Read tsotso NEHEMIA 2 Bible Online

NEHEMIA 2 - tsotso bible

NEHEMIA 2

¹Khumweli kwa Nisani, khumuhika kwa makhomi kavili, muliamiha liu Mwami Aratashasita, lwa yali nalerelwi idivai, navukula idivai yeneyo nimuha. Yulu nalwo lwali lukhuraanga khulolekha ndi nali nishili khuvakhu nu vuveleli mu mwoyo imbeli wewe.

²Mwami Aratashasita yandeva, “Shichila shina ulolekhanga uli nu vuveleli mu mwoyo kwokwo, navutswa shiuli mulwale tawe? Shikali ni shindu tawe; navutswa nu vuveleli mu mwoyo kwanje.” Nalwo lwa namanya nindia muno.

³Navoolela Mwami Aratashasita, “Yivi mwami, uhindile muno! Shichila shina mbuli khuva nu vuveleli mu mwoyo kwanje, lwa ndolanga ni tsimoni tsianje litaala likali, li mivili chia vakuuka vaanje vayeveelwamu, ni liapomolanyinywa liakwa lichiinga, khandi vilivwa vialio vialaalitswa nu mulilu?”

⁴Mwami Aratashasita yambolela, “Ni shina shia wenyanga khukholele?” Nasaala khu Nyasaye uli mwikulu,

⁵nimbolela Mwami Aratashasita, “Nikava yivi mwami, uyaanzitswangwa ninzi murumishi wowo, khandi uli ni lienya liu khukhola ka nyenyanga, nuyaanza umbuchilile khutsia mu shivala shia Yuda, mu litaala lia vakuuka vaanje vayeveelwamu, khutsia khumbakha vuyia litaala likali lienelo.”

⁶Mwami Aratashasita yambolela (muruchi wi shikhali yali wikhale himbi naye), “Ni matukhu kanga ka utsitsanga khumenyayo? Ni litukhu shina lia uliitsa khukalukha?” Mwami Aratashasita yayaanzitswa nanduma, nimuvoolela litukhu liu khukalukha.

⁷Navoolela khandi Mwami Aratashasita nikava uyaanzitswangwa ninzi, nu vulahi nambele tsibarwa tsiambila khu vagavana vi tsisomo tsili imbo wu Muchela kwa Efurate, nikanyalikha vambuchilile khukhalakanyila mu tsisomo tsiavo khutukha mu shivala shia Yuda.

⁸Nareeva khandi ibarwa yanyala khuhila khu Asafu, wali nali mulindi wu Muliru kwi Inzu yu Vwami, nimwivaalilanga khuli anyala khumba tsimbaho, tsiu khurumishila khumbakha vilivwa vi Litempeli, masisi ki litaala likali, khandi inzu yanje yu khumenyamu. Mwami Aratashasita yamba shia shindu shiosi, shia nali nindevi, shichila Nyasaye yali ninzi khuvirila mu vulahi vwevwe.

⁹Nalwo lwa nasimukha ninzia khulola vagavana vu lusomo khuluveka luli imbo wu Muchela kwa Efurate. Navaha tsibarwa tsiu Mwami Aratashasita yali nambele. Mumatukhu kenako, Mwami Aratashasita yali waruma vasikali nende vandu vakwanilanga khu tsifarasi khutsia ninzi.

¹⁰Navutswa lwa mundu walaangwangwa Sanibalati wi litaala lia Horoni, halala na Tobia wali Muamoni vahulila ndio, valeka mu mioyo chiavo; shichila vali ninganakani ndi mundu wundi umali khwitsa khuchingula limenya lia Vaisraeli.

¹¹Nasimukha ninzia Yerusalemi, nimenyayo khumatukhu kavaka.

¹²Navukha mu tsindolo mu vutukhu, inzi nende vandu valala va nali nindi navo. Mundu avulakhuho wa navoolela ka Nyasaye wanje, yali nambolele khole mu Yerusalemi. Navukula ipunda ya nali nindi nayo yonyene. Nanina khuyo ninzia.

¹³Narula mu litaala likali, nimbirila mu Shilivwa shiu Luhoongo khuluveka luli imbo nuvushili vutukhu, ninzia ikuvanda nu wakhavira Musinji kwi Inge khutukha khu Shilivwa shia Masiingo. Nakola kola khu masisi ka Yerusalemi, kali nikapomolanyinywa nende vilivwa viali nivialaalitswa nu mulilu.

¹⁴Nalwo lwa nasimukha ninzia khu Shilivwa shiu Musinji, khali khutukha khu Lituvwi liu Mwami; navutswa shinanyola havundu ha ipunda yanje inyala khuvirila tawe.

¹⁵Nasimukha mu vutukhu, nimbirila khu injila yu luhoongo, ningola ngola khu masisi. Nakomokha, nimbirila mu Shilivwa shiu Luhoongo, lwa nali ningalukhanga.

¹⁶Vimilili vali iweneyo vali nivashili khumanyikhu, wa nali ninduli inoho shia nali nikholanga. Nali nishili khuvoolelakhu Vayahudi vashianje, vimilili, varumishi inoho vandu vandi voosi vali ni vatsitsanga khukhola muhinzilu kwenoko.

¹⁷Navutswa navavoolela, “Munyi vene muloli vutiinyu vwa khuvirilamu, khuli litaala likali lia Yerusalemi liapomolanyinywa nu khukwa lichiinga, khandi khuli vilivwa vi litaala likali vialaalitswa nu mulilu. Numuyaanza hambi! Chendi khumbashi vuyia lisisi lia Yerusalemi, nikanyalikha khuvuli khutsililila khunyola tsisoni.”

¹⁸Navavoolela makhuva khulondokhana khuli Nyasaye yali nali ninzi, khuvirila mu vulahi vwevwe; khandi makhuva ku Mwami Aratashasita yali nambolele. Nalwo lwa vanjipa, nivavoola, “Leshi khuraanje khumbakha!” Vitinyinya nivakhola nu mwoyo mulala muhinzilu mulahi kwenoko.

¹⁹Navutswa lwa Sanibalati wi litaala lia Horoni, Tobia wali Muamoni nende Muharabu wundi walaangwangwa Geshemu, vahulila ka khwenyanga khukhola, vakhukholela shihenye henye, nivakhuchaya. Vavoola, “Ni shina shia mwu kholanga yishi? Ni kilikali, mwenyanga khuhinganyinya khali Mwami Aratashasita?”

²⁰Navachipa, nimbola, “Nyasaye uli mwikulu neye utsitsanga khukhukholela vwangu muhinzilu yuku. Khutsi va khuli varumishi veve khutsitsanga khuraanga khumbakha, navutswa munyi muvulakhu shindu shiosi inoho vunyali vwosi inoho shindu, shia muliitsa khwitsushitsilakhu mwakhola mu Yerusalemi.”