Read tsotso ESITA 1 Bible Online

ESITA 1 - tsotso bible

ESITA 1

¹Mumatukhu ku Mwami Ahaseru yamiha, yali mwami wi tsisomo imia indala makhomi kavili na saba, khuraanjila mu shivala shia India khutukha mu shivala shia Etsopia.

²Mwami Ahaseru yamiha khu shisoko shieshie shiu vwami mu litaala lia Susa.

³Khumuhika kwa khavaka mu liamiha lielie, Mwami Ahaseru yalombela vandu va yamihanga navo nende varumishi veve, vasikali vi shivala shia Perisia nende Media vali nivaliho lwenolo, khali vagavana nende vimilili vamanyikhana mu vunyishi khurula mu tsisomo mulukha kwi lilia.

⁴Yamanyinya havulavu vunyishi vwi miandu chi shivala shieshie shia yamihanga khandi luyali nende vukhumi vu vunyali vwevwe khumatukhu manyishi; koosi halala kali matukhu imia indala na makhomi munane.

⁵Lwa mieli chienecho chiavira, Mwami Ahaseru yalombela vandu voosi vamenyanga mu litaala lia Susa, vakali khu vati mulukha kwi lilia, khuli ni shihanwa shia yali navaheele. Mulukha kwenoko kwavukula lisitsa lilala manikukholeshela mu lwanyi lu mulimi kwi inzu yu vwami.

⁶Havundu henaho hali hasiawa ni tsimbala tsia bulu nende tsindavu tsialombwa khu ipamba, nitsivoheelwi ni mikoye milahi chia sambarau chiasungwa khu tsipete tsialombwa khu ifetsa nichielelitswi khu tsirilu tsialombwa khu machina ka valombakhu isimiti. Visoko vialombwa khu itsahabu nende ifetsa viali viasinjilitswa havundu henaho, niviavekhwa ilaanji indavu yalombwa khu machina ka valombakhu isimiti, machina mamuuchililu, lichina lilahi liang'ang'anga, khandi lichina liu vukuuli vululu muno.

⁷Idivai yahaanwa khu vandu khurula mu vikombe vialombwa khu itsahabu, shia shikombe shiali lukanu khurula khu shindi, khandi idivai yi inzu yu vwami yali inyishi muno, khulondokhana khuli Mwami Ahaseru yenyanga vachihaane.

⁸Vandu vang'wa khulondokhana khuli malako kenyanga; shichila Mwami Ahaseru yali uhaani lilako khu varumishi vi inzu yu vwami vakholele shia mundu koosi kayikombanga akholelwi.

⁹Muruchi wi shikhali Vashiti yalombela khandi vakhali vamenyanga mu inzu yu vwami yali yu Mwami Ahaseru mulukha kwi lilia.

¹⁰Khulitukhu lia saba, lwa Mwami Ahaseru yali nali nu vuyaanzi vunyishi mu mwoyo shichila idivai, yavoolela vitsili saba viamurumishilanga -- nivili Mehumani, Bizitsa, Harubona, Bigitsa, Abagutsa, Zetsari nende Karikasi,

¹¹valere Muruchi wi shikhali Vashiti imbeli wewe, niyifwali ikofia yeye yu vwami, khumanyinya vandu nende vimilili vamihanga likoondo lielie; shichila yali wakaasa likoondo muno.

¹²Navutswa lwa vitsili vienevo viavoolela Muruchi wi shikhali makhuva ku Mwami Ahaseru yali navarumi khwitsa khumuvoolela, Muruchi wi shikhali mwenoyo yambakhana khwitsa. Mwami Ahaseru yaleka shichila makhuva kenako, nava nu vurima vutamanu.

¹³Khulwa yako, Mwami Ahaseru yavoolela vandu vu vusitsa vali nivamanya tsinyinga, shichila nakwo mwiima ku Mwami Ahaseru yali nakwo khu vandu voosi vali nivamanya malako khandi vanyala khumwechitsa kanyala khuvoola.

¹⁴Vandu vu Mwami Ahaseru yali niyamenya navo ni Karishena, Shetsari, Adimatsa, Tarishishi, Meresi, Marisena, nende Memukani; navo vimilili saba vamihanga Perisia nende Media vali nivaheelwa mihinzilu mikali chiu vunyali muliamiha lielie.

¹⁵Khu, Mwami Ahaseru yavareeva, “Khulondokhana khu malako, mukanakananga ni shina shiakhukholela Muruchi wi shikhali Vashiti, lwa yambakhane khulonda malako kaanje ka naruma vitsili khutsia khumuvoolela?”

¹⁶Nalwo lwa Memukani yavoolela Mwami Ahaseru nende vimilili va yamihanga navo, “Muruchi wi shikhali Vashiti shiakholi vutamanu khu yivi Mwami Ahaseru wonyene vutswa tawe; navutswa khali ukholele vimilili va wamihanga navo nende vandu voosi vamenyanga mu tsisomo tsiosi tsia wamihanga.

¹⁷Shikholwa shiu Muruchi wi shikhali Vashiti akholi shilalanda khu vakhali voosi, khuvalomba valechelitsi vasatsa vavo vavahila nivavoola, ‘Mwami Ahaseru yahaana lilako liu khutsia khulera Muruchi wi shikhali Vashiti imbeli wewe, navutswa yambakhana khwitsa.’

¹⁸Lwa vakhali va vimilili vamihanga Perisia nende Media vahulila makhuva khulondokhana khu mwiima ku Muruchi wi shikhali akholi valavoolela vasatsa vavo khulondokhana khuko khali litukhu nilishili khuvwa. Vakhali vamenyanga shia havundu hosi shivanyala khuha vasatsa vavo luyali tawe; khandi vandu vasatsa valalolela vakhali vavo vurima.

¹⁹Khulwa yako, niiva kaliitsa khuyaanzitsa yivi Mwami Ahaseru, haana lilako liu vwami ma lihandikwi mu malako ka Vaperisia nende Vamedia, linyala khuvula khukalukhanyinywa livoole ndi Muruchi wi shikhali Vashiti anyala khuvula khwitsa imbeli wowo; ma yivi Mwami Ahaseru urovole mu vwiyangu vwevwe mukhali wundi mulahi khuvira ye.

²⁰Khu, lwa lilako liolio lilanditswa shia havundu hosi mu vwami vwi shivala shioshio, shiavambalala khuli shilolekhanga, shia mukhali wosi aliitsa khuha musatsa wewe luyali, ave nu muhinda inoho mumanani.”

²¹Inganakani yeneyo yayaanzitsa Mwami Ahaseru nende vimilili va yamihanga navo; ma Mwami Ahaseru nakhola khuli Memukani yali navooli.

²²Mwami Ahaseru yaruma tsibarwa khu tsisomo tsia yamihanga, khu shia lusomo mu mahandiko nende lulomolomo lwa vandu vali mulwo vamanya, navoolanga mululomolomo ndi shia musatsa yamihi vandu vi inzu yeye mwene, khandi alanditsi likhuva lienelo mululomolomo lielie.