Read tsotso NEHEMIA 5 Bible Online

NEHEMIA 5 - tsotso bible

NEHEMIA 5

¹Matukhu mati nikakhavira, vandu vasatsa nende vakhali vavo varaanga khwililila, shichila Vayahudi veshie.

²Valala khuvo vavoolanga, “Khutsi nende vaana veru vi shiyayi nende vi shikhana khwayivulana mu vunyishi; nu khwenyi khwalia khandi khutsililile khuva mwoyo, khutukha khukhave shiakhulia.”

³Khwaliho khandi na vandu vandi vavoolanga, “Khutsitsanga khukoteshitsa milimi chieru, milimi chieru chi misabibu, nende tsingo tsieru khunyole shia khunyala khulia mumatukhu ki inzala.”

⁴Khwaliho na yavo vavoolanga, “Khwakhasava tsisenti tsia khwarunga vushuru vu mwami, shichila milimi chieru nende milimi chi misabibu.

⁵Khali niiva khuli vandu vululela lulala khuli vashieru, khandi vaana veru ni valahi khuli vavo, kalolekhanga khukuulitsanga vaana veru vi shikhana nende vi shiyayi khuli varukwa. Valala khu vaana vi shikhana veru, vamala khukholwa varukwa. Shindu shivulakhuho shia khunyala khukhola, shichila milimi chieru nende milimi chi misabibu ni chia vandu vandi.”

⁶Lwa nahulila khwililila khwavo, nali nu vurima.

⁷Nakanakanakhu shindu khulondokhana khu makhuva kenako mu tsinganakani tsianje, ninundushila vimilili nende varumishi va vandu. Navavoolela, “Shia mulala khu munyi atiukhanga weshie musiko mulitoho.” Nalaanga halala shikhaalo shikali shia vandu, khulola kanyala khuvakhola;

⁸nivavoolela, “Khukuuli khandi Vayahudi vashieru, vali nivakuulitswa khu vandu vi tsimbia tsindi. Navutswa khali nunundi mukuulitsanga vamwavo venyu, valiitsa khukuulitswa khandi khu khutsi.” Vahonjela vutswa, vuchila khulomolomakhu shindu shiosi.

⁹Navavoolela, “Vikholwa via mukholanga ni vitamanu; mwenyekhanga muhe Nyasaye luyali, khandi mukhole likhola liu vulunji. Mukhakholi vatsiku veru, nivali vandu vi tsimbia tsindi khunyola shivune shinyala khuvakhola khukhuchaya tawe.

¹⁰Khali ndio, inzi, vashianje nende varumishi vaanje vandi navo, khwikopitsanga khandi vandu tsisenti nende imu. Khuvula vukhala vwa khutsitsanga khwenya khurungwa.

¹¹Muvakalushitsile nunundi milimi chiavo, milimi chiavo chi misabibu, milimi chiavo chi misayituni nende tsinzu tsiavo. Muvuli khuhuchilila khwenya khurungwa khandi makoovi kenyu, ka vali nako, kave ni tsisenti, imu, idivai nende makura ka vamurunganga shia khase khosi.”

¹²Vimilili vavoola, “Khutsitsanga khuvakalushitsila. Shindu shivulakhuho shia khutsitsanga khuvareeva vakhuhe. Khuli lwa uvooli.” Nalaangamu vasalisi, nivavoolela visuuhi khukhola ka vali nivalachi khukhola.

¹³Nasung'usula khandi khu lupindo lwi ikaanzu yanje, nimbola, “Nindi Nyasaye atsitsanga khusung'usula shia mundu wosi khu munyi wambakhananga khurweshitsa, ka yalaaka aliitsa khukhola.” Nalwo lwi shikhaalo shia vandu voosi vavoola, “Amina” nivitsominya Mwami Nyasaye. Vandu vakhola khuli valaaka.

¹⁴Khumihika chiosi likhomi na chivili, chia nali nindi gavana wa Yuda, khuraanjila khumuhika kwa makhomi kavili, muliamiha liu Mwami Atarashisita khutukha khumuhika kwa makhomi kavaka na chivili, mundu avulakhuho, ave ninzi inoho viikho vaanje waliakhu shiukhulia shia gavana yenyekhanga khuheelwa.

¹⁵Vagavana voosi vamihanga imbeli wanje, inzi nishili khurovolwa vatiukhanga vandu misiko militoho. Vavoolelanga vandu venavo vavahe shiukhulia nende idivai ya vang'wa, khumeeta khu tsisenti tsiali nitsialombwa khu ifetsa, tsia vaheelwangwa shia khulitukhu. Khali varumishi vavo vatiukhanga vandu misiko militoho. Navutswa inzi nambakhana khukhola ndio, shichila naheetsanga Nyasaye luyali.

¹⁶Khali inzi mwene nakhola ni tsingulu tsianje tsiosi muhinzilu ku khumbakha lisisi. Miandu chivulakhuho chia nanyolakhu. Varumishi vaanje voosi vakanilaho khukhola muhinzilu.

¹⁷Khali ndio, nali na vandu imia indala na makhomi karanu, nivali Vayahudi nende vimilili vavo. Naliho khandi na valala khu vandu vali nivaruli mu vandu, vi tsimbia tsindi tsili himbi khu shivala shieru.

¹⁸Khulitukhu lienelo, vasinza ihili indala nende makondi sita makhomeelu. Vasinzila tsingokho, khali ning'wa idivai inyishi, shia matukhu likhomi nikakhavira. Kenako nikamali khwikholekha, mbulakhu mundu wa nareeva ambe shiukhulia shia gavana yaheelwangwa, shichila nali namanya khuli vandu vatiukhwangwa misiko militoho chia vakhanyala khuchinga tawe.

¹⁹Nyasaye wanje, yitsushitsakhu shia shindu shiosi shia nakholela vandu yava, ukholele malahi.