Read tsotso KHURULA 32 Bible Online

KHURULA 32 - tsotso bible

KHURULA 32

¹Lwa vandu valola ndi Musa ucheleve khwitsa hasi khurula khu shikulu, navutswa wikhaleyo kho luhono, vivunjelitsa khu Haruni, nivamuvoolela, “Khushili khumanyakhu shindu shiosi, shinyala khuva nishikholeshe khu mundu Musa woyo, wa khurulitsa mu shivala shia Misri. Nuyaanza ukhulombele nyasaye, unyala khukhwimilila.”

²Haruni yavavoolela, “Rulitsi matemba kalombwa khu itsahabu khu maroyi ka vakhali venyu, vaana venyu vi shiyayi nende vaana venyu vi shikhana vifwalanga; mamunderele hanu.”

³Vandu voosi varulitsa matemba kalombwa khu itsahabu khu maroyi kavo nivahila khu Haruni.

⁴Haruni yavukula matemba kenako, nakasamba nikayekulukha, nasuundula itsahabu mu shindu shiu khuloonjelamu; nalomba shifwanani shi shimoli shihunwa khu itsahabu yeneyo. Nalwo lwa vandu vavoola, “Vaisraeli munyi, uyu neye nyasaye weru, wa khurulitsa mu shivala shia Misri!”

⁵Lwa Haruni yalola makhuva kenako, yumbakha vwaali imbeli wi shifwanani shi shihunwa shialombwa khu itsahabu shienesho. Haruni yavoolela vandu, “Khuliitsa khuva nu mulukha mukamba ku khuha Mwami Nyasaye luyali.”

⁶Nukushili mu mavwevwe khulitukhu lialondakhu, vandu valera miruku milala khusamba khuli misango, khandi chindi khulia khuli vihanwa viu khulera milembe. Vandu vikhala hasi nivalia; manilikalukhana khuva lisieva liu khung'wa, nu khukona halala vene khuvene.

⁷Mwami Nyasaye yavoolela Musa, “Kholomokha hasi vwangu, shichila vandu vovo, va warulitsa mu shivala shia Misri, vakholi vwoni; khandi vamali khunzambakhana.

⁸Vamali khulekha khale injila ya navavoolela valonde; valombi shifwanani shi shimoli shihunwa khu itsahabu. Vasaalanga khushio nu khushikholela misango. Vavoolanga ndi neye nyasaye wavo, wa varulitsa mu shivala shia Misri.”

⁹Mwami Nyasaye yavoolela Musa, “Mali khulola vandu venavo, khuli ni vahaaka.

¹⁰Uvuli khuchelitsakhu khungaya. Ndi nu vurima navo, khandi nzitsanga khuvamulula. Niitsa khumukhola munyi nende vitsukhulu venyu, khukwa luhia lwa vandu vanyishi.”

¹¹Navutswa Musa yareeva Mwami Nyasaye, uli Nyasaye wewe, navoola, “Mwami Nyasaye, shichila shina ulolelanga vurima vandu vovo, va warulitsa mu shivala shia Misri, khuvirila mu vunyali vu khuchenyinya nende tsingulu?

¹²Shichila shina wenyanga Vamisri vavoole warulitsa vandu vovo mu shivala shia Misri, nuli ninganakani yu khuvativitsa mu vikulu, khandi khuvamulula voosi? Lekha khuvalolela vurima. Ukalukhane tsinganakani tsiotsio, ma uleshe khulerela vandu vovo matiinyu.

¹³Yitsushitsakhu varumishi vovo Aburahamu, Isaka, nende Yakobo. Yitsushitsakhu lilaaka lia wali nu wa valaaka ndi uliitsa khuvaha vitsukhulu vanyishi, khuli tsinyining'ini tsili mu malesi khandi uhe vitsukhulu vavo shivala shienesho shiosi, khuva shiavo shiu khumenyamu mihika ni mihika.”

¹⁴Mwami Nyasaye yakalukhana tsinganakani tsietsie manalekha khulerela vandu veve matiinyu, khuli lwa yali nasiomi khukhola.

¹⁵Musa yakholomokha natsia hasi hi shikulu, nachinji machina kavili kakhongwa ka malako kali ni kahandikwakhu khu tsimbeka tsivili tsiosi.

¹⁶Nyasaye mwene neye wali niyakhonga machina kenako, khandi neye wahandika khuko malako.

¹⁷Lwa Yoshwa yahulila liyooko lia vandu valaanjililanga, yavoolela Musa, “Mbulilanga liyooko li liihe mu maheemo ka vasikali vamenyamu.”

