Read tsotso NEHEMIA 6 Bible Online

NEHEMIA 6 - tsotso bible

NEHEMIA 6

¹Lwa Sanibalati, Tobia, nende mundu Muarabu walaangwangwa Geshemi nende vatsiku veru vandi voosi, vavoolelwa ndi mali khumbakha vuyia lisisi, khandi makova kavulakhuho karikala mulio, khali niiva khwali nu khushili khurechekha miliango mu vilivwa --

²Sanibalati nende Geshemi varumana likhuva khwinzi. Vavoola, “Hamba khwakane mu muchitsi mulala kuli mu lwomera lwa Ono.” Nikhali, vali valoshitsa khuli vanyala khusalilitsa.

³Naruma varumwa khuvo, nimbola, “Ndi nu muhinzilu mulitoho kwakholanga, khandi mbulakhu vwiyangu vu khukholomokha khutukhayo. Shichila shina muhinzilu kuvuli khutsililila, nikava nyala khukulekha khukholomokha khwitsa khulola munyi?”

⁴Varuma hali khane likhuva lienelo khwinzi; navutswa navachipa munjila indala yeneyo.

⁵Sanibalati yaruma khwinzi mulala khu varumishi veve, ni likhuva hali kharanu lia yambolela. Lialolekhanga lili khuli ibarwa ivula muhuuli kwatuuywakhu kwosi.

⁶Yaka nako kali nikahandikwa muyo: “Geshemi umali khumbolela ndi likhuva liu vuvehi limali khulanda shia havundu hosi mu vandu vi tsimbia tsili himbi na khutsi, ndi yivi nende Vayahudi mukanakananga, khuli munyala khukalukhana khukhuhinganyinya; khandi nashio shivune shichilanga numumbakha vuyia lisisi. Uvooli khandi ndi yivi ukanakananga khwiyamihitsa khuva mwami wavo;

⁷khandi ndi umali khuviritsa na valala khu vaprofeti, khulanditsa mu Yerusalemi ndi nivi Mwami wa Yuda. Kalolekhanga Mwami Aratashasita aliitsa khuvoolelwa makhuva kenako. Niiva kaliitsa khwikholekha ndio, ndolanga nu vulahi nu khwakani khulomolome khuli khumala kenako”

⁸Nalwo lwa naruma likhuva khuye, nimbola, “Ulomolomanga makhuva ku vuvehi; ni makhuva ka yivi mwene ukanakananga.”

⁹Voosi vachelitsa khuli vanyala khukhurishitsa, nivakanakana, “Valateteshela, ma muhinzilu kuvuli khuvwa.” Nasaala, nimbola, “Nyasaye wanje, nuyaanza umbe tsingulu nunundi!”

¹⁰Litukhu lindi, nasimukha ninzia khwinjila mu inzu ya Shemaya, mwana wa Delaya, wali mwana wa Mehetabeli, wali niyikalilwa hango hehe. Yambolela, “Chenda khutsi khwivisi Havundu Hatakatifu mu Litempeli lia Nyasaye, nu khikala miliango, shichila vandu venyanga khwitsa khukhwiira yivi. Isaa yosi vutukhu vunu, vatsitsanga khukhwiira.”

¹¹Navutswa navoola, “Musatsa khuli inzi nyala khwilukha toto? Musatsa khuli inzi anyala khutsia khwinjila mu Litempeli khuvula khwiirwa? Shinyala khwinjilamu tawe!”

¹²Niitsa khumanya ndi shiali Nyasaye wali namurumi khwinzi tawe; navutswa yavoola vuprofeti vwevwe khulondokhana khwinzi, shichila Sanibalati nende Tobia vali vamusamulitsi khumurunga.

¹³Vamusamulitsa avakholele kenako, khwononyinya lira lianje nu khunomba khukhola vwoni, niiva nakhola ka venyanga; nikanyalikha mbe ni lira litamanu khandi nyole tsisoni.

¹⁴Namanya nisaala, nimbola, “Yivi Nyasaye wanje, yitsushitsakhu ka Tobia nende Sanibalati vamali khukhola, khandi ka muprofeti wi shikhali Nohadia nende vaprofeti vandi vakholi, khulu khukhola khuria.”

¹⁵Vamala muhinzilu ku khumbakha vuyia lisisi khulitukhu lia makhomi kavili na karanu, liu mweli kwa Eluli. Vavukula matukhu makhomi karanu na kavili khumala muhinzilu kwenoko.

¹⁶Lwa vatsiku veru voosi vahulila ndio, vandu vi tsimbia tsiosi, tsiamenyanga himbi na khutsi varia nivanyola tsisoni; shichila vamanya ndi Nyasaye weru neye wakhukhonya khumala muhinzilu kwenoko.

¹⁷Navutswa mumatukhu kenako koosi, vimilili va Yuda, vahandika tsibarwa tsinyishi, nivaruma khu Tobia. Tobia yahandika khandi tsibarwa tsindi naruma khuvo.

¹⁸Vayahudi vanyishi vali khuluveka lwelwe; shichila kuuka wewe yali Muyahudi walaangwangwa Shekania mwana wa Ara. Khumeeta khu kenako, mwana wewe Yehohanani yali wahila mwana wi shikhana wa Meshulamu mwana wa Berekia.

¹⁹Khali ndio, vandu vambolelanga vikholwa vilahi khulondokhana khuye, khandi nivamuvoolela makhuva khulondokhana khwinzi. Nikhali, Tobia yaruma tsibarwa tsiu khuchelitsa khurishitsa inzi.