Read tsotso NEHEMIA 8 Bible Online

NEHEMIA 8 - tsotso bible

NEHEMIA 8

¹Vandu voosi vakanila halala, hakari hi litaala likali imbeli wi Shilivwa shia Matsi. Vavoolela Ezira, wali nali mwechitsi wa malako avahe Shitabu shia Malako ka Musa, ku Mwami Nyasaye yali niyaha Vaisraeli.

²Khulitukhu liu khuraanga, khu mweli kwa saba, Musalisi Ezira yalera imbeli wi shikhaalo shia vandu Shitabu shia Malako. Mu shikhaalo shienesho, khwalimu na vandu vasatsa nende vakhali, khali voosi vali ni limanya khulondokhana khu ka Malako kavoolanga.

³Yakasoma ikulu nu mwoyo mukali, khuraanjila mu mavwevwe khutukha hakari mbasu, nali hakari hi litaala likali imbeli wi Shilivwa shia Matsi imbeli wa vandu vasatsa, vakhali nende voosi vali ni limanya khulondokhana khu ka Malako kavoolanga. Nalwo lwa vandu voosi vahulishitsa ka yasoma khurula mu Shitabu shia Malako.

⁴Mwechitsi wa malako Ezira, yasinjila khu shikuru shiu khwilwatsilakhu, shiali ni shialombwa khu musala, shiali ni shiumbakhwa shichila shikholwa shienesho. Vandu vasinjila himbi naye vali Matitsia, Shema, Anaya, Uria, nende Hilikia. Maseya yasinjila khuluveka lu mukhono kwekwe musatsa. Pedaya, Mishaheli, Malikiya, Hashumu, Hashibadana, Zakaria, nende Meshulamu, navo vasinjila khuluveka lu mukhono kwekwe mukhali.

⁵Ezira yikula shitabu imbeli wa vandu voosi, shichila yali usinjile havundu hichingukhu khuvira vandu vandi voosi. Lwa yali niyikulanga shitabu, vandu voosi vasinjila.

⁶Ezira yasaala khu Mwami Nyasaye, uli Nyasaye Uli Ikulu khu Viosi; vandu voosi nivachipa, “Amina, Amina,” nivachinguli ikulu makhono kavo. Vinama hasi, nivasaala khu Mwami Nyasaye, uli Nyasaye Uli Ikulu khu Viosi.

⁷Yaka nako mira ka vandu varulanga mu vandu vu lwivulu lwa Levi vakhonyana nu khwivaalila vandu shia malako kavoolanga, vandu nivashisinjile havundu ha vali nivali: Yeshwa, Bani, Sherebia, Yamini, Akubu, Shabetsai, Hodia, Maseya, Kelita, Azaria, Yozabadi, Hanani, Pelaya.

⁸Vasoma vulahi vwene Shitabu shia Malako ka Nyasaye; khandi nivavoolela vandu shia kavoolanga khumanya lisomo lia vasomi.

⁹Lwa vandu vahulila ka malako kenyanga kakholwi, vihulila mu mwoyo, nivaraanga khulila. Nalwo lwa Nehemia, wali nali gavana, musalisi Ezira, wali nali mwechitsi wa malako nende vandu vu lwivulu lwa Levi veechitsanga vandu malako, vavoolela vandu voosi, “Litukhu linu nalio litakatifu khu Mwami Nyasaye, uli Nyasaye wenyu. Muvuli khwikhula inoho khulila tsikhwili.”

¹⁰Nalwo lwa Ezira yavavoolela, “Ruli hanu mutsi havundu ha mwenyi. Mwenyekhanga muve numuliitsanga vivana nu mung'wa idivai inuulu; khandi muheekhu vandu vavula shia valia; shichila nalio litukhu litakatifu khu Mwami Nyasaye, uli Nyasaye weru. Muvuli khuvelela khu mu mwoyo, shichila vuyaanzi vu Mwami Nyasaye, navwo vuchilanga numunyola tsingulu.”

¹¹Khu, vandu vu lwivulu lwa Levi vahonjelitsa vandu voosi vahonjele, nivavoola, “Honjeli, shichila yili nalio litukhu litakatifu. Muvuli khuvelela mu mwoyo.”

¹²Vandu voosi vasimukha nivatsia khulia nu khung'wa, khandi khutsia khuhaakhu vandi shitonye shia valia, khutsia khwikhoya; shichila vahulila makhuva ka vavoolelwa.

¹³Khulitukhu lia khavili, vimilili vi tsinzu tsia vakuuka va vandu voosi, vasalisi nende vandu vu lwivulu lwa Levi, voosi vasimukha nivatsia khulola mwechitsi wa malako Ezira, khwechitswa mechitso malako.

¹⁴Vanyola mu malako ku Mwami Nyasaye yali niyaha Musa, havundu ha kahandikwa ndi khu Vaisraeli valiitsa khumenya mu matiili mumatukhu ku mulukha khukholwangwa khu mweli kwa saba;

¹⁵khandi venyekhanga khuhandika nu khulanditsa makhuva yaka mu mataala kavo koosi khandi mu Yerusalemi: “Simushi mutsi mu vikulu, khulera tsitsia tsiu musala ku musayituni, musala ku musayituni kumbulimu, mutondo, mashindu, nende misala chindi chia masambu manyishi khulombela matiili, khuli kahandikwa.”

¹⁶Vandu vasimukha nivatsia khulera tsisia tsienetso, nivumbakha vene matiili kavo ku khumenyamu. Shia mulala yumbakha litiili lielie khwikulu khwi inzu yavo vene, mu lwanyi mwavo, khandi mu lwanyi mwi Litempeli liu Mwami Nyasaye, uli Nyasaye wavo. Vumbakha khandi matiili kavo havundu ha vandu vakanilanga halala, himbi ha Shilivwa shia Matsi khandi himbi ha Shilivwa shia Efurahimu.

¹⁷Shituma shia vandu voosi vali nivakalukha khurula mu vuhaambe, vumbakha matiili nivamenya mu matiili kenako; shichila khuraanjila mumatukhu ka Yeshwa mwana wa Nuni khutukha mumatukhu kenako, Vaisraeli vali nivashili khumbakha matiili ku khumenyamu. Khulwa yako, vandu vikhoya mu vunyishi muno.

¹⁸Ezira yasoma mu Shitabu shia Malako ka Nyasaye khu shia litukhu, khuraanjila khulitukhu liu khuraanga khutukha khulitukhu liukhumalilikha. Vikhoyela mulukha khumatukhu saba; khandi khulitukhu lia munane, khwali nu mulukha kukhumalila khulondokhana khuli Malako kenyanga.