Read tsotso KHURULA 31 Bible Online

KHURULA 31 - tsotso bible

KHURULA 31

¹Mwami Nyasaye yavoolela Musa,

²“Mali khurovola Bezaleli, uli mwana wa Uri, mukuuka wa Huri, khurula mu vandu vuluhia lwa Yuda,

³khandi muheele tsingulu tsianje tsinyishi. Muheele limanya, vucheli, nende vunyali vu khukhola muhinzilu kwosi lukanu --

⁴vu khulomba vindu vilahi viosi lukanu, khukhola mihinzilu khu itsahabu, ifetsa nende mukasa.

⁵Mali khumuha vucheli vu khukhonga machina ku khumbakha, khandi ku khurumishila khukhola mihinzilu chiosi.

⁶Mali khurovola khandi Oholiabu mwana wa Ahisamaki, khurula mu vandu vuluhia lwa Dani, khukhola mihinzilu naye. Mbele khandi vahinzili vandi vunyali vu khulomba vindu, khu valombe shia shindu shiosi shia navavoolela valombe:

⁷Liheemo Litakatifu, Lisanduku li Lilakano ni shindu shiu khukhunishila, vindu viosi vienyekhananga mu Liheemo Litakatifu,

⁸imesa nende vindu vili khuyo viosi, shikuru shi itaaha shialombwa khu itsahabu inyukhu muno nende vindu vili khushio viosi, vwaali vu khusambilakhu vubani,

⁹vwaali vwi vihanwa viu khusambwa nende vindu viosi vilikhu, lukalayi lu khusavilakhu nende lwalilu lwalwo,

¹⁰tsinguvu tsiu khukhola muhinzilu ku vusalisi tsindahi muno tsia Haruni nende vaana veve varumishila, lwa vakholanga muhinzilu ku vusalisi,

¹¹makura ku mundu avekhwangwa khwirecheshitswa khu muhinzilu, nende vindu vihuunyanga mwayu mulahi vienyekhanga khuva Havundu Hatakatifu. Valalomba vindu vienevo viosi, khuli nakhuvoolela vakhole.”

¹²Mwami Nyasaye yavoolela Musa

¹³avoolele Vaisraeli, “Mutsililile khukhola katushili khulitukhu li Lisabato lianje. Yishi shiliitsa khuva shimanyilu hakari henyu nende inzi khumatukhu koosi kaliitsa khuvaho, khu mumanye ndi ninzi Mwami Nyasaye, wu mukholanga khuva vatakatifu.

¹⁴Mutsililile khukhola katushili khulitukhu li Lisabato; shichila ni litukhu lienyu litakatifu. Mundu uliitsa khuchayakhu litukhu lienelo, aliitsa khwiirwa. Mundu uliitsa khukhola muhinzilu khulitukhu li Lisabato, aliitsa khwiirwa.

¹⁵Muli na matukhu sita ku khukholelamu muhinzilu kwenyu; navutswa litukhu lia saba ni litukhu litakatifu khwinzi. Mundu uliitsa khukhola muhinzilu khulitukhu lienelo, aliitsa khwiirwa.

¹⁶Vaisraeli valiitsa khutsililila khukhola katushili khulitukhu lienelo, khuli shimanyilu shi lilakano.

¹⁷Ni shimanyilu shiliitsa khuvaho khumatukhu koosi, hakari ha Vaisraeli nende inzi, shichila ninzi Mwami Nyasaye, waloonga khumatukhu sita likulu nende lilova; khandi khulitukhu lia saba nalekha khukhola muhinzilu manimbulukha.”

¹⁸Lwa Mwami Nyasaye yali namali khulomoloma na Musa khu Shikulu shia Sinai, yamuha machina kavili kakhongwa ka Nyasaye mwene yali ni yahandikakhu malako.