Read tsotso KHURULA 18 Bible Online

KHURULA 18 - tsotso bible

KHURULA 18

¹Kuuka wa Musa walaangwangwa Yetsero, wali nali musalisi wa Vamidiani, yahulila shia shindu shiosi, shia Nyasaye yali nakholele Musa nende Vaisraeli, lwa ya varulitsa mu shivala shia Misri.

²Litukhu lindi, yasimukha natsia khulola Musa, halala nu mukhali wa Musa walaangwangwa Zipora, wa Musa yali niyalekha inyuma,

³halala na vaana veve vavili, mulala Gerishomu na wundi Eliazari. (Musa yali wavoola, “Ndi mundu mucheni mu shivala shicheni;” yali wakulikha mwana mulala lira Gerishomu.

⁴Musa yali wavoola khandi, “Nyasaye wa tata wanje yakhonya, manambonyinya khuvula khwiirwa nu Mwami wa Misri”; khu yakulikha mwana wundi lira Eliezeri.)

⁵Yetsero yasimukha natsia nu mukhali wa Musa nende vaana veve vavili mu shiangalangwi, wa Musa yali niyamenya mu maheemo ha Shikulu shia Nyasaye.

⁶Yetsero yali warumila Musa likhuva ndi vali khunjila vitsanga,

⁷ma Musa natsia khumwakanila, namwinamila, khandi namukhumbelela. Vareevana vene khuvene mareevo khulondokhana khu shia vulamu vu mundu nivinjila mu liheemo lia Musa.

⁸Musa yavoolela Yetsero shia shindu shiosi, shiu Mwami Nyasaye yali nakholi khu Mwami wa Misri halala na vandu veve khuhonyinya Vaisraeli. Yamuvoolela khandi makhuva khulondokhana khulinyakhana lia Vaisraeli vavirilamu nivali khu luchendo, khandi khuli Mwami Nyasaye yavahonyinya.

⁹Lwa Yetsero yahulila makhuva kenako koosi, yali nu vuyaanzi,

¹⁰navoola, “Mwami Nyasaye yitsominywi, wamuhonyinya khurula khu Mwami wa Misri halala na vandu veve! Mwami Nyasaye yitsominywi, wahonyinya vandu veve khurula mu vurukwa!

¹¹Manyi nunundi ndi Mwami Nyasaye, ali ni tsingulu tsinyishi, khuvira vanyasaye voosi, shichila yakhola ndio, lwa Vamisri valechelitsanga Vaisraeli.”

¹²Yetsero yalera shihanwa shiu khusambwa nu mulilu, khandi vihanwa vindi vi misango chiu khuhaanwa khu Nyasaye. Haruni nende vimilili va Vaisraeli, vatsia naye khulia shiukhulia shitakatifu khuli mwiima ku khusaala khu Nyasaye.

¹³Litukhu lialondakhu, Musa yikhala hasi khukhalachila vandu, ma vandu nivamuvotokhana khurula mu mavwevwe khutukha halukolovo.

¹⁴Lwa Yetsero yalola shia shindu shiosi, shia Musa yali nakholanga, yareeva, “Ni shina shia wu kholelanga vandu yishi? Shichila shina wu kholanga wonyene makhuva yaka, vandu nivasinjile hanu khurula mu mavwevwe khutukha halukolovo, nivenya khukhulola?”

¹⁵Musa yamuvoolela, “Nu vulahi nikholi ndio, shichila vandu vitsanga khwinzi, khwenyelitsa lienya lia Nyasaye.

¹⁶Lwa vandu vavili vavetsanga nivayaalana, vitsanga khwinzi, makhalaka ni viina khuvo vavili wi likhola liu vulunji, nu khuvavoolela lienya lia Nyasaye nende malako keke.”

¹⁷Yetsero yamuvoolela, “Shiukakholanga munjila indahi tawe.

¹⁸Uliitsa khuvwa tsingulu yivi halala na vandu yava khandi. Muhinzilu yuku nu mulitoho khu yivi wonyene. Lekha khukukhola wonyene.

¹⁹Lekha khuhe nunundi likhuva lilahi linyala khu khukhonya, ma Nyasaye ave nivi. Nu vulahi nusinjilile vandu imbeli wa Nyasaye, nu khumuvoolela makhuva kakhaya vandu.

²⁰Uliitsa khuveechitsa malako ka Nyasaye nu khuvivaalila khuli vanyala khumenya, khandi khukhola ka vatushili vakhole.

²¹Navutswa khumeeta khu yaka, uliitsa khurovola vandu vali ni tsingulu, nu khuvaha vunyali vu khwimilila vandu: Vimilili va vandu tsiheelefu ni tsiheelefu, tsimia ni tsimia, makhomi karanu na makhomi karanu, khandi makhomi na makhomi. Navo vatushili khuva vandu vanyala khuha Nyasaye luyali, vanyala khusuuvilwa khandi vanyala khuvula khuhuchilila asooya.

²²Lekha vakhole khumatukhu koosi mihinzilu khuli vakhalachi va vandu; navutswa vavoolele valere makhuva kavo matiinyu khu yivi; vanyala khuviritsa vene makhuva matoro. Yaka kaliitsa khuchila muhinzilu kwokwo khuva mwangu, shichila valiitsa khukhukhonya khukhola.

²³Niiva uliitsa khukhola yaka, khuli Nyasaye avoolanga, shiuliitsa khuvwa tsingulu tawe. Vandu voosi valiitsa khutsia ingo wavo mu milembe.”

²⁴Musa yahulila makhuva ka kuuka wewe Yetsero yamuvoolela, nakhola shia shindu shiosi shia yali namuvoolele.

²⁵Musa yarovola vandu vali ni tsingulu khurula mu Vaisraeli voosi, navaha vunyali vu khwimilila vandu, vimilili tsiheelefu ni tsiheelefu va vandu, tsimia ni tsimia, makhomi karanu na makhomi karanu, khandi likhomi ni likhomi.

²⁶Varumikha khumatukhu koosi khuli vakhalachi va vandu. Valerela Musa makhuva ka vatiinyilanga, navutswa vo vene vaviritsa makhuva matoro.

²⁷Nalwo lwa Musa yaseevula kuuka wewe Yetsero khutsia; ma Yetsero nakalukha mu shivala shieshie shia yarulamu.