Read tsotso KHURULA 24 Bible Online

KHURULA 24 - tsotso bible

KHURULA 24

¹Mwami Nyasaye yavoolela Musa, “Hambi khu shikulu yishi khwinzi, Mwami Nyasaye, yivi nende Haruni, Nadabu, Abihu, nende vimilili va Vaisraeli makhomi saba; khandi lwa muliitsa khuva numushili ihale wene, muliitsa khusaala khwinzi.

²Yivi wonyene uliitsa khwisuunda himbi khwinzi, navutswa vandu vandi voosi, valiitsa khuvula khwisuunda khwinzi.”

³Musa yasimukha natsia khuvoolelakhu vandu makhuva ku Mwami Nyasaye yali namuvoolele nende malako keke; ma vandu voosi nivavoolela khulala, “Khulakhola shia shindu shiosi, shiu Mwami Nyasaye avooli.”

⁴Musa yahandika shia shindu shiosi, shiu Mwami Nyasaye yali namuvoolele. Nukushili mu mavwevwe litukhu lialondakhu, Musa yumbakha vwaali hasi hi shikulu; manasimiikha machina likhomi na kavili, shia lichina khu shia luhia, lwa vandu vi tsimbia likhomi na tsivili tsia Israeli.

⁵Yaruma vayayi vavukha, nivasamba misango khu Mwami Nyasaye, khandi nivasinza tsing'ombe tsindala tsiu musango, khuli shihanwa shiu khulera milembe.

⁶Musa yavukula inusu ya masahi malala ki miruku chienecho navikha khu tsibakuli; khandi inusu ya masahi kandi namitsa khu vwaali.

⁷Nalwo lwa yavukula shitabu shi lilakano, mwa makhuva ku Mwami Nyasaye kali nikahandikwa; manasomela vandu ikulu. Vandu nivavoola, “Khutsitsanga khukhola shia shindu shiosi, shiu Mwami Nyasaye atsitsanga khukhuvoolela khukhole khandi khulonde malako keke.”

⁸Musa yavukula masahi, namitsa khu vandu, navoola, “Yaka nako masahi kahambanyinya lilakano liu Mwami Nyasaye yakhola na munyi, lwa yahaana makhuva yaka koosi.”

⁹Musa, Haruni, Nadabu, Abihu, nende vimilili makhomi saba va Vaisraeli vanina nivatsia khu shikulu

¹⁰nivalola Nyasaye wa Israeli. Hasi ha yasenanga khwaliho ni shindu shiasasanga injila ilenjeli, ya bulu khuli malesi.

¹¹Mwami Nyasaye shiyasalilitsa vimilili va Vaisraeli venavo tawe; navutswa valola Nyasaye, manivalia shiukhulia khandi nivang'wa naye.

¹²Mwami Nyasaye yavoolela Musa, “Hamba khu shikulu handi hanu; khandi lwa uliitsa khuva nuliho, niitsa khukhuha machina kavili kakhongwa ka nahandikakhu malako koosi, kaliitsa khuva mivaalo ka vandu.”

¹³Musa nende mundu wamukhonyanga muhinzilu walaangwangwa Yoshwa virechekha; ma Musa naraanga khunina khutsia khu shikulu shia Nyasaye.

¹⁴Musa yavoolela vimilili, “Mukhulinde hanu khutukha lwa khukalukha. Haruni nende Huri valiitsa khuva na munyi; mundu wenyanga vukhonyi vwosi, aliitsa khutsia khuvo.”

¹⁵Lwa Musa yanina natsia khu shikulu, malesi kashikhunikha.

¹⁶Vukhumi vu Mwami Nyasaye vwalolekha khu Shikulu shia Sinai; malesi ni kashikhunikha khumatukhu sita; khulitukhu lia saba, Mwami Nyasaye nalaanga Musa khurula mu malesi.

¹⁷Vukhumi vu Mwami Nyasaye vwalolekha khu Vaisraeli, khuli mulilu nu kwakhanga khu shikulu.

¹⁸Musa yinjila mu malesi, lwa yali naninanga khutsia khu shikulu. Yamenyayo, vutukhu nu mbasu khumatukhu makhomi kane.