Read tsotso KHURULA 27 Bible Online

KHURULA 27 - tsotso bible

KHURULA 27

¹“Uliitsa khumbakha vwaali khurula khu musala ku munyenye. Vuliitsa khuva shilala mu tsimbeka tsiosi, vuraambi vuliitsa khuva tsimita 2.2, vukalamu vuve tsimita 2.2, khandi vuve tsimita 1.3 khutsia ikulu.

²Uliitsa khusinjilitsa misala khwikulu khu mu tsimbeka tsine tsiu vwaali. Chiliitsa khulomba shindu shilala nu vwaali, ma vwaali vwosi vuveshwi nu mukasa.

³Uliitsa khulomba tsinyungu tsi likooshe likwamu, majiko, tsibakuli, tsingaka, nende tsinjoo tsiu khwahula mulilu; vindu yivi viosi, viliitsa khulombwa khu mukasa.

⁴Uliitsa khwevelakhu vindu viu khulinda vwaali vialombwa khu mukasa, nu khuvikhakhu tsingara tsine tsiu khuchinjilakhu tsialombwa khu mukasa mu tsimbeka tsiavwo.

⁵Uliitsa khwevela ineti hasi khundulu khu vwaali, himbi khutukha hakari wu vwaali.

⁶Uliitsa khulomba misala chiu khuchinjilakhu vwaali khu musala ku munyenye, nu khuchivekha nu mukasa.

⁷Misala chienecho chiliitsa khusinjilitswa mu tsingara khu chive khu tsimbeka tsivili tsiu vwaali, lwa vuliitsa khuva nuvuchingwangwa.

⁸Uliitsa khulomba vwaali vwenovo khu tsimbaho, nu khuvulekha vwalame, khulondokhana khuli nakhumanyinya nuli khu shikulu.

⁹“Uliitsa khulomba lwanyi lwi Liheemo Litakatifu khu machoro malahi. Khuluveka lwalio luli ikuvanda tsimbala, tsiliitsa khuva nu vuraambi tsimita 44,

¹⁰nichitiililwi ni vivia viu mukasa makhomi kavili khu lwalilu lwalombwa khu mukasa makhomi kavili, ni tsingaka nende vivia vialombwa khu ifetsa.

¹¹Muliitsa khukhola malala mele, khuluveka luli ivuluka wu lwanyi lwenolo.

¹²Khuluveka lwalio luli imbo, khuliitsa khuva ni tsimbala nu vuraambi tsimita 22, ni misala likhomi nende lwalilu likhomi.

¹³Khuluveka lwalio luli ivukwi, ha vwinjililu vuli, lwanyi luliitsa khuva khandi nu vukalamu tsimita 22.

¹⁴Tsimbala nu vuraambi tsimita 6.6 tsiliitsa khuva khuluveka lu mu vwinjililu, ni misala chivaka nende vwalilu vuvaka vwalio.

¹⁵Khuluveka lundi, tsimbala tsiliitsa khuvakhu nu vuraambi tsimita 6.6, misala chivaka nende vwalilu vuvaka vwalio.

¹⁶Mu vwinjililu vu lwanyi lwenolo, khuliitsa khuvamu nu luvaala lu vuraambi tsimita 9, lwa naavwa khu tsimbusi tsia bulu, sambarau, nende tsimuuchi, tsiasiaywa ni isindani. Vuliitsa khutiilwa ni misala chine mu vwalilu vune vwalio.

¹⁷Misala chiosi chevwa lwanyi, chiliitsa khuhabanywa ni vivia vialombwa khu ifetsa khandi tsingaka tsialwo, tsiliitsa khulombwa khu ifetsa khandi vwalilu vwalwo vuliitsa khulombwa khu mukasa.

¹⁸Lwanyi lwenolo luliitsa khuva nu vuraambi tsimita 44, vukalamu tsimita 22, nende tsimita 2.2 khutsia ikulu. Tsimbala tsiliitsa khulombwa khu machoro malahi, nu vwalilu vwalombwa khu mukasa.

¹⁹Vindu viosi viliitsa khurumishilwa mu Liheemo Litakatifu, khandi tsingomu tsiosi tsi Liheemo Litakatifu khandi tsiu mu lwanyi, viliitsa khulombwa khu mukasa.

²⁰“Voolela Vaisraeli vakhulerele makura malahi ku musayituni ku mu itaaha, khu itaaha yashitswi shia halukolovo.

²¹Haruni nende vaana veve, valiitsa khwashitsa itaaha yeneyo mu Liheemo Litakatifu, ilwanyi wu luvaala luli imbeli wi Lisanduku li Lilakano. Iliitsa khutsililila khwakha hawenaho khutukha mu mavwevwe. Lilako yili, liliitsa khutsililila khulondwa na Vaisraeli nende vitsukhulu vavo khumatukhu koosi.