Read tsotso ESITA 6 Bible Online

ESITA 6 - tsotso bible

ESITA 6

¹Khulitukhu lilala lienelo mu vutukhu, Mwami Ahaseru yakhaywa khukona, nahaana lilako vitabu vi tsinyinga, vili na makhuva kahandikwamu khulondokhana khuli yamihanga vilerwimu khandi nu khusomwa.

²Makhuva kanyolekha nikahandikwamu khulondokhana khuli Modekai yavoola havulavu ndi Bigitsana nende Tereshi, vitsili vivili viu Mwami Ahaseru valindanga mu shilivwa shi inzu yu vwami, valoshitsa khuli vanyala khwiira Mwami Ahaseru.

³Mwami Ahaseru yareeva, “Nu luyali shina inoho shihanwa shina shia Modekai yanyolakhu khulondokhana khu kenako?” Varumishi veve vachipa, “Shindu shivulakhuho shia yakholelwa.”

⁴Mwami Ahaseru yareeva, “Ni viina unyala khuva nali mu lwanyi lwi inzu yu vwami?” Isaa yeneyo, Hamani yali niyakhinjila mu lwanyi lwi inzu yu vwami; yali witsi khuvoolela Mwami Ahaseru likhuva khulondokhana khuli Modekai anyala khusungwa khu misala chia yali nasimiishi.

⁵Nalwo lwa varumishi veve vachipa, “Hamani wusinjile mu lwanyi lwi inzu yu vwami yeyo alindililanga khukhulola.” Mwami Ahaseru yavoola, “Muvooleli yinjili munu.”

⁶Khu, Hamani yinjilamu, ma Mwami Ahaseru namuvoolela, “Khuliho nu mundu wanzikombanga khuha luyali muno. Ukanakananga ni shina shianyala khukholela mundu mwenoyo?” Hamani yireeva mu mwoyo, “Ni viina wundi uliho wu Mwami Ahaseru yikombanga khuha luyali muno? Ninzi, toto.”

⁷Khu, Hamani yachipa Mwami Ahaseru, “Mundu wa yivi Mwami Ahaseru uyaanzitswa khumuha luyali;

⁸haana lilako valere ikaanzu yu vwami ya yivi Mwami Ahaseru wifwali khandi ifarasi ya yivi uhilanga, ifarasi yili ni shimanyilu shiu vwami khu murwi kwayo.

⁹Nalwo lwa urovola mulala khu vimilili va wamihanga navo afwale mundu mwenoyo ikaanzu yeneyo, khandi amwimilili nanini khu ifarasi, khuvirila hakari hi litaala. Lekha mwimilili mwenoyo alaanjilili lwa mutsitsanga, ‘Lolikhu kakholekhanga khu mundu wa Mwami Ahaseru yikombanga khuha luyali!’ ”

¹⁰Nalwo lwa Mwami Ahaseru yavoolela Hamani, “Khola vwangu utsi khulera ikaanzu nende ifarasi, khandi ukholele vutswa Muyahudi Modekai, wikhalanga ha shilivwa shi inzu yu vwami. Ulamukholela koosi ka yivi mwene uvooli.”

¹¹Khu, Hamani yavukula ikaanzu nende ifarasi; nafwala Modekai, manamwimilila, niyikhale khu ifarasi. Yamuviritsila hakari hi litaala nalaanjilila navoolela vandu, “Lolikhu kakholekhanga khu mundu wu Mwami Ahaseru yikombanga khuha luyali!”

¹²Nalwo lwa Modekai yakalukha ha shilivwa shi inzu yu vwami. Navutswa Hamani yasimukha vwangu natsia munzu mwemwe, nalilanga muvuveleli mu tsimoni.

¹³Hamani yavoolela mukhali wewe Zereshi nende valina veve shia shindu shiosi shiakholekha khuye. Khu, mukhali wewe nende valina veve vu vusitsa vamuvoolela, “Niiva uranji khale khukoritsa vunyali vwovwo khu Modekai, mulala khu Vayahudi; shiukhusuuvilanga shiulamukuura tawe; navutswa toto uliitsa khwiirwa.”

¹⁴Lwa vali nivashilomolomanga naye, vitsili valindanga inzu yu vwami vatukhaho vwangu; vavukula Hamani nivamuhila mu mulukha kwi lilia lia Esita yali navalombele.