matania wivula Mikaya mwana wa Zakuri, mwana wa Asafu;

³⁶nende vakhonyani veve nivali Shemaya, Azareli, Milalahi, Gilalahi, Mahahi, Natsaneli, Yuda nende Hanani, nivakhuvanga vukhana vwali vwa Daudi, wali mundu wa Nyasaye. Mwechitsi wa malako Ezira neye wimililanga mukaanda kwenoko.

³⁷Nivali havundu halaangwangwa Shilivwa shi Shirula shia Matsi, vatsililila khunina hikulu hi viko viu khuseenakhu vili khu lisisi li litaala likali lia Daudi, khuvirila hikulu hi inzu yu vwami ya Daudi; nivatukha ha Shilivwa shia Matsi, khuluveka luli ivukwi wi litaala likali.

³⁸Mukaanda kundi kwa vandu vimbanga tsinyimbo tsiu khusanditsa, kwasimukha nu kutsia khuluveka lu mukhono mukhali khu vutoonje vwi lisisi. Inzi navalonda halala ninusu ya vandu vali nivarikale. Khwachenda nu khuvira khu Munaara kwi Lijiko liu Mulilu nu khutukha khu Lisisi Livambalalu.

³⁹Khwarulayo nu khuvira Shilivwa shia Efurahimu, Shilivwa Shikhulu, Shilivwa shi Tsisutsi, Munaara kwa Hananeli nende Munaara kwi Imia Indala, khutsia khutukha khu Shilivwa shia Makondi. Khwamalila luchendo lweru himbi ha shilivwa shili ha Litempeli.

⁴⁰Mikaanda chivili chia vandu vimbanga tsinyimbo tsiu khusanditsa vasinjila mu Litempeli lia Nyasaye. Inzi halala ni inusu ya vimilili va nali nindi navo khwasinjilamu khandi;

⁴¹khali vasalisi Eliakimu, Maseya, Miniamini, Mikaya, Eliohenai, Zakaria nende Hanania, ni visiliva viavo;

⁴²khali Maseya, Shemaya, Eliazari, Uzi, Yehohanani, Malukiya, Elamu nende Ezeri. Yeziraya neye wali mwimilili wa vandu vimbanga tsinyimbo.

⁴³Vakhola misango minyishi khulitukhu lienelo, ma vandu nivikhoya; shichila Nyasaye yali wu vakholi khuva nu vuyaanzi vunyishi muno. Khali vakhali nende vaana vavo vikhoya khandi. Liyooko liarulana khu likhoya liavo mu Yerusalemi liahulilikhana ihale wene muno.

⁴⁴Mumatukhu kenako, vandu varovolwa khusinjilila tsinzu tsi livishilu lia vavikhamu vihanwa mu Litempeli, khali khumeetakhu injeso, imu yu khuraanga khucheswa nende matunda ku khuraanga khwenga khu shia muhika. Vandu venavo vaheelwa muhinzilu ku khusolola mu milimi himbi khu mataala manyishi lukanu, vihanwa viu khuha vasalisi nende vandu vu lwivulu lwa Levi khulondokhana khuli malako kenyanga. Vayahudi voosi vayaanzitswa na vasalisi nende vandu vu lwivulu lwa Levi vakholanga muhinzilu;

⁴⁵shichila vakhola milukha chiu khutakasa nende milukha chindi chia Nyasaye yali niyavoola chikholwi. Vandu vimbanga tsinyimbo mu Litempeli, vakhola khandi muhinzilu kwavo khuli malako ka Daudi nende mwana wewe Solomoni vali nivahaana.

⁴⁶Khurula khale, khuraanjila mumatukhu ku Mwami Daudi nende Asafu, khwali nu mwimilili wa vandu vimbanga tsinyimbo, khandi khwaliho ni tsinyimbo tsiu khwitsominya, nu khusanditsa Nyasaye.

⁴⁷Mumatukhu ka Zerubabeli nende Nehemia, Vaisraeli voosi vasololanga vihanwa shia litukhu khukhonya vandu vimbanga tsinyimbo nende valindi vi vilivwa. Vavikhanga haluveka vihanwa viu khuha vandu vu lwivulu lwa Levi; khali vandu vu lwivulu lwa Levi venavo, nivavikha haluveka via vasalisi.