¹⁸Navutswa Musa yavoolela Yoshwa, “Shilihulilikhananga khuli liyooko liu khwikhoya liu khukuura inoho khulila khu khukuurwa tawe; ni liyooko liu khwimba tsinyimbo.”

¹⁹Lwa Musa yali niyakhisuunda himbi khu maheemo ka vandu vamenyamu khulola shifwanani shi shimoli shihunwa, khandi khulola vandu nivasievanga, yali nu vurima. Musa yasiuva machina kavili kakhongwa ka yali nachinji kenako, manikatong'okha, lwa yali nasinjile hasi hi shikulu.

²⁰Musa yavukula shifwanani shi shimoli shi shihunwa shia vali nivalombi, nashisamba nu mulilu khuchemulila; manashisia khukwa vusi, manatsukanyinya na matsi; navoolela Vaisraeli vang'wi.

²¹Musa yavoolela Haruni, “Vandu yava vakhukholele shindu shina, kachili nuvimilila khukhola vwoni vutamanu yuvu?”

²²Haruni yavoolela Musa, “Lekha khundolela vurima; wamanya ndi vandu yava vali nu mwoyo muti khukhola vindu vitamanu.

²³Vambolele, ‘Shindu shivulakhuho, shiakhumanyi shikholeshe khu mundu Musa woyo, wa khurulitsa mu shivala shia Misri; khulombele nyasaye, unyala khukhwimilila.’

²⁴Navavoolela vanderele vindu viavo vialombwa khu itsahabu; khandi yavo vali nivali navio, vanavula nivamba. Nasiuva vindu vienevo mu mulilu, ninyola shifwanani shi shimoli shihunwa yishi, khurula muvio!”

²⁵Musa yalola Haruni umali khukoyanyinya vandu, nu khuvalomba khuva va vatsiku vavo vakholela shihenye henye.

²⁶Nalwo lwa Musa yasinjila mu shilivwa shiu mu maheemo ka vandu vamenyamu, nalaanjilila, navoola, “Mundu uli khuluveka lu Mwami Nyasaye, khutukha ave niyitsanga khwinzi hanu!” Vandu vuluhia lwa Levi vivunjelitsa voosi khuye.

²⁷Musa yavavoolela, “Mwami Nyasaye, uli Nyasaye wa Israeli avoolelanga shia mundu wosi khu munyi yiyavaale shivavi shieshie, khutsia khuvirila mu maheemo ka vandu vamenyamu khurula mu shilivwa yishi khutsia mu shilivwa shindi, khwiira vamwavo veve, valina veve, nende vareende veve.”

²⁸Vandu vuluhia lwa Levi valonda ka vavoolelwa, niviira himbi vandu tsiheelefu tsivaka khulitukhu lienelo.

²⁹Musa yavavoolela, “Mukholelwi nunundi khuva vatakatifu khu Mwami Nyasaye; shichila mwiiri vaana venyu vi shiyayi nende vamwavo venyu; khandi Mwami Nyasaye umali khumukasitsa nunundi.”

³⁰Litukhu lialondakhu, Musa yavoolela vandu, “Mukholi vwoni vutamanu muno. Navutswa natsia nunundi khandi khu shikulu khu Mwami Nyasaye; haundi, munyala khusemehwa khurula mu vwoni vwenyu shichila inzi.”

³¹Musa yakalukha khu Mwami Nyasaye navoola, “Vandu yava vakholi vwoni vutamanu muno. Valombi nyasaye khu itsahabu, khali vasaali khuye.

³²Nuyaanza vasemehe khurula mu vwoni vwavo; navutswa niiva unyala khwambakhana khuvasemeha, rulitsa lira lianje mu shitabu shia wahandikamu mira ka vandu vovo.”

³³Navutswa Mwami Nyasaye yavoola, “Niitsa khurulitsa mira ka yavo vakholela vwoni mu shitabu shianje.

³⁴Navutswa simukha utsi; hila vandu havundu ha nakhuvoolelakhu yaho; khandi injelosi yanje, iliitsa khukhwimilila. Nikhali, lwa litukhu liu khuvasalilitsa litsitsanga khutukha, niitsa khuvasalilitsa shichila vwoni vwavo.”

³⁵Nalwo lwa Mwami Nyasaye yalwalitsa vandu vulwale, shichila vachila Haruni yalomba shifwanani shi shimoli shihunwa khu itsahabu